ގދ. ފަރެސްމާތޮޑާގައި އެއާޕޯޓު އެޅުމަށް ބޭނުންވާ ބިންހިއްކުމުގެ އަމަލީ މަސައްކަތް ފަށައިފިއެވެ.

ރާއްޖޭޓީވީއަށް މައުލޫމާތު ދެއްވަމުން ފަރެސްމާތޮޑާ ކައުންސިލްގެ ރައީސް ނަސްރުﷲ މުހައްމަދު ވިދާޅުވީ އެއާޕޯޓު އެޅުމަށް ބޭނުންވާ ބިން ހިއްކުމުގެ އަމަލީ މަސައްކަތް ހުކުރު ދުވަހު ފަށާފައިވާ ކަމަށާއި، އުންމީދު ކުރަނީ ބާރު ސްޕީޑްގައި މިމަޝްރޫއު ކުރިއަށް ގެންދެވި އަވަހަށް މަސައްކަތް ނިންމާނެ ކަމަށެވެ.

13.6 ހެކްޓަރުގެ ބިން ހިއްކުމަށް ނިންމާފައިވާއިރު ފަރެސްމާތޮޑާ ކައިރީގައި އޮންނަ ފަޅުރަށުގެ ފަޅުތެރެ ހިއްކާ މިދެރަށް ގުޅުވާލުމުގެ މަސައްކަތް ކުރަމުން އަންނަ ކަމަށް އެނާ ވިދާޅުވިއެވެ.

ގދ. އަތޮޅަކީ ދަތުރުކުރުމަށް އުނދަގޫ ހިސާބެއްކަން ފާހަގަކޮށް ނަސްރުﷲ ވިދާޅުވީ ފަރެސްމާތޮޑާގައި އެއާޕޯޓެއް އަޅުމަށް ރައީސް ޔާމިންގެ ސަރުކާރުން ނިންމެވީތީ އެކަމާއި އުފާކުރާ ކަމަށާއި، މިމަޝްރޫއުގެ ސަބަބުން އެރަށުގެ މެޖޯރިޓީ ތާއީދު ރައީސް ޔާމިނަށް ލިބޭނެ ކަމަށެވެ. އާބާދީގައި 2000 އަށް ވުރެ ގިނަ މީހުން ދިރިއުޅެމުން އަންނަ ފަރެސްމާތޮޑާގައި އެއާޕޯޓެއް އެޅިގެން ދިއުމަކީ އެރަށުގެ ރައްޔިތުން ނުހަނު ބޭނުންވާ ކަމެއް ކަމަށް ވެސް ނަސްރުﷲ ވިދާޅުވިއެވެ. 

ފަރެސްމާތޮޑާ އެއާޕޯޓަށް ބޭނުންވާ ބިންހިއްކުމާއި ގޮނޑުދޮށް ހިމާޔަތް ކުރުމުގެ މަސައްކަތް ތިން މަސްދުވަސް ތެރޭގައި ނިންމަންޖެހޭ ގޮތަށް ހަވާލުކުރީ ގަލްފް ކޮބްލާ ޓެންސާ ކުންފުންޏާ އެވެ. މިމަޝްރޫއަށް 2.5 މިލިއަން ޑޮލަރު ނުވަތަ 38 މިލިއަން ރުފިޔާ ހަރަދު ވާނެ އެވެ. ބިން ހިއްކާ ނިމުމާ އެކު އެއާޕޯޓްގެ ރަންވޭ ހެދުމަށް ބަޔަކާ ހަވާލުކުރާނެ ކަމަށް ވެސް ޓޫރިޒަމް މިނިސްޓްރީން ވަނީ ބުނެފައެވެ.