ޔޫރަޕިއަން ޔޫނިންއަން (އީޔޫ) އިން ފިޔަވަޅު އަޅާނެ ކަމަށް ބުނެ ބައެއް ފަރާތްތަކުން އުޅެނީ ދިވެހި ބައެއް ވިޔަފާރިވެރިންގެ އަތުން ފައިސާ ހޯދަން ކަމަށް ފިޝަރީޒް މިނިސްޓަރު ޑރ. މުޙައްމަދު ޝައިނީ ވިދާޅުވެއްޖެއެވެ.
ޝައިނީ މިހެން ވިދާޅުވެފައިވަނީ އީޔޫގެ ފޮރިން މިނިސްޓަރުން ހިމެނޭ ކައުންސިލް ބައްދަލުވުމުގައި ރާއްޖޭގެ އިންސާނީ ހައްގުތަކާއި، ގާނޫނުތައް ނެގެހެއްޓުމަށާއި، ސިޔާސީ ހައްލެއް ހޯދުމަށް ހުރަސް އަޅާ އެންމެހާ މުއައްސަސާތަކާއި، ވަކިވަކި ފަރުދުންނާއި މެދު ފިޔަވަޅު އެޅޭ ގޮތަށް ނިންމައި، ފާސްކޮށްފައިވާ އޮނިގަނޑަށް އިޝާރާތް ކުރައްވައެވެ.
ޝައިނީ ކުރެއްވި ޓްވީޓެއްގައި ވިދާޅުވެފައިވަނީ ރާއްޖޭގެ ވަކިވަކި ފަރާތްތަކާއި މެދު ފިޔަވަޅު އެޅުމާގުޅޭ ގޮތުން އީޔޫން ފާސްކުރި އޮނިގަނޑުގައި، ބައެއް ވިޔަފާރިވެރިން ހިމެނޭ ކަމަށް ބުނެ އިދިކޮޅު ފަރާތްތަކުން ބިރު ދައްކަމުންދާ ކަމަށެވެ.
ޝައިނީ ވިދާޅުވި ގޮތުގައި އީޔޫގެ ނިންމުމުގައި އެއްވެސް ފަރާތެއްގެ ނަމެއް ހިމަނާފައެއް ނުވެއެވެ. އަދި އެއްވެސް ފަރާތަކާއިމެދު ފިޔަވަޅު އެޅިޔަ ނުދިނުމަށްޓަކައި ކުރެވެންހުރި ހުރިހާ މަސައްކަތެއް ކުރަމުންދާ ކަމަށް ޝައިނީ ވިދާޅުވެފައިވެއެވެ.
ވިޔަފާރިވެރިންނަށް ބިރު ދައްކައިގެން ފައިސާ ހޯދަން އުޅޭ ކަމަށް ޝައިނީ ވިދާޅުވި ނަމަވެސް ބިރުދައްކާ ވިޔަފާރިވެރިންނަކީ ކޮން ބައެއް ކަމެއް ވެސް ޝައިނީ ވިދާޅެއް ނުވެ އެވެ.
އީޔޫގެ ގަރާރުގައި ރާއްޖެއަށް ދޭ އެހީތައް ކަނޑާލުމާއި، ސަރުކާރާއި ސަރުކާރަށް ތާއީދުކުރާ ވަކި ވަކި ފަރުދުންނާއި ކުންފުނިތަކުގެ އީޔޫ ގައުމުތަކުގައި ހުރި މުދަލާއި އެކައުންޓުތައް ހިފެހެއްޓުމާއި، އެމީހުންނަށް އީޔޫ ގައުމުތަކަށް އެތެރެ ނުވެވޭ ގޮތް ހެދުން ހިމެނެ އެވެ.
