ބާރަ މެމްބަރުން މިއަދު މަޖިލީހަށް ވަންނާނެ ކަމަށް ވިދާޅުވުމުން ބެރިކޭޑް ޖަހައި އެސަރަހައްދު ބަންދުކޮށް ގިނަ އަދަދެއްގެ ފުލުހުން އެސަރަހައްދުގައި ހަރަކާތްތެރިވާން ފަށައިފިއެވެ.

ރައްޔިތުންގެ މަޖިލީހުގެ ޖަލްސާ ފެށުމަށް ހަމަޖެހިފައި ވަނީ މިއަދު މެންދުރުފަހު 1:00 ގައެވެ. ނަމަވެސް 9:00 ހާއިރު ފުލުހުން ވަނީ އެ ސަރަހައްދު ބަންދުކޮށްފައެވެ.

ސަރުކާރު ހިންގާ ޕާޓީން ވަކިވެވަޑައިގެންނެވި އެ 12 މެމްބަރުން، ގުޅިފައިވާ އިދިކޮޅު ޕާޓީތަކާ އެކު މަސައްކަތް ކުރައްވަން ފެއްޓެވުމާ އެކު، އެ މެމްބަރުން މަޖިލީހުގެ ޖަލްސާތަކުގައި ބައިވެރި ކުރުން ހުއްޓުވާފައިވާތާ އަހަރަކަށް ވުރެ ގިނަ ދުވަސް ވަނީ ވެފައެވެ. 

ސުޕްރީމް ކޯޓުން ދާދި ފަހުން ވަނީ މިއަހަރުގެ ފެބްރުއަރީ މަހުގެ ފުރަތަމަ ދުވަހު އެ ކޯޓުގެ އޭރުގެ ބެންޗުން ނެރުނު އަމުރުގައި ހިމެނޭ 12 މެމްބަރުންގެ މައްސަލައިގައި ބައި ބާޠިލްކޮށްފައެވެ. އެ މެމްބަރުންނަށް މަޖިލީހަށް ވަދެވޭނެ ކަމަށް ސުޕްރީމް ކޯޓުން ނެރުނު އަމުރުގައިވާ ބައި މިހާރުގެ ބެންޗުން ބާޠިލްކޮށްފައި ވަނީ މެމްބަރުންގެ ގޮނޑީގެ މައްސަލައިގައި ހުށަހަޅާފައިވާ މައްސަލަތަކަށް ވަކިވަކިން ހުކުމް ކުރަން ޖެހޭ ކަމަށް ބުނެއެވެ.

ގޮނޑި ގެއްލިފައިވާ ކަމަށް މަޖިލީހުންނާއި ސަރުކާރުން ބުނާ 12 މެމްބަރުންނަކީ ދަނގެތީ ދާއިރާގެ އިލްހާމް އަހްމަދާއި މައްޗަންގޮޅީ ދެކުނު ދާއިރާގެ އަބްދުﷲ ސިނާނާއި، ދިއްދޫ ދާއިރާގެ އަބްދުއްލަތީފް މުހައްމަދާއި، ހަނިމާދޫ ދާއިރާގެ ހުސައިން ޝަހުދީ އާއި، އިހަވަންދޫ ދާއިރާގެ މުހައްމަދު އަބްދުﷲ (މުހައްމާ) އާއި، ތިނަދޫ އުތުރު ދާއިރާގެ ސައުދުﷲ ހިލްމީ އާއި، ތިނަދޫ ދެކުނު ދާއިރާގެ އަބްދުﷲ އަހްމަދު (އަބުޅޯ) އާއި، ތިމަރަފުށީ ދާއިރާގެ މުހައްމަދު މުސްތަފާ އާއި، ފުވައްމުލަކު އުތުރު ދާއިރާގެ އަލީ ޝާހުގެ އިތުރުން ތުލުސްދޫ ދާއިރާގެ މުހައްމަދު ވަހީދު (ލޯޔަރު ވައްޑެ) އާއި ވިލިނގިލީ ދާއިރާގެ ސައުދު ހުސައިންގެ އިތުރުން މަޑުއްވަރީ ދާއިރާގެ މުހައްމަދު އަމީތެވެ.