މިރާއްޖެ ސަލާމަތް ކުރަން ބޭނުން ނަމަ މިވަގުތު އެންމެ މުހިއްމު ކަމަކީ ރީ ރަޖިސްޓަރ ކުރުން: މާރިޔާ
24 ޖުލައި 2018 | އަންގާރަ 10:47އޮގަސްޓް 11 އަށް މަޑުނުކޮށް އަވަހަށް ރީ ރަޖިސްޓްރީ ކުރައްވާ
ގުޅިފައިވާ ޕާޓީތަކުގެ ކެންޑިޑޭޓް އިބޫގެ ތަރުޖަމާން މާރިޔާ
ރާއްޖެ މިހާރު މިއޮތް ހާލަތުން ސަލާމަތްވެ މިއަނިޔާވެރިކަމުން ސަލާމަތްވާން ގިނަ ބަޔަކު ބޭނުންވާ ކަމަށާއި އެކަން ކުރަން ބޭނުންވާ ފަރާތްތަކުން މިވަގުތައް ކުރުން އެންމެ މުހިއްމު ކަމަކީ ރީރަޖިސްޓަރ ކުރުން ކަމަށް ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހީމް މުހައްމަދު ސޯލިހްގެ ތަރުޖަމާން މާރިޔާ އަހުމަދު ދީދީ ވިދާޅުވެއްޖެއެވެ.
ސޯލްޓް ކެފޭގައި އަންގާރަ ދުވަހު ބޭއްވި ޕްރެސް ކޮންފަރެންސެއްގައި މާރިޔާ ވިދާޅުވީ ވޯޓުލާ ދުވަހު ހުންނާނެ ތަނެއް ވިސްނެވުމަށް ފަހު، އެންމެ ފަހު ދުވަހަކީ އޮގަސްޓް 11 ކަމަށް އޮތް ނަމަވެސް އެދުވަހަށް މަޑުނުކޮށް ވީހާވެސް އަވަހަކަށް ރީ ރަޖިސްޓަރ ކުރުން ވަރަށް މުހިއްމު ކަމަށެވެ.
މައްޗަންގޮޅި ދެކުނު ދާއިރާގެ ރައްޔިތުންގެ މަޖިލީހުގެ މެންބަރުކަން ވެސް ކުރައްވާ މާރިޔާ ވިދާޅުވީ ސިވިލް ސަރވިސް އާއި ސަރުކާރު ހިއްސާވާ ކުންފުނިތަކުގެ ބޭފުޅުން އެމީހުން ލައްވާ ރީރަޖިސްޓަރ ކުރަމުންދާތީ އެވާހަކަ ދައްކަމުންދާ ކަމަށާއި ގާތްގަނޑަކަށް 98 ޕަސެންޓް މީހުން މިކަމުން ސަލާމަތްވާން ބޭނުންވާ ކަމަށެވެ. އެހެން ކަމަށް ވާނަމަ މިވަގުތަށް އެންމެ މުހިއްމު ކަމަކީ ރީރަޖިސްޓަރ ކުރުން ކަމަށް މާރިޔާ ވިދާޅުވިއެވެ.
"98 ޕަސެންޓް ބޭފުޅުންނަކީ ދައްކާ ބިރުވެރިކަމާއި އަޅުވެތިކަމުން ސަލާމަތްވާން ބޭނުންފުޅުވާ ބޭފުޅުން. ތިޔަބޭފުޅުން އަމިއްލައަށް އަޅުގަނޑުމެން ކައިރީ ވިދާޅުވެފައި އެބަހުރި އެމްޑީޕީގެ ސަރުކާރުގައި ބޭނުންފުޅު ދިމާއަކަށް ވަޑައިގެން ޖަލްސާތަކުގައި ބައިވެރިވެވަޑައިގެންނެވުނު ވާހަކަ. އެކަމަކު މިއަދު ކަންކަން އޮތްގޮތާ ވެރިން ގެންދަވައިގެން އެދައްވާ އިންޒާރުތަކުގެ ވާހަކަ. އެހެންވީމާ މިކަމުން ސަލާމަތްވާން ވެސް އިބޫއަށް ވޯޓް ދެއްވަން ޖެހޭ،" މާރިޔާ ވިދާޅުވިއެވެ.
ވޯޓަރސް ލިސްޓްގައި ފޮޓޯ ޖަހަން ޖެހޭ ގޮތަށް އޮތް އޮތުން ބަދަލު ކުރުމަށް އިޝާރާތް ކުރައްވައި މާރިޔާ ވިދާޅުވީ ވޯޓާސް ލިސްޓްގައި ފޮޓޯ ޖަހާ ގޮތަށް އިލެކްޝަންސް ކޮމިޝަނުން ގަވާއިދު ގެޒެޓްކުރީ ގިނަ ރައްޔިތުން އެދެނީ އެގޮތަށް ކަމަށް ކޮމިޝަނުން ވެސް ގަބޫލުކުރާތީ ކަމަށެވެ. ނަމަވެސް ފަހުން އެއީ އޮޅުމެއް ކަމަށް ބުނެ ގަވާއިދު އިސްލާހު ކުރީ ކޮމިޝަނަށް ރައީސް ޔާމީންގެ ސިޔާސީ ނުފޫޒު ފޯރުވައިގެން ކަމަށާއި އިލެކްޝަންސް ކޮމިޝަންގައި މިހާރު ތިއްބެވި މެންބަރުންނަކީ މިނިވަންކަމާ އެކު މަސައްކަތް ކުރައްވާ ބޭފުޅުން ނޫން ކަމަށެވެ.
"އަނެއްކާ ވެސް އޮޅިގެންނޭ ވިދާޅުވެ ބަދަލުކުރެއްވި ކުރެއްވުން އަނބުރާ ގެންދަވައި ރަނގަޅު ގޮތުގައި ކުރިއަށް ގެންދެވުމަށް އިލެކްޝަނަށް ދަންނަވާލަން" މާރިޔާ ވިދާޅުވިއެވެ.
