އިތުރު ދެ ރިސޯޓެއްގައި ވޯޓު ފޮށި ބެހެއްޓުމަށް އިލެކްޝަންސް ކޮމިޝަނުން ނިންމައިފިއެވެ.

އިލެކްޝަންސް ކޮމިޝަނުން ވަނީ މީގެ ކުރިން 42 ރިސޯޓެއްގައި ވޯޓު ފޮށި ބަހައްޓާނެ ކަން ހާމަ ކޮށްފައެވެ. މިދެ ރިސޯޓާއެކު ޖުމްލަ 44 ރިސޯޓެއްގައި ވޯޓުފޮށި ބެހެއްޓިގެންދާނެ އެވެ.

އަލަށް ވޯޓު ފޮށި ބެހެއްޓުމަށް ކަނޑައަޅާފައިވަނީ ދިގަލި މޯލްޑިވްސް އާއި އޮބްލޫ ބައި އެޓްމޮސްފިއަރ އެޓް ހެލެނގެލި ރިސޯޓެވެ.

ރިޔާސީ އިންތިޚާބު 2018 ގައި ވޯޓުފޮށި ބެހެއްޓުމަށް ހަމަޖައްސާފައިވާ ރިސޯޓުތަކުގެ ތެރެއިން އެ ރިސޯޓްތަކުގައި ވޯޓުފޮށި ބަހައްޓާނީ ރަށްވެހިވެފައިވާ ތަންނޫން އެހެން ތަނެއްގައި ވޯޓުލުމަށް ރީ-ރަޖިސްޓަރީ ކުރުމަށް އިލެކްޝަންސް ކޮމިޝަނުން ހުޅުވާލާ މުއްދަތުގެ ތެރޭގައި އެއިން ރިސޯޓެއްގައި ވޯޓުލުމަށް މަދުވެގެން 100 (ސަތޭކަ) މީހުން ރަޖިސްޓަރީވެފައިވާ ނަމައެވެ

އެންމެ ފުރަތަމަ އިލެކްޝަންސް ކޮމިޝަނުން އިއުލާނުކުރީ ހަތް ރިސޯޓެއްގައި ވޯޓުފޮށި ބެހެއްޓުމަށެވެ. އެހެން ނަމަވެސް ގިނަ ރިސޯޓު މުވައްޒަފުންގެ ޝަކުވާއާއި ގުޅިގެން އެ ނިންމުން ވަނީ ބަދަލު ކޮށްފައެވެ.

ރާއްޖޭގައި 132 ރިސޯޓްގައި އޮޕަރޭޝަން ހިންގަމުންދާއިރު 70 އަށް ވުރެ ގިނަ ރިސޯޓުގައި ވޯޓުފޮށި ބަހައްޓަން އެރިސޯޓުތަކުން ބޭނުން ނުވާ ކަމަށް އަންގާފައިވާ ކަމަށް އިލެކްޝަންސް ކޮމިޝަނުން ބުނެއެވެ. އެރިސޯޓުތަކުގެ ނަންތައް ހާމަކުރައްވާނެ ކަމަށް އެކޮމިޝަނުން ބުނެފައިވާ އިރު މިހާތަނަށް އެ ރިސޯޓުތަކުގެ މައުލޫމާތެއް ހާމައެއް ނުކުރެއެވެ.

މިދިޔަ ރިޔާސީ އިންތިހާބުގައި 40 ރިސޯޓުގައި ވޯޓުފޮށި ވަނީ ބަހައްޓާފައެވެ. މިއަހަރުގެ ރިޔާސީ އިންތިހާބުގައި 480 އަށް ވުރެ ވޯޓު ފޮށި ބެހެއްޓުމަށް ވަނީ ހަމަޖެހިފައެވެ.