ރައީސްއަށް މެސެޖު ނުކުރެއްވުމަށް ވިދާޅުވީ ހާލަތާއި ގުޅުވައިގެން، މިހާރު ރައީސްއަށް މެސެޖު ކުރަން ރައްޔިތުންނަށް ހުރަހެއް ނޯންނާނެ: މުއާޒު
ރިޔާސީ އިންތިހާބާ ދިމާކޮށް އެ ޓްވީޓާއި ހަބަރުގެ ސްކްރީންޝޮޓު ދައުރު ކުރަމުން އަންނަނީ އާންމުންނަށް ހަގީގަތް އޮޅުވާލަން
ރައީސް އޮފީހުގެ ތަރުޖަމާނު އިބްރާހިމް މުއާޒް އަލީ
ރައީސް ޔާމީނަށް މެސެޖް ނުކުރެއްވުމަށް ކުރިން ވިދާޅުވީ ހާލަތާއި ގުޅުވައިގެން ކަމަށާއި އެހެން ނަމަވެސް މިހާރު އެމަނިކުފާނަށް މެސެޖް ކުރަން ރައްޔިތުންނަށް ހުރަހެއް ނޯންނާނެ ކަމަށް ރައީސް އޮފީހުގެ ތަރުޖަމާނު އިބްރާހިމް މުއާޒު އަލީ ވިދާޅުވެއްޖެއެވެ.
މުއާޒު މިއަދު ކުރެއްވި ޓްވީޓް ތަކެއްގައި ވިދާޅުވީ ސޯޝަލް މީޑިއާގައި ރައީސް އަށް މެސެޖް ނުކުރެއްވުމަށް ކަމަށްބުނެ ފަތުރަމުންދާ ސްކްރީންޝޮޓަކީ 1 ފެބްރުއަރީގެ އަމުރާއި ގުޅޭގޮތުން އޭރު އޭނާ ކުރި ޓްވީޓެއްގެ ސްކްރީންޝޮޓް ކަމަށެވެ. އަދި އެއީ ހާލަތާ ގުޅޭ ގޮތުން ކޮށްފައިވާ ޓްވީޓެއް ކަމަށާއި ނަމަވެސް އެ ހާލަތު ނެތިގޮސް ރައީސް އާ އާންމުންނާ ދެމެދު މުއާމަލާތް ކުރުމުގައި އެއްވެސް ހުރަހެއް ނެތް ކަމަށެވެ.
މުއާޒު ވިދާޅުވީ ރިޔާސީ އިންތިހާބާ ދިމާކޮށް އެ ޓްވީޓާއި ހަބަރުގެ ސްކްރީންޝޮޓު ދައުރު ކުރަމުން އަންނަނީ އާންމުންނަށް ހަގީގަތް އޮޅުވާލަން ކަމަށާއި ކޮންމެ ރައްޔިތަކަށް ވެސް މެސެޖުގެ ޒަރިއްޔާއިން ރައީސް ޔާމީންއާ މުއާމަލާތް ކުރުމަށް ހުރަހެއް ނޯންނާނެ ކަމަށެވެ.
ފެބްރުއަރީ 5 ވަނަ ދުވަހު މުއާޒު ކުރެއްވި ޓްވީޓުގައި ވިދާޅުވީ އެވަގުތަކީ ނުހަނު މުހިއްމު މަސައްކަތްތަކެއް ކުރައްވަމުން ގެންދަވާ ވަގުތެއް ކަމުން، އެދުވަސްވަރު ރައީސް ޔާމީނަށް މެސެޖްކޮށް ނުހެދުމަށް ސަޕޯޓަރުންނާއި ރައްޔިތުންގެ ކިބައިން އިހުތިރާމާ އެކު އެދިވަޑައިގަންނަވާ ކަމަށެވެ.
މީގެ ކުރިން ރައީސް ޔާމީންވެސް ވަނީ އެމަނިކުފާނަށް ދިގު މެސެޖްތައް ނުކުރުމަށް ވެސް ރައްޔިތުންގެ ކިބައިން އެދިވަޑައިގެންފައެވެ.
