ރާއްޖެ އައި ފަސިންޖަރުންގެ ފޮށިތަންމަތި ބަލައިފާސްކުރުމުގެ ތެރޭގައި ތިން ފަހަރެއްގެ މަތީން 8.28 ކިލޯގެ މަސްތުވާތަކެތި ކަސްޓަމްސް އިން އަތުލައިގެންފިއެވެ.

ކަސްޓަމްސުން ނެރުނު ބަޔާނެއްގައި ބުނެފައި ވަނީ ފުރަތަމަ ކޭސްގައި ޖުލައި 18 ވަނަ ދުވަހު ބަންގްލަދޭޝްގެ ޑާކާ އިން ރާއްޖެ އައި އުމުރުން 30 އަހަރުގެ ބަނގުލަދޭސް މީހެއްގެ ޢަމަލުތައް ހުރި ގޮތުން އޭނާއާ މެދު ޝައްކުކުރެވިގެން އިތުރަށް ބަލައި ފާސްކުރުމުގެ ތެރޭގައި އޭނާގެ ލަގެޖުގެ ތެރެއިން މަސްތުވާތަކެތި ކަމަށް ޝައްކުކުރެވޭ ތަކެތި ރައްކާކޮށްފައި ހުރި ހަތަރު ޕާރުސަލް ފެނިފައިވާ ކަމަށެވެ. އެ ތަކެތި ތަހުލީލު ކުރި އިރު މަސްތުވާތަކެތީގެ ބާވަތެއް ކަމަށްވާ ކެނަބިސްއަށް ޕޮޒިޓިވް ވެފައިވާއިރު، އަތުލައިގަނެވުނު މަސްތުވާތަކެތީގެ ބަރުދަނުގައި 5.46 ކިލޯ ހުރި ކަމަށް ވެސް ކަސްޓަމްސުން ބުންޏެވެ.

މީގެ އިތުރުން ދޯހާ މަގުން ޓެންޒޭނިއާ އިން ރާއްޖެ އައި އުމުރުން 23 އަހަރުގެ ޓެންޒޭނިޔާ އަންހެނެއްގެ އަތުން ވެސް މަސްތުވާތަކެތި ފެނިފައިވާ ކަމަށް ކަސްޓަމްސް އިން ބުންޏެވެ. ޖުލައި 19 ވަނަ ދުވަހު ރާއްޖެ އައި އެމީހާގެ ލަގެޖް ބަލައި ފާސްކުރުމުގެ ތެރޭގައި މަސްތުވާތަކެތި ކަމަށް ޝައްކުކުރެވޭ ތަކެތި ރައްކާކޮށްފައި ހުއްޓާ ވަނީ ފެނިފައެވެ. އަދި އެ ތަކެތި ތަހުލީލު ކުރިއިރު ވަނީ މަސްތުވާތަކެތީގެ ބާވަތެއް ކަމަށްވާ ހެރޮއިންއަށް ޕޮޒިޓިވް ވެފައެވެ. އަތުލައިގަނެވުނު މަސްތުވާތަކެތީގެ ބަރުދަނުގައި 2.05 ކިލޯ ހުރި ކަމަށް ފުލުހުން ބުންޏެވެ. 

ކަސްޓަމްސް އިން ބުނީ މި މަހުގެ 15 ވަނަ ދުވަހު އިންޑިއާ އިން ރާއްޖެ އައި އުމުރުން 31 އަހަރުގެ ދިވެއްސެއްގެ އަތުން ވެސް މަސްތުވާތަކެތި ފެނިފައިވާ ކަމަށެވެ. ކަސްޓަމްސް އަށް ލިބުނު އިންޓެލިޖެންސް މައުލޫމާތަކާ ގުޅިގެން އެ މީހާގެ ފޮށިތަންމަތި އިތުރަށް ބަލައި ފާސްކުރުމުގެ ތެރޭގައި ފޮށީގެ ތެރޭގައި ފޮރުވާފައިވާ މަސްތުވާތަކެތި ފެނިފައިވާއިރު، އެ ތަކެތި ވަނީ މަސްތުވާތަކެތީގެ ބާވަތެއް ކަމަށްވާ ހެރޮއިންއަށް ޕޮޒިޓިވް ވެފައެވެ. މި ތަކެތީގެ ބަރުދަނުގައި 771 ގްރާމް ހުރި ކަމަށް ކަސްޓަމްސް އިން ބުންޏެވެ.

ކަސްޓަމްސް އިން ބުނީ މިކޭސްތަކުގައި އަތުލައިގަނެވުނު މަސްތުވާތަކެތީގެ ބަރުދަނުގައި 8.28 ކިލޯ ހުރިއިރު، މި މައްސަލައިގައި ޝާމިލްވާ މީހުންނާއި އަތުލައިގަނެވުނު މަސްތުވާތަކެތި އިތުރަށް ތަހުޤީޤު ކުރުމަށްޓަކައި މޯލްޑިވްސް ޕޮލިސް ސަރވިސްއާ ހަވާލުކޮށްފައިވާ ކަމަށެވެ.

ކަސްޓަމްސްގެ ތަފާސް ހިސާބުތަކުން ދައްކާ ގޮތުން މިއަހަރު މިހާތަނަށް 54 މައްސަލައެއްގައި ވަނީ މަސްތުވާތަކެތި އަތުލައިގަނެފައެވެ. ފޯސްޓް މެދުވެރިކޮށް އެތެރެކުރި 44 މައްސަލައަކާއި ފަސިންޖަރުންގެ ލަގެޖުން މަސްތުވާތަކެތި ފެނުނު ނުވަ މައްސަލައެއްގެ އިތުރުން ކަނޑުމަގުން މަސްތުވާތަކެތި އެތެރެކުރި މައްސަލައެއް ހިމެނެއެވެ. 

އެންމެ ގިނަ އިން އަތުލެވުނު މަސްތުވާތަކެތީގެ މައިގަނޑު ބާވަތްތަކަކީ ކެނަބިސް، ހަޝިޝް އޮއިލް އަދި ހެރޮއިންއެވެ.