ކްލޯއީ ކާޑޭޝިއަން ބައިވަރު ދަރިން ބޭނުން

ދަރިއަކު ބޭނުންވެގެން އުޅޭތާ ގިނަ ދުވަސްތަކެއް ފަހުން ކްލޯއީ އާއި އޭނާގެ ލޯބިވެރިޔާ ޓްރިސްޓަން ތޮމްޕްސަން އަށް ދަރިއެއް ލިބުނީ މިއަހަރުގެ އެޕްރީލްގައެވެ.

ކްލޯއީއާއި ޓްރިސްޓަންގެ ދަރިފުޅު ޓްރޫ ތޮމްޕްސަން ލިބުމާއެކު ކްލޯއީއަށް މިހާރު އެންމެ ބޮޑަށް އަމާޒުވެފައިވާ ސުވާލަކީ ދެން އެންމެ އަވަހަށް ދަރިއެއް ހޯދާނީ ކޮންއިރަކުންތޯއެވެ.

އީ ނިއުސްއަށް ކްލޯއީ ދީފައިވާ އިންޓަވިއުއެއްގައި އޭނާ ބުނެފައިވަނީ ޓްރޫއަށް ކޮއްކޮއެއް ހޯދުމަށް އޭނާ ބޭނުންވާކަމަށާއި ބައިވަރު ދަރިން ހޯދުމަށް އޭނާ ބޭނުންވާކަމަށެވެ. އެހެން ނަމަވެސް އެކަމަށް އަދި ވަގުތު ބޭނުންވާކަމަށް ކްލޯއީ ވަނީ ބުނެފައެވެ.

"ސީދާ ބުނަންޏާ އަހަރެން ވަރަށް ބައިވަރު ދަރިން ބޭނުން. އެކަމަކު އަހަންނަކަށް ނޭނގޭ އަދި އެކަމަށް ރެޑީކަމެއް،" ކްލޯއީ ބުންޏެވެ.

ކްލޯއީ އާއި އޭނާގެ ފުރަތަމަ ފިރިމީހާ ލަމަރް އޮޑޮމް އާއި ދެމީހުން ކުރިން ދަރިއަކު ހޯދުމަށް ކުރި މަސައްކަތް ވަނީ ނާކާމިޔާބުވެފައެވެ. މިދިޔަ އަހަރުގެ ޖޫން މަހުގެ "ކީޕިން އަޕްވިތު ކާޑޭޝިއަން"ގެ އެޕިސޯޑުގައި ކްލޯއީ ދަރިއަކު ހޯދުމަށް އުނދަގޫވާނެ ކަމަށް ޑޮކްޓަރުން ވަނީ ބުނެފައެވެ. އަދި އޭނާ "އައިވީއެފް" ކޮށްގެން ދަރިއަކު ހޯދުމަށް ކުރި މަސައްކަތް އެފަހަރު ވަނީ ނާކާމިޔާބުވެފައެވެ. އެދެމީހުން ވަރިވެފައި ވަނީ މިދިޔަ އަހަރުތެރޭގައެވެ.