ގްރޫޕް މާރާމާރީއަކާ ގުޅިގެން 10 މީހަކު ހައްޔަރުކޮށްފި
އައްޑޫގައި ހިންގި މި މާރާމާރީގައި ދެ މީހަކަށް ވަޅިން ހަމަލާދީ ޒަހަމްކޮށްލި
ފުލުހުން ބަންދުކޮށްފައިވާ ސަރަހައްދެއް
އައްޑޫ ސިޓީ ހިތަދޫގައި ދެ ގްރޫޕެއް ދެމެދު ހިންގި މާރާމާރީއެއްގައި ދެ މީހަކު ޒަހަމްކޮށްލައި، ސައިކަލެއްގައި ރޯކޮށްލި މައްސަލައިގައި 10 މީހަކު ހައްޔަރުކޮށްފި އެވެ.
ފުލުހުންގެ މީޑިއާ އޮފިޝަލް ވިދާޅުވީ މާރާމާރީ ހިންގައިގެން ފުލުހުންނަށް ރިޕޯޓުކޮށްފައިވަނީ އާދިއްތަ ދުވަހުގެ ރޭ 21:40 ހާއިރު ކަމަށެވެ. މާރާމާރީގައި ޒަހަމްކޮށްލި ދެ މީހުންގެ ހާލު ސީރިއަސް ނޫން ކަމަށާއި މިހާރު އެ މީހުންނަށް ހިތަދޫ ރީޖަނަލް ހޮސްޕިޓަލުގައި ފަރުވާދެމުންދާ ކަމަށް ވެސް ފުލުހުން ބުނެ އެވެ.
މާރާމާރީގައި ޒަހަމްވި މީހުންގެ މައުލޫމާތާއި ފުލުހުންގެ ބެލުމުގެ ދަށަށް ގެންދިޔަ މީހުންގެ މައުލޫމާތު ފުލުހުން ހާމަކޮށްފައެއް ނުވެއެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި އެ މާރާމާރި ހިންގާފައިވަނީ ސައިކަލުގައި ދުއްވާފައި ދިޔަ ދެ މީހަކު މަޑުކުރުވުމަށް ފަހުގައެވެ. އަދި އެ ދެމީހުންގެ ގަޔަށް ވަޅި ހެރުމަށްފަހު އެ މީހުން ދުއްވި ސައިކަލުގައި ވެސް ރޯކޮށްލާފައިވާ ކަމަށް ރާއްޖެއެމްވީއަށް ވަނީ މައުލޫމާތު ލިބިފައެވެ.
ފުލުހުން ދަނީ މި މައްސަލަ އިތުރަށް ތަހުޤީޤު ކުރަމުންނެވެ.
