ރިޔާޒު ރަޝީދު ކޯލިޝަނާ ގުޅިވަޑައިގަތުމަށް އިބޫ ގޮވާލައްވައިފި
ރިޔާޒް ރަޝީދަކީ ރައްޔިތުންގެ މަޖިލީހުގައި ވަރަށް ހަރަކާތްތެރި ބޭފުޅެއް
އިބޫ ތ. މަޑިފުށީގައި ވާހަކަ ދައްކަވަނީ
ގުޅިފައިވާ ސިޔާސީ ޕާޓީތަކުން ކުރަމުންދާ ގައުމީ މަސައްކަތުގައި ވިލުފުށީ ދާއިރާގެ ރައްޔިތުންގެ މަޖިލީހުގެ މެންބަރު ރިޔާޒް ރަޝީދު ބައިވެރިވެ ވަޑައިގަތުމަށް ގުޅިފައިވާ ސިޔާސި ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސާލިހް (އިބޫ) ގޮވާލައްވައިފި އެވެ.
ތ. އަތޮޅަށް ކުރައްވަމުން ގެންދަވާ ދަތުރުފުޅުގައި ރިޔާޒު ރަޝީދުގެ އުފަން ރަށް މަޑިފުށީގައި ވާހަކަ ދައްކަވަމުން އިބޫ ވިދާޅުވީ ރިޔާޒް ރަޝީދަކީ ވަރަށް ގާތް ރައްޓެއްސެއް ކަމަށާއި ނަމަވެސް ޚިޔާލާއި ސިޔާސީ ފިކުރު ތަފާތު ބޭފުޅެއް ކަމަށެވެ.
ރިޔާޒް ރަޝީދަކީ ރައްޔިތުންގެ މަޖިލީހުގައި ވަރަށް ހަރަކާތްތެރި މެމްބަރެއް ކަމަށް ވެސް، އެމްޑީޕީގެ އިބޫ ވިދާޅުވިއެވެ.
އިބޫ ވިދާޅުވި ގޮތުގައި ގުޅިފައިވާ ޕާޓީތަކުން ކުރަމުން ގެންދަނީ ސިޔާސީ މަސައްކަތެއް ނޫން ކަމަށާއި އެއަށްވުރެ ބޮޑަށް އެއީ ގައުމީ އަދި ރައްޔިތުންގެ މަސައްކަތެއް ކަމަށެވެ. އެ މަސައްކަތުގައި ރިޔާޒް ރަޝީދު ބައިވެރިވެ ވަޑައިގަތުމަށް ތަކުރާރުކޮށް އިބޫ ވަނީ ގޮވާލައްވާފައެވެ.
"އަޅުގަނޑު ރިޔާޒް ރަޝީދަށް މި ގޮވާލަނީ އަޅުގަނޑުމެންނާއި އެކީގައި ބައިވެރިވެ ވަޑައިގެން މި އިންތިޚާބު ކާމިޔާބު ކުރުމުގައި މި ނަތީޖާ ނޭރޭއިރުގައި އޭގެ ބައިވެރިއަކަށް ވެވަޑައިގަންނަވާށޭ،" އިބޫ ވިދާޅުވިއެވެ.
އެމްޑީޕީގެ މެނިފެސްޓޯއަކީ އަދި މި ގައުމު ތަރައްގީކުރަން ބޭނުންވާ ސިފައަކީ ލާމަރުކަޒީ ނިޒާމް ކަމަށާއި މަޑިފުށީ ކައުންސިލަށް ވެސް ބާރުތައް ލިބިދީ މާލީ ގޮތުން ފުދުންތެރި ކުރުވާނެ ކަމަށް ވެސް އިބޫ ވިދާޅުވި އެވެ.
އަދި ރައްޔިތުންނާއި ކައިރިން ޚިދުމަތްތައް ލިބޭނެ ގޮތަށް ލާމުރުކަޒީ ނިޒާމުން މުޅި ގައުމު ހިންގުމަށް ބަދަލު ކުރައްވާނެ ކަމަށެވެ.
އިބޫ ވިދާޅުވީ ގުޅިފައިވާ ސިޔާސީ ޕާޓީ ތަކުގެ ވެރިކަމެއްގައި ރައްޔިތުންގެ އަތުން ނަގާ ފީ އާއި ޖޫރިމާނާތައް ރިވިއުކޮށް އެއަށް ރަނގަޅު ހައްލެއް ގެންނާނެ ކަމަށެވެ.
