އަފްޣާނިސްތާނުގެ ރިޔާސީ އިންތިޚާބު އަންނަ އަހަރު އެޕްރީލް 20 ގައި
2 އޯގަސްޓު 2018 | ބުރާސްފަތި 06:49އެންމެ ފަހުން ރިޔާސީ އިންތިޚާބު ބާއްވާފައިވަނީ 2014ގައި
އެންމެ ފަހުން އަފްޣާނިސްތާނުގައި ބޭއްވި ރިޔާސީ އިންތިޚާބުގައި މީހަކު ވޯޓުލަނީ
އަފްޣާނިސްތާނުގެ ރިޔާސީ އިންތިޚާބު އަންނަ އަހަރުގެ އެޕްރީލް 20 ގައި ބާއްވާ ގޮތަށް ހަމަޖައްސައިފިއެވެ.
އެގައުމުގެ އިންތިޚާބާއި ބެހޭ އިދާރާއިން ހާމަކޮށްފައިވާ ގޮތުގައި ރިޔާސީ އިންތިޚާބު ބާއްވާ ދުވަސް އެޕްރީލް 20 އަށް ހެދީ މިއަހަރުގެ އޮކްޓޯބަރު މަހުގެ 20 ގައި ބާއްވާ ލޯކަލް އިންތިޚާބާއި ރައްޔިތުންގެ މަޖިލީހުގެ އިންތިޚާބަށްފަހު އެކަށީގެންވާ ވަގުތު ދިނުމަށެވެ. އަދި ރިޔާސީ އިންތިޚާބަށް ބޭނުންވާ ވަގުތާއި ހޭދަވާ ޚަރަދު ހަމަޖެއްސުމަށް ވަގުތު ބޭނުންވާކަމަށް އެގައުމުގެ އިލެކްޝަންސް ކޮމިޝަނުން ބުނެއެވެ.
އެހެންކަމުން އަފްޣާނުގައި ރިޔާސީ އިންތިޚާބު ބާއްވާނީ ލޯކަލް އަދި މަޖިލީސް އިންތިޚާބަށްފަހު 6 މަސް ފުރޭ ދުވަހުގައެވެ.
ރިޔާސީ އިންތިޚާބު އޮންނާނެ ދުވަސް އިއުލާންކޮށްފައިވާއިރު އަފްޣާނިސްތާނުގައި ވޯޓުލުމުގެ ހައްގު 15 މިލިއަނަށްވުރެ ގިނަ ކަމަށް އިލެކްޝަންސް ކޮމިޝަނުން ހާމަކުރެއެވެ.
އެންމެ ފަހުން އަފްޣާނިސްތާނުގައި ބޭއްވި ރިޔާސީ އިންތިޚާބު ކާމިޔާބު ކުރެއްވީ މިހާރު ވެރިކަމުގައި ހުންނެވި އަޝްރަފް އަބްދުލް ޣަނީއެވެ. އެ އިންތިޚާބު ބާއްވާފައިވަނީ 2014 ވަނަ އަހަރުއެވެ.
