ހިތްވަރުދިނުމުގެ އިނާމު ހޯދަން އަމިއްލައަށް ހުށަހަޅަން ޖެހޭނެ ކަމަށް ޤަބޫލެއް ނުކުރަން: ރިޝްމީ
ރިޝްމީ ދެކޭ ގޮތުގައި ރާއްޖެއަށް ރީތި ނަން ހޯދައިދިނުމުން ދޭ އިނާމަކީ އަމިއްލައަށް އެދިގެން ހޯދަން ޖެހޭ އެއްޗެއް ނޫން
ފިލްމީ ތަރި އައިޝަތު ރިޝްމީ
ރާއްޖެ އަށް ރީތިނަން ހޯދުމުން ރައީސުލް ޖުމްހޫރިއްޔާ ދެއްވާ ހިތްވަރުދިނުމުގެ އިނާމު ހޯދުމަށް އަމިއްލައަށް ނަން ހުށަހަޅަން ޖެހޭނެ ކަމަށް ގަބޫލު ނުކުރާ ކަމަށް ސައުތު އޭޝިއަން އެސޯސިއޭޝަން ފޯ ރީޖަނަލް ކޯޕަރޭޝަން(ސާކް) ގެ އެންމެ މޮޅު ބަތަލާ އަކަށް ހޮވުނު ދިވެހި ފިލްމީ ތަރި އައިޝަތު ރިޝްމީ ބުނެފިއެވެ.
އަންގާރަ ދުވަހު ރިޝްމީ އޭނާގެ ފޭސްބުކް ޕޭޖްގައި ލިޔެފައިވަނީ ރާއްޖެއަށް ރީތި ނަން ހޯދުމުން ރައީސުލް ޖުމްހޫރިއްޔާ ދެއްވާ އިނާމަކީ ރާއްޖެއަށް ރީތި ނަން ހޯދާ ކޮންމެ ފަރާތަކަށް ހައްގު އެއްޗެއް ކަމަށެވެ. އެހެން ކަމުން މި އިނާމު ހޯދުމަށް އެދި އަމިއްލައަށް ނަން ހުށަހަޅަން ޖެހޭނެ ކަމަށް އޭނާ ގަބޫލު ނުކުރާ ކަމަށެވެ.
މައުލޫމާތު ލިބިފައިވާ ގޮތުގައި ރައީސުލް ޖުމްހޫރިއްޔާ ދެއްވާ ހިތްވަރު ދިނުމުގެ އިނާމަށް ނަން ހުށަހަޅަން ޖެހެނީ އަމިއްލަ އަށް ކަމަށް އެނގިފައިވާ ކަމަށް ރިޝްމީ ވަނީ ބުނެފައެވެ.
"ފިލްމީ ދާއިރާގެ ބެލެނިވެރި މުއައްސަސާއަކީ އެންސީއޭ، އަދި ޔޫތް މިނިސްޓްރީ ކަމަށް ވާއިރު، އެފަރާތްތަކުން ވަނީ ގައުމީ ފިލްމް އެވޯޑްގައި ސާކް ފިލްމް ފެސްޓިވަލް އިން ދިން އެވޯޑްގެ އަގު ވަޒަންކޮށް ހަނދާނީ ފިލައެއް ދިން. އެހެން ވީމާ ރައީސުލް ޖުމްހޫރިއްޔާ ދެއްވާ ރާއްޖެއަށް ރީތިނަން ހޯދާ ފަރާތްތަކަށް ދެއްވާ ޝަރަފާއި އިނާމަކީ އެފަރާތުން ދެއްވާ އެއްޗެއް ކަމަށް ގަބޫލުކުރެވެނީ. އެއީ އަމިއްލައަށް އެދިގެން ހޯދަން ޖެހޭނެ އެއްޗެއް ކަމަކަށް ބުއްދި ގަބޫލެއް ނުކުރޭ" ރިޝްމީގެ އެފްބީ ޕޯސްޓްގައި ވެއެވެ.
އަދި އެންސީއޭއިން މި އިނާމަށް ނަން ހުށަހެޅުމަށް އެންގުމުން އެކަމަށް އޭނާ އިހުމާލްވީ ވާހަކަ އެއީ ދޮގު މައުލޫމާތެއް ކަމަށް ރިޝްމީ ވަނީ ބުނެފައެވެ. ރިޝްމީ ބުނީ އެންސީއޭ އަކުން ވެސް އަދި އެހެން ފަރާތަކުން ވެސް އެ އިނާމަށް ނަން ހުށަހަޅަން ޖެހޭ ކަމަށް އަންގާފައި ނުވާ ކަމަށެވެ.
ރިޝްމީއަށް އެންމެ މޮޅު ބަތަލާގެ އެވޯޑު ލިބުނީ މިއަހަރުގެ ސާކް ފިލްމު ފެސްޓިވަލްގައި އޭނާގެ ފިލްމު "ވިޝްކާ" އިންނެވެ. މި ފިލްމު ޕްރޮޑިއުސްކޮށްފައި ވަނީ ވެސް ރިޝްމީއެވެ.
