ސަރުކާރުން ލޫޓުވާފައިވާ މުދާތައް ހޯދޭނީ އިބޫއަށް: ޖަމީލު
ރާއްޖެ އަނބުރާ ހޯދުމަށް އިބޫއަށް ވޯޓު ދިނުމަށް ޖަމީލު ގޮވާލެއްވި
މުހައްމަދު ޖަމީލު އަހުމަދު (ކ) އަދި އިބްރާހިމް މުހައްމަދު ސޯލިހު
ވޭތުވެދިޔަ ފަސް އަހަރުގެ ތެރޭގައި ރާއްޖޭގެ މުދާތައް ވަނީ ލަދެއް ނެތި ލޫޓުވާފައި ކަމަށާއި އެކަންތައްތަކަށް އިންސާފު ހޯދޭނީ އެމްޑީޕީގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހުއަށް (އިބޫ) ކަމަށް މިސަރުކާރުގެ އިންތިޚާބީ ނާއިބު ރައީސް މުހައްމަދު ޖަމީލު އަހުމަދު ވިދާޅުވެއްޖެއެވެ.
މިހާރު ޖުމްހޫރީ ޕާޓީގެ ލީޑަރ ގާސިމް އިބްރާހިމްގެ އެޑްވައިޒަރެއްގެ ގޮތުގައި ހުންނެވި ޖަމީލު ބުދަ ދުވަހު ކޮށްފައިވާ ޓްވީޓެއްގައި ވިދާޅުވީ މިސަރުކާރުން ވަގަށް ނަގާފައިވާ އެތައް މިލިއަން ރުފިޔާއެއް އަނބުރާ ހޯދައިދިނުމަށް އިބޫއަށް ވޯޓުދޭން ޖެހޭ ކަމަށެވެ. އަދި އިބޫއަކީ އިތުބާރު ކުރެވޭ ލީޑަރެއް ކަމަށް ޖަމީލު ވިދާޅުވިއެވެ.
އެހެންކަމުން ރާއްޖެ އަނބުރާ ހޯދުމަށް އިބޫއަށް ވޯޓު ދިނުމަށް ޖަމީލު ގޮވާލެއްވިއެވެ.
ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓެއްގެ ގޮތުގައި އިބޫއާ އެކު ރިޔާސީ އިންތިހާބުގައި ނުކުންނަ ރަނިންމޭޓަކީ ޖުމްހޫރީ ޕާޓީގެ މެމްބަރު ފައިސަލް ނަސީމެވެ. ރިޔާސީ އިންތިޚާބުގެ ވޯޓުލުން އޮންނާނީ އަންނަ ސެޕްޓެމްބަރު މަހުގެ 23 ގައެވެ.
