ބްރެޒިލްގެ ވާތުފިޔައިގެ ވޯކާސް ޕާޓީން އެ ގައުމުގެ ރިޔާސީ އިންތިޚާބުގައި ވާދަކުރައްވާނެ ކެނޑިޑޭޓަކަށް، ކޮރަޕްޝަނުގެ މައްސަލައިގައި ޖަލުބަންދުގައި ހުންނެވި އެ ޕާޓީގެ ފައުންޑަރ، އަދި އެ ޤައުމުގެ ކުރީގެ ރައީސް ލުއިސް އިނާޝިއޯ ލޫލާ ޑަ ސިލްވާ ކަނޑައަޅައިފިއެވެ.

ބްރެޒިލްގެ ރިޔާސީ އިންތިޚާބު އޮންނާނީ އޮކްޓޯބަރުމަހުގެ 7 ވަނަ ދުވަހުއެވެ.

ޚިޔާލު ހޯދުމުގެ ވޯޓުތަކުންދައްކާގޮތުގައި އިންތިޚާބުގައި އެންމެ ކުރީގައި އުޅުއްވަނީ ލޫލާ ނަމަވެސް އޭނާއަށް ވާދަކުރުމުގެ ފުރުސަތު ލިބޭނެކަން އަދި ކަށަވަރެއް ނުވެއެވެ.

މީގެ ކުރިން 2003 އާއި 2010 ވަނަ އަހަރާއި ދެމެދު މަގުބޫލު ބޭފުޅެއްގެ ގޮތުގައި ދެ ދައުރު ފުރިހަމަ ކުރެއްވި ލޫލާ ޖަލަށްލާފައިވަނީ މި އަހަރުގެ އޭޕްރީލްމަހުއެވެ.

އުމުރުފުޅުން 72 އަހަރުފުޅުގެ ލޫލާގެ މައްޗަށް ކުށް ސާބިތުވި ނަމަވެސް އޭނާ ގެންދަވަނީ ކުށެއް ނުކުރައްވާކަމަށް ތަކުރާރުކޮށް ވިދާޅުވަމުންނެވެ.

ލޫލާގެ މައްޗަށް މިދިޔަ އަހަރުގެ ޖޫން މަހު އެންމެ ފުރަތަމަ ހުކުމް ކުރީ 9 އަހަރަށް ޖަލަށް ލުމަށް ކަމަށްވާއިރު އިސްތިއުނާފު ކޯޓުން މި އަހަރުގެ ޖެނުއަރީ މަހު ވަނީ ދަށު ކޯޓުގެ ނިންމުން ދަމަހައްޓައި އަދި އިތުރު ތިން އަހަރާއިއެކު 12 އަހަރުގެ ޖަލު ހުކުމަކަށް އެމަނިކުފާނުގެ ޙުކުމް ބަދަލު ކޮށްފައެވެ.

ދަގަނޑުގެ މަސައްކަތުގައި އުޅުއްވުމަށް ފަހު ޔޫނިއަން ލީޑަރަކަށް ވެވަޑައިގެން އޭގެ ފަހުން ވެރިކަމަށް ވަޑައިގެންފައިވާއިރު އެ މަނިކުފާނު ފާހަގަ ކުރެވިގެން ގޮސްފައިވަނީ ބައިގަރުނެއްހާ ދުވަހުގެ ތެރޭގައި ވާތުފިޔައިގެ ލީޑަރެއްގެ ގޮތުގައި ވެރިކަމަށް ވަޑައިގެންނެވި ފުރަތަމަ ލީޑަރުގެ ގޮތުގައެވެ.

ޖެހިޖެހިގެން ތިންވަނަ ދައުރަކަށް ކުރިމަތި ނުލެއްވޭތީ ލޫލާގެ ދެވަނަ ދައުރަށް ފަހު ކުރިމަތިލެއްވީ އަރިސް ބޭފުޅެއް ކަމަށްވާ ޑިލްމާ ރޫސެފްއެވެ. ޑިލްމާގެ މައްޗަށް ވެސް ކޮރަޕްޝަންގެ ތުޙުމަތުކޮށް އެކަމަނާ ވެސް ވަނީ ވެރިކަމުން ދުރުކޮށްފައެވެ.