ށ. ފުނަދޫ ތަރައްގީ ކުރާ އެއާޕޯޓުގެ ރަންވޭ އަޅުމަށް އަޅަން ޖެހޭ ފުރަތަމަ ފަށަލަ އަޅައި ބިން އެއްވަރުކުރަން ފަށައިފިއެވެ.
އެމްޓީސީސީން ބުނީ އެއާޕޯޓު އެޅުމުގެ މަސައްކަތް ބާރު ސްޕީޑް ކުރިއަށްދާ ކަމަށާއި، އެގޮތުން މިހާރު ރަންވޭ އެޅުމަށް އަޅަންޖެހޭ އޭބީސީ ލޭޔާރ އަޅަންފާށައިފާއިވާ ކަމަށެވެ.
ރާއްޖެއެމްވީއަށް މައުލޫމާތު ދެއްވަމުން ފުނަދޫ ކައުންސިލްގެ ރައީސް އަހުމަދު އިބްރާހިމްފުޅު ވިދާޅުވީ މިއެއާޕޯޓަކީ ށ އަތޮޅުގެ ރައްޔިތުން ޒަމާންތަކެއް ވަންދެން ދެކެމުންދިޔަ ހުވަފެނެއް ކަމަށާއި، ދިގު އިންތިޒާރަކަށްފަހު މިމަސައްކަތް ކުރިއަށްދާތީ ރައްޔިތުން ތިބީ ވަރަށް އުފަލުން ކަމަށެވެ.
އަހުމަދު ވިދާޅުވީ އެއާޕޯޓުގެ މަސައްކަތް ވަރަށް ބާރު ސްޕީޑް ކުރިއަށްދާ ކަމަށާއި، މިމަޝްރޫއު ނިންމަން ކަނޑައަޅާފައިވާ ތާރީހަށް ނިންމޭނެ ކަމުގެ އުންމީދު އެބައޮތް ކަމަށެވެ.
އެއްފަސް ކުރުމުގެ ސިޔާސަތުގެ ދަށުން ފުނަދޫގައި ނުވަ ރަށެއްގެ މީހުން ދިރިއުޅޭކަން ފާހަގަކުރައްވައި އަހުމަދު ވިދާޅުވީ ފުނަދޫއަށް އެރައްޔިތުން ބަދަލުވީ ތަރައްގީ ބޭނުންވާތީ ކަމަށެވެ. މިއެއާޕޯޓުގެ އިތުރު ވަޒީފާތައް އުފެދި މިހާރު ދަތުރުފަތުރު ކުރުމަށް މިހާރު ދިމާވާ ދަތިތަކަށް ހައްލު ލިބޭނެ ކަމަށް އޭނަ ވިދާޅުވިއެވެ.
ށ. އަތޮޅުގައި އެއާޕޯޓެއް ނެތުމުން، އެ ސަރަހައްދާ ކައިރީގައި އެއާޕޯޓު އޮންނަ ރ އިފުރު ނުވަތަ ހދ. ހަނިމާދޫ އެއާޕޯޓަށް ދިއުމަށް ގިނަވަގުތުތަކެއް ހޭދަކުރަންޖޭއިރު އަތުންދާ ހަރަދު ވެސް ބޮޑުވެގެންދެއެވެ.
ގާތްގަނޑަކަށް 2500 މީހުންގެ އާދާބީއެއް އޮންނަ ފުނަދޫ އެއާޕޯޓު އެޅުމަށް މިއަހަރުގެ ބަޖެޓުގައި ވަނީ 89 މިލިއަން ރުފިޔާ ހިމަނާފައެވެ. އެއެއާޕޯޓުގައި އަޅާ ރަންވޭގެ ދިގު މިނުގައި 1200 މީޓަރު ހުރެއެވެ.
