އިންޑޮނޭޝިއާގެ އިރުމަތީ ރަށަކަށް ބާރުގަދަ ބިންހެލުމެއް އަތުވެއްޖެ

އިންޑޮނީޝިއާގެ އިރުމަތީގައި އޮންނަ ލޮމްބޮކްއަށް 7.0 މެގްނިޓިއުޑްގެ ބާރުގަދަ ބިންހެލުމެއް އަތުވެއްޖެއެވެ.

ބިމުގެ 10 ކިލޯމީޓަރު އަޑިއަށް އައި މި ބިންހެލުން އައިސްފައިވަނީ އެގައުމުގެ ބާލީގެ 40 ކިލޯމީޓަރު އިރުމަތިންނެވެ.

އާދީއްތަ ދުވަހުގެ ބިންހެލުމާއި ގުޅިގެން ސުނާމީގެ އިންޒާރު ލޮމްބަކްގެ ދެކުނަށާއި، ބާލީގެ ދެކުނަށާއި އިރުމައްޗަށާއި، އިރުމަތީ ޖާވާގެ ދެކުނަށާއި، އުތުރުއިރުމަތީ މަދުރާއަށާއި، އުތުރު ކަލިމަންޓަންގެ އިތުރުން އުތުރު ސުލަވެސީއަށް ވަނީ ނެރެފައެވެ. އަންދާޒާ ކުރެވޭ ގޮތުގައި ސުނާމީގައި ރާޅު ދޮޅު ފޫޓަށް އުފުލޭނެއެވެ.

އެ ބާރުގަދަ ބިންހެލުން އައިސްފައިވަނީ 16 މީހުން މަރުވި ބިންހެލުމެއް އެގައުމަށް އައިތާ ހަފްތާއެއް ވެފައިވަނިކޮށެވެ.

އާދީއްތަ ދުވަހު ބިންހެލުމުގައި ލިބިފައިވާ ގެއްލުމުގެ ތަފްސީލު އަދި އެނގިފައެއް ނުވެއެވެ. ބިން ހެލުން ދެފަހަރުވެސް އައިސްފައިވަނީ ފަތުރުވެރިން ކޮންމެ އަހަރަކުވެސް ގިނަ އަދަދަކަށް ޒިޔާރަތްކުރާ ސަރަހައްދުތަކަށެވެ.

އެ ބިންހެލުމާއި ގުޅިގެން ސުނާމީގެ އެއްވެސް ނުރައްކަލެއް ރާއްޖެއަށް ނެތްކަމަށް މޫސުމާއި ބެހޭ ޤައުމީ އިދާރާއިން ވަނީ ބުނެފައެވެ.