ދެ ރަށަކަށް މަސްތުވާތަކެތި އެތެރެކުރަން އުޅުނު ތިން މީހަކު ހައްޔަރު ކޮށްފި
މަސްތުވާ ތަކެތި އެތެރެ ކުރަން އުޅުނީ ށ. ފުނަދުއަށާއި ރ. މީދުއަށް
ފުލުހުން ދެ ރަށުގައި ހިންގި އޮޕަރޭޝަނުގައި އަތުލައިގަތް މަސްތުވާ ތަކެތި
ފުލުހުން ދެ ރަށެއްގައި ހިންގި އޮޕަރޭޝަނުގައި މަސްތުވާތަކެއްޗާ އެކު 18 އަހަރުން ދަށުގެ ކުއްޖަކާއި އިތުރު ދެމީހަކު ހައްޔަރު ކޮށްފިއެވެ.
ޖުލައި 18 ވަނަ ދުވަހު ށ. ފުނަދު އަށް މަސްތުވާތަކެތި އެތެރެކުރާ ކަމަށް ފުލުހުންނަށް ލިބުނު މަޢުލޫމާތަކާއި ގުޅިގެން ހިންގި އޮޕަރޭޝަންގައި ހައްޔަރު ކޮށްފައި ވަނީ 27 އަހަރުގެ ފިރިހެނެކެވެ. މާލެއިން ފުނަދުއަށް އައި ބޯޓަކުން އޭނާ ހައްޔަރުކޮށް ބަލައި ފާސްކުރި ކުރުމުން މަސްތުވާތަކެތި ކަމަށް ޝައްކުކުރެވޭ އެއްޗެއް އަޅާފައި ހުރި ފިލްމް ހުސްކުރި ދަޅެއް އޭނާގެ އަތުން ވަނީ ފެނިފައެވެ. އޭނާގެ ބަންދަށް ވަނީ ހަތް ދުވސް ޖަހާ ދީފައެވެ.
އޭގެ އިތުރުން ޖުލައި 21 ވަނަ ދުވަހުގެ ރޭ ރ. މީދުއަށް މަސްތުވާތަކެތި އެތެރެކުރަން އުޅޭކަމަށް ފުލުހުންނަށް ލިބުނު މަޢުލޫމާތަކާއި ގުޅިގެން ކުރިއަށް ގެންދިޔަ އޮޕަރޭޝަންގައި ވަނީ 18 އަހަރުން ދަށުގެ ކުއްޖަކާއި 26 އަހަރުގެ މީހަކު ހައްޔަރު ކޮށްފައެވެ. މަޑުއްވަރީ ބަނދަރު ސަރަހައްދުން އެ މީހުން ހައްޔަރުކޮށް ބަލައިފާސްކުރި ކުރުމުން މަސްތުވާތަކެތި ކަމަށް ޝައްކުކުރެވޭ އެއްޗެއް އަޅާފައި ހުރި ރަބަރު ޕެކެޓަކާއި، މަސްތުވާތަކެތި ކަމަށް ޝައްކުކުރެވޭ އެއްޗެއް އަޅާފައިވާ 4 ސެލޯފިންކޮޅު އެ މީހުންގެ އަތުން ފެނިފައި ވެއެވެ.
އެ މީހުންގެ ބަންދުގެ މުއްދަތު ފުލުހުން ހާމަ ކޮށްފައި ނުވާއިރު ރާއްޖެއެމްވީ. އިން އެ ކަން ސާފުކުރުމަށް ގުޅުމުން ޖަވާބު ދީފައި ނުވާތީ އެ މައުލޫމާތު ސާފު ކުރެވޭ ގޮތް ވަނީ ނުވެފައެވެ.
އެ ދެ މައްސަލަ ވެސް ފުލުހުން ދަނީ ތަޙުޤީޤު ކުރަމުންނެއެވެ.
