ކުރިއަށް އޮތް ރިޔާސީ އިންތިޚާބުގައި ވޯޓު ފޮށި ބަހައްޓަން ދެކޮޅު ހެދި ރިސޯޓުތައް ހާމަކުރުމަށް ބައެއް ފަރާތްތަކުން ދަނީ ގޮވާލަމުން
ކުރީގެ ޔޫތު މިނިސްޓަރު އަދި ކުރީގެ ޓުއަރިޒަމް މިނިސްޓްރީގެ ޑެޕިއުޓީ މިނިސްޓަރުކަން ވެސް ކުރެއްވި މަލީހް
ވޯޓު ފޮށި ބަހައްޓަން އެއްވެސް ރިސޯޓަކުން ދެކޮޅު ނަހަދާނެ ކަމަށާއި ރިސޯޓްތަކުގެ ވެރިންނަށް ބިރު ދައްކަނީ ރައީސް އަބްދުﷲ ޔާމިނުގެ ސަރުކާރުން ކަަމަށް ކުރީގެ ޔޫތު މިނިސްޓަރު މުހައްމަދު މަލީހް ޖަމާލް ވިދާޅުވެއްޖެއެވެ.
މަލީހް ހޯމަ ދުވަހު ކުރެއްވި ޓްވީޓެއްގައި ވިދާޅުވީ ޑިމޮކްރަސީ އަށް ރިސޯޓު އޯނަރުން ބިރު ނުގަންނާނެ ކަަމަށާއި އިލެކްޝަންސް ކޮމިޝަން (އީސީ) އިން ރިސޯޓުތަކުގެ މެނޭޖްމަންޓާއި އޯނަރުން ބަދުނާމުވާ ގޮތަށް ވާހަކަ ދެއްކުން ހުއްޓާލަން ޖެހޭ ކަމަށެވެ.
މަލީހް މިގޮތަށް ޓްވީޓް ކުރެއްވި އިރު އަންނަ ސެޕްޓެމްބަރު 23 ގައި އޮންނަ ރިއާސީ އިންތިޚާބުގައި ވޯޓުލުމަށް ރިސޯޓްތަކުގައި ވޯޓު ފޮށި ބެހެއްޓުމަށް މައުލޫމާތު ހޯދުމުން، ގިނަ ރިސޯޓްތަކުން ބޭނުންވީ ވޯޓު ފޮށި ނުބަހައްޓަން ކަމަށް އިލެކްޝަންސް ކޮމިޝަނުގެ ރައީސް އަހުމަދު ޝަރީފް ވަނީ ވިދާޅުވެފައެވެ. ރާއްޖޭގައި 100 އަށް ވުރެ ގިނަ ރިސޯޓު އޮތް އިރު އާދީއްތަ ދުވަހު ނޫސްވެރިންނާ ބައްދަލު ކުރައްވައި ޝަރީފް ވިދާޅުވީ ފަހުން ގެނައި ބަދަލާ އެކު މަދުވެގެން 100 ދިވެހިން އުޅޭ ރިސޯޓުތަކުގައި ވޯޓު ފޮށި ބެހެއްޓުމަށް މަޝްވަރާ ކުރި އިރު ވޯޓު ފޮށި ބަހައްޓަން ބޭނުންނުވާ ކަމަށް 53 ޕަސެންޓު ރިސޯޓުން އަންގާފައިވާ ކަމަށެވެ.
