ޒިމްބާބުވޭގެ އާއްމު އިންތިޚާބަށް ފަހު ހިނގި ހަމަނުޖެހުންތަކުގައި މަރުވި މީހުންގެ އަދަދު ހަޔަކަށް އަރައިފި
3 އޯގަސްޓު 2018 | ހުކުރު 07:11މަކަރު ހެދިކަމަށް ބުނެ އިދިކޮޅު ފަރާތްތަކުން ދަނީ ހަމަނުޖެހުން އުފައްދަމުން
ޒިމްބާބުވޭގެ ރައީސް އެމަސަން ނަންގަގްވާ
ޒިމްބާބުވޭގައި ރައީސަކު ހޮވުމަށާއި އަދި އެގަައުމުގެ ގާނޫނު ހަދާ މަޖިލީހަށް މެމްބަރުން ހޮވުމަށް ހޯމަ ދުވަހު ބޭއްވި އާއްމު އިންތީޚާބަށް ފަހު ހިނގައި ދިޔަ ހަމަނުޖެހުންތަކުގައި މަރުވި މީހުންގެ އަދަދު ހަޔަކަށް އަރާފައިވާ ކަމަށް ފުލުހުންނާ ހަވާލާދީ ރިޕޯޓުތައް ބުނެފިއެވެ.
ވަރަށް ވާދަވެރިކޮށް ދިޔަ އިންތިޚާބު ކާމިޔާބު ކުރެއްވީ އިދިކޮޅު ލީޑަރު ނެލްސަން ޗަމްސިއާ ކަމަށް އެމަނިކުފާނު ގެންދަވަނީ ވިދާޅުވަމުންނެވެ.
ބުދަ ދުވަހު އިލެކްޓޯރަލް އޮފިޝަލުން ހާމަކޮށްފައިވާ ގޮތުން، ގާނޫނު ހަދާ މަޖިލީހުގެ ވޯޓުގެ ތެރެއިން ބޮޑު އިން ސައްތައެއް ހޯދާފައި ވަނީ ވެރިކަން ކުރާ ޒާނޫ-ޕީއެފް ޕާޓީ އެވެ.
ޒިމްބާބުވޭގައި ހޯމަ ދުވަހު ބޭއްވި އާއްމު އިންތިޚާބަކީ ދިގު މުއްދަތެއް ވަންދެން ވެރިކަން ކުރެއްވި ރޮބާޓް މުގާބޭ މިދިޔަ އަހަރު ވެރިކަމުން ދުރުކުރި ފަހުން ބޭއްވި ފުރަތަމަ އިންތިޚާބެވެ. އެގައުމުގައި ވޯޓުލުމުގެ ހައްގު ލިބިފައިވާ 5 މިލިއަނަށް ވުރެ ގިނަ މީހުން ތިބި އިރު ވޯޓު ލާފައި ވަނީ 70 ޕަސެންޓް މީހުންނެވެ.
ޒިމްބާބުވޭގައި ދިގު މުއްދަތެއް ވަންދެން ވެރިކަން ކުރެއްވި މުގާބޭ އިސްތިއުފާ ދެއްވާފައިވަނީ އެމަނިކުފާނު ވަކިކުރުމުގެ މަސައްކަތް ގާނޫނު ހަދާ މަޖިލީހުން ފެށުމާ އެކު، ގާނޫނު ހަދާ މަޖިލީހަށް މިދިޔަ އަހަރުގެ ނޮވެމްބަރު މަހުގެ 21 ގައި ފޮނުއްވި ސިޓީފުޅެއް މެދުވެރިކުރައްވައެވެ.
ޒިމްބާބްވޭގެ ފުރަތަމަ ބޮޑުވަޒީރުގެ ގޮތުގައި އެގައުމުގެ ވެރިކަމާ މުގާބޭ ހަވާލުވެވަޑައިގެންފައި ވަނީ 1980 ވަނަ އަހަރުއެވެ. ބޮޑުވަޒީރުގެ މަގާމުގައި ހަތް އަހަރު ހުންނެވުމަށް ފަހު، ޒިމްބާބްވޭގެ ރައީސްގެ މަގާމާ މުގާބޭ ހަވާލުވެވަޑައިގެންނެވީ 1987 ވަނަ އަހަރުގެ ޑިސެމްބަރު މަހުގެ 22 ވަނަ ދުވަހުއެވެ.
