ރިޔާސީ އިންތިޚާބެއްގައި ޖުމްހޫރީ ޕާޓީން ޖެހިލާ ފަރާތަކަށް އެއިންތިޚާބު ކާމިޔާބުވާނެ: ޑރ ހުސެއިން
3 އޯގަސްޓު 2018 | ހުކުރު 18:12މިގައުމަށް އިސްލާހު ގެނައުމަށް ޖުމްހޫރީ ޕާޓީން ވަރަށް ބޮޑެތި ގުރުބާނީތަކެއް ވެފައި
ޑރ ހުސެއިން ރަޝީދު ވާހަކަ ދައްކަވަނީ
ރިޔާސީ އިންތިޚާބެއްގައި ޖުމްހޫރީ ޕާޓީން ޖެހިލާ ފަރާތަކަށް އެއިންތިޚާބު ކާމިޔާބުވާ ކަމަށް ޖުމްހޫރީ ޕާޓީ ހިންގެވުމާއި ވަގުތީ ގޮތުން ހަވާލުވެ ހުންނެވި އެޕާޓީގެ ޑެޕިއުޓީ ލީޑަރު ޑރ ހުސެއިން ރަޝީދު ހަސަން ވިދާޅުވެއްޖެއެވެ.
ޖުމްހޫރީ ޕާޓީގެ 10 ވަނަ އަހަރީ ދުވަހާއި ގުޅިގެން ހުކުރު ދުވަހުގެރޭ މ.ކުނޫޒްގައި ބޭއްވި ޚާއްސަ ޖަލްސާގައި ވާހަކަދައްކަވަމުން ޑރ ހުސެއިން ވިދާޅުވީ ޖުމްހޫރީ ޕާޓީއަކީ މިގައުމަށް އިސްލާހު ގެނައުމަށްޓަކައި ވަރަށް ބޮޑު ގުރުބާނީތަކެއް ވެފައިވާ އޮތް ޕާޓީއެއް ކަމަށެވެ.
އެގޮތުން ޖުމްހޫރީ ޕާޓީ އުފެދުމާއި ގުޅިގެން ފުރަތަމަ ބޭއްވި ރިޔާސީ އިންތިޚާބުގައި އެމްޑީޕީއާއެކު އިއްތިހާދު އެހެން ޕާޓީތަކާއި ގުޅިގެން ކުރި މަސައްކަތުން ރިޔާސީ އިންތިޚާބު ކާމިޔާބު ކުރެވިފައިވާ ކަމަށެވެ.
"އޭގެ ނަތިޖާއެއް ގޮތުން މިރާއްޖޭގައި ޑިމޮކްރަޓިކް ސަރުކާރެއް ފުރަތަމަ ފަހަރަށް ގާއިމް ވެގެން ދިޔަ. އަޅުގަނޑު ދެކޭ ގޮތުގައި އެއީ ޖުމްހޫރީ ޕާޓީއަށް ލިބިގެން ދިޔަ ބޮޑު ކާމިޔާބީއެއް. އޭގެ ފަހުން ކަންތައްތައް ވީގޮތުގެ ވާހަކަ ދައްކަން އޮތް މުނާސަބަތެއް ނޫން މިއިކީ" ޑރ ހުސެއިން ވިދާޅުވިއެވެ.
ޑރ ހުސެއިން ވިދާޅުވީ 2013 ވަނަ އަހަރު ބޭއްވި ރިޔާސީ އިންތިޚާބުގައި ރައީސް ޔާމިންގެ ސަރުކާރު ވެސް އުފެދިގެން ދިޔައީ ޖުމްހޫރީ ޕާޓީން ކުރި މަސައްކަތުގެ ސަބަބުން ކަމަށެވެ.
"އެކަމަށްޓަކައި ޖުމްހޫރީ ޕާޓީ އުފާކުރާ ވާހަކައެއް ނޫން ދަންނަވަން މިއުޅެނީއެއް. ދަންނަވަން މިއުޅެނީ ޖުމްހޫރީ ޕާޓީން. އެއިންތިޚާބެއްގައި ޖެހިލާ ފަރާތަކަށް ރިޔާސީ އިންތިޚާބު ކާމިޔާބުވެގެންދާތަން އޮތީ ފެނިފައި" ޑރ ހުސެއިން ވިދާޅުވިއެވެ.
ޑރ ހުސެއިން ވިދާޅުވީ މިއަހަރުގެ ރިޔާސީ އިންތިޚާބު ކާމިޔާބު ކުރުމަށް ޖުމްހޫރީ ޕާޓީން ކުރެވެން ހުރި ހުރިހާ މަސައްކަތްތަކެއް ކުރާނެ ކަމަށެވެ.
