އަޅުގަނޑުމެންގެ މީހަކު ރީ ރަޖިސްޓްރީ ކުރަން އެހެން ބައެއްގެ އަތަށް ފޯމް ދީފިނަމަ އިލެކްޝަނަށް ހުށައެއްނާޅާނެ: ރައީސް ޔާމިން
26 ޖުލައި 2018 | ބުރާސްފަތި 18:53ޕީޕީއެމްގެ މީހެއްގެ ފޯމެއް އެހެން މީހަކު ފުރައިފި ނަމަ ދެ ފަހަރަށް ފުރަން ޖެހޭނެ ކަމަށް ވިދާޅުވޭ
ރައީސް ޔާމިންގެ ދެ ކަނބަލުން ޕީޕީއެެމްގެ ޖަގަހައެއްގައި ތިިބި މީހުންނާ ބައްދަލު ކުރައްވަނީ
އެމަނިކުފާނަށް ތާއިދުކުރާ މީހުން މިއަހަރުގެ ރިޔާސީ އިންތިހާބުގައި ވޯޓުލުމަށް ރީ ރަޖިސްޓްރީ ކުރުމަށް އެދި ފުރާ ފޯމް ޕީޕީއެމް ނޫން އެހެން ޕާޓީ މީހެއްގެ އަތަށް ލިބިއްޖެނަމަ އެ ފޯމް އިލެކްޝަންސް ކޮމިޝަނަށް ހުށަނާޅުއްވާނެ ކަމަށް ރައީސް އަބްދުﷲ ޔާމިން ވިދާޅުވެއްޖެ އެވެ.
ރީ ރަޖިސްޓްރީ ކުރުމާ ގުޅޭ ގޮތުން ރައީސް އަބްދުﷲ ޔާމިނާއި އެމަނިކުފާނުގެ އަނބިކަނބަލުން ފާތިމަތު އިބްރާހިމް ދީދީ ޕީޕީއެމްގެ ޖަގަހައަކަށް ވަޑައިގެން ޕާޓީގެ މެމްބަރުންނާ ދެއްކި ވާހަކަފުޅެއް މިހާރު ވަނީ އާންމުވެފަ އެވެ. އެ ތަނުގައި ރައީސް ވިދާޅުވީ އެމްޑީޕީ މީހެއްގެ ފޯމެއް އެ ޕާޓީއަށް ލިބުނު ނަމަވެސް އިލެކްޝަނަށް ހުށައަޅާނެ ކަމަށާއި އެހެން ނަމަވެސް އެހެން ބަޔަކު އެ ޕާޓީގެ މެމްބަރެއްގެ ފޯމް އިލެކްޝަނަށް ހުށަނާޅާނެ ކަމަށެވެ. އެހެންކަމުން އެ ބޭފުޅުންގެ މީހަކު އެމްޑީޕީ މެދުވެރިކޮށް ފޯމް ހުށައަޅައިފިނަމަ ދެ ފަހަރަށް ފުރަން ޖެހޭނެ ކަމަށް ވެސް ރައީސް އެމީހުންގެ ގާތު ވިދާޅުވެ އެވެ.
"މީގައި ދެން ބޮޑަށް މި ބަލަން ޖެހެނީ އަޅުގަނޑުމެނަށް ވޯޓުލާ މީހުން އެމްޑީޕީ ނޫނީ އެހެން ބަޔަކު ފުރާތޯ. އެ ފުރައިފިއްޔާ އިލެކްޝަނަށް ހުށައެއް ނަޅާނެއެއްނު ދޯ. އެހެން ވެއްޖެއްޔާ ގެއްލޭ ވޯޓުތަކެއްނު އެއީ ދޯ. އަހަރަމެން ޕާޓީ ނޫން ބަޔަކު ފުރުވައިފިއްޔާ ޖެހޭނެ ދެ ވަނަ ފަހަރަށް އެމީހުން ލައްވާ ފުރުވަން،" ރައީސް ޔާމިން ވިދާޅުވި އެވެ.
އެމްޑީޕީގެ މީހުންގެ ތެރެއިން ރީ ރަޖިސްޓްރީ ކުރަން ޕީޕީއެމްއަށް ފޯމް ހުށައަޅާފައި ވަނީ ވަރަށް މަދު މީހުން ކަމަށް ރީ ރަޖިސްޓްރީ ކުރުމަށް ޕީޕީއެމްގެ ފަރާތުން މަސައްކަތްކުރާ މީހަކު ރައީސަށް ދަންނަވަ އެވެ. އަދި އެއާކު ރައީސްގެ އަނބިކަނބަލުން ފާތިމަތު އިބްރާހިމް އެހެންތާ އޭ ވާނީ މިވީޑިއޯގައި ވިދާޅުވެ އެވެ.
އަދި ސަރުކާރުގެ ކުންފުނިތަކާއި ސަރުކާރުގެ އޮފީސްތަކުގައި މަސައްކަތްކުރާ މުވައްޒަފުންގެ ފޯމްތައް އެ ޕާޓީއަށް އަންނާނެ ކަމަށާއި އެހެން ނަމަވެސް އޭގެ ތެރޭގައި އެމްޑީޕީގެ މީހުންގެ ފޯމްތައް ވެސް ހިމެނޭނެ ކަމަށް ފާތިމަތު އިބްރާހިމް ވިދާޅުވުމުން ރައީސް ޔާމިން ވިދާޅުވީ އެއީ މައްސަލައެއް ނޫން ކަމަށާއި އެ ފޯމްތައް ވެސް އިލެކްޝަނަށް ހުށައަޅާނެ ކަމަށެވެ.
މީގެ އިތުރުންވެސް ރީ ރަޖިސްޓްރީ ފޯމް ފުރަން ދާ މީހުންނަކީ ކޮން ޕާޓީއެއްގެ މީހުންކަން އެ ގޭގެ މީހުނަށް އެނގޭނެ ތޯ ވެސް ޕީޕީއެމްގެ ޖަގަހައިގައި މަސައްކަތް ކުރާ އެމީހުންގެ ގާތުން ރައީސް ސާފު ކުރެއްވުމުން އެމީހުން ބުނީ އެ ކާކުކަން އެނގޭނެ ކަމަށެވެ. އަދި އެހެނިހެން މައުލޫމާތުތައް ވެސް ރައީސް އެމީހުންގެ ގާތުން އޮޅުންފިލުއްވަ އެވެ.
