އުމަރު ނަސީރުގެ ޕާސްޕޯޓް ހިފަހައްޓައިފި
ސިވިލް ކޯޓުން އަމުރު ނެރުނީ ދަރަނީގެ މައްސަލައެއްގައި
ކުރީގެ ހޯމް މިނިސްޓަރު އުމަރު ނަސީރު
ރިޔާސީ އިންތިހާބުގައި ވާދަކުރައްވާނެކަން އިއުލާންކުރައްވާފައިވާ ކުރީގެ ހޯމް މިނިސްޓަރު އުމަރު ނަސީރުގެ ޕާސްޕޯޓް ހިފެހެއްޓުމަށް ސިވިލް ކޯޓުން އަމުރުކޮށްފިއެވެ.
ރާއްޖެޓީވީއަށް އެނގިފައިވާ ގޮތުގައި އުމަރު ނަސީރު ޕާސްޕޯޓް ހިފެހެއްޓުމަށް ސިވިލް ކޯޓުން އަމުރު ނެރުނީ ދަރަނީގެ މައްސަލައެއްގައެވެ. އަދި އެއީ އޭނާގެ މަސްލަހައްތު އޮންނަ ކުންފުންޏެއްގެ ދަރަނީގެ މައްސަލައެއް ކަން ވެސް ރާއްޖެޓީވީއަށް އެނގިފައި ވެއެވެ.
އެނގިފައިވާގޮތުގައި ދަރަނީގެ މައްސަލާގައި އުމަރުގެ ޕާސްޕޯޓް ހިފެހެއްޓީ ރަހުނެއް ނުހިމެނޭ، ސާބިތު ދަރަނީގެ މުއާމަލާތްތަކުގައި އަމަލުކުރާނެ ގޮތުގެ ގަވާއިދުގެ ދަށުނެވެ. އަދި އެ މައްސަލައަކީ ވޭލް ސަބްމެރިންގެ ޕެންޝަނާ ގުޅޭ މައްސަލައެއްކަން އެނގިފައިވެއެވެ. އެގޮތުން އުމަރުގެ މަސްލަހަތު އޮންނަ ވީ ޓުވަރިސްޓް ސަބްމެރީން އިން ޕެންޝަން އޮފީހަށް 1.8 މިލިއަން ރުފިޔާ ދައްކަންޖެހެ އެވެ. ޕެންޝަން އޮފީހަށް 1.8 މިލިއަން ރުފިޔާ ދައްކަން އެ ކުންފުނީގެ މައްޗަށް އަމުރުކޮށްފައިވަނީ 2016 ވަނަ އަހަރު އެވެ.
އުމަރާއެކު، އެ ކުންފުނީގެ ޑިރެކްޓަރުންގެ ޕާސްޕޯޓް ހިފަހައްޓާފައިވަނީ ހުކުމާއި އެއްގޮތަށް ފައިސާ ދައްކާފައިނުވާތީކަން އެނގިފައިވެއެވެ.
ސާބިތު ދަރަނީގެ މުއާމަލާތްތަކުގައި އަމަލުކުރާނެ ގޮތުގެ ގަވާއިދުގެ ދަށުން ސާބިތު ދަރަންޏެއްގެ މައްސަލައިގައި ޑިރެކްޓަރުންގެ ޕާސްޕޯޓް ހިފެހެއްޓި ދާނެ އެވެ.
ރާއްޖެޓީވީއަށްް މައުލޫމާތު ދެއްވަމުން އުމަރު ވިދާޅުވީ އޭނާގެ ޕާސްޕޯޓް ހިފަހައްޓާފައިނުވާ ކަމަށެވެ. އަދި ޕާސްޕޯޓް ހިފެހެއްޓުމަށް އަމުރުކުރި ކަމަށް ބުނެ ދެކެވޭ ވާހަކައަކީ ދޮގެއް ކަމަށް ވެސް އުމަރު ވިދާޅުވިއެވެ.
އުމަރު ނަސީރަކީ ކުރިއަށް އޮތް ރިޔާސީ އިންތިހާބުގައި ވާދަކުރައްވާނެކަން އިއުލާންކުރައްވާފައިވާ ބޭފުޅެކެވެ. ސާބިތު ދަރަނީގެ މައްސަލައެއް އޮވެ، ގަވައިދާއި އެއްގޮތަށް ދައްކަމުން ނުދާކަމުގައިވާނަމަ ރިޔާސީ އިންތިހާބުގައި ވާދައެއް ނުކުރެވޭނެ އެވެ.
