ރައީސް ޓްރަމްޕްގެ އައި ފޯނުގައި އެންމެ އެޕެއް!!!

އައިފޯނު ގެންގުޅޭ މިހުންނަށް އެޕަލް އެފް ސްޓޯރ ގައި އެތައް އެތައް ބާވަތެއްގެ އެޕްތައް ހުންނަކަން އެނގޭނެއެވެ. އެޕަލް އެޕް ސްޓޯރ ގައި ދެ މިލިއަނަށް ވުރެ ގިނަ އެޕް ހުރެއެވެ. އެކަމަކު ދުނިޔޭގެ އެންމެ ކުރިއަރާފައިވާ ކަމަށް ބުނާ އަދި އެޕަލް ކުންފުނި އެ ގައުމަކަށް ނިސްބަތްވާ އެމެރިކާގެ ރައީސް ޑޮނަލްޑް ޓްރަމްޕްގެ އައި ފޯނުގައި ވަނީ ހަމަ އެންމެ އެޕެކެވެ.

ވައިޓް ހައުސްގެ އިސް އޮފިޝަލަކާ ހަވާލާދީ ޓެކްނޮލޮޖީގެ ޚަބަރުތައް ގެނެސްދޭ މަޝްހޫރު ނޫހެއް ކަމަށްވާ އެކްސިއޯސްގައި ބުނެފައިވަނީ، ރައީސް ޓްރަމްޕްގެ އައިފޯނުން ހުރިހާ އެޕެއް ވަނީ ފޮހެލާފައި ކަމަށާއި އެ ފޯނުގައި ވަނީ ހަމަ އެކަނި ޓުވިޓަރ އެޕް ކަމަށެވެ.

ނަމަވެސް ހަމައެކަނި ޓްވިޓަރ ރައީސް ޓްރަމްޕްގެ ފޯނުގައި ވާ ސަބަބެއް ވައިޓް ހައުސް އޮފިޝަލުންނަކަށްވެސް އެނގިފައެއް ނެތެވެ.

ޚަބަރުތަކުގައި ރައީސް ޓްރަމްޕްގެ ސިޔާސަތުތަކާ ބެހޭ ގޮތުން އަންނަ ވާހަކަތަކަށް ޓްވިޓަރ މެދުވެރިކޮށް ހޫނު، އަވަސް ރައްދު ދެއްވުމަށް މަޝްހޫރު ރައީސް ޓްރަމްޕް، ވެރިކަމަށް ވަޑައިގެންނެވި އިރު ބޭނުންފުޅު ކުރައްވަނީ އެންޑްރޮއިޑް ފޯނެކެވެ. ނަމަވެސް ވައިޓް ހައުސްގެ އޮފިޝަލުން ބުނެފައިވަނީ މަގާމާ ހަވާލުވެ ވަޑައިގަތުމާއެކު އައި ފޯނަކަށް ބަދަލު ކޮށްލެއްވި ކަމަށެވެ. ރައީސް ޓްރަމްޕް ކުރައްވާ ޓްވީޓް ތަކަށް ބަލާލުމުންވެސް އެއީ އައިފޯނަކުން ކުރައްވާ ޓްވީޓްކަން އެނގެއެވެ.

އާއްމު ގޮތެއްގައި އައިފޯނެއް ފުރަތަމަ ބޭނުން ކުރަން ފަށާއިރުވެސް އޭގައި އެޕްތައް ހުރެއެވެ. ނަމަވެސް ރައީސް ޓްރަމްޕް ބޭނުން ކުރައްވާ އައިފޯނު މޮޑިފައިކޮށް އޭގައި ހުރި ހުރިހާ އެޕްތަކެއް ފުހެލުމުގެ ފަހަތުގައި އެތައް ސަބަބުތަކެއް ވުމީ އެކަށީގެންވާ ކަމެކެވެ. އެއް ކަމަކީ، އެޕްތަކުގެ ޒަރީއާއިން ރައީސް ޓްރަމްޕްގެ ފޯނު ހެކް ކޮށް ފޯނުން މުހިންމު ސިއްރު މައުލޫމާތު ހެކަރުން ހޯދުމުގެ ފުރުސަތު ކުޑަކުރުމެވެ.

ރައީސް ޓްރަމްޕް ފާހަގަވެފައިވަނީ ވެރިކަމަށް ވަޑައިގަތުމުގެ ކުރިންވެސް އަދި ފަހުންވެސް އެމަނިކުފާނުގެ ސިޔާސަތުތަކާއި ކަންކަމާ ދެކެވަޑައިގަންނަވާ ގޮތް ހާމަކުރެއްވުމަށް ޓްވިޓަރަކީ އެންމެ ރަނގަޅު ޕްލެޓްފޯމު ކަމަށް ގަބޫލުފުޅު ކުރައްވާ ބޭފުޅެއްގެ ގޮތުގައެވެ. އެހެން ކަމުން ރައީސް ޓްރަމްޕްގެ ފޯނުގައި ވާ ހަމައެކަނި އެޕަކީ ޓްވިޓަރ ކަމަށް ވުމީ އެއް ގޮތަކުން ބަލާއިރު މާ ބޮޑަށް ހައިރާންވާންވީ ކަމެއްވެސް ނޫނެވެ.