ޕީ.އެލް.ކިޑްސް ޕްރައިމެރީން ބޭއްވި ފުރަތަމަ ޤުރުއާން އަދި މަދަހަ މުބާރާތުގެ ނަތީޖާ ފާޅުކޮށްފި
ޤުރުއާން އަދި މަދަހަ މުބާރާތުގެ ނަތީޖާ ކުލަގަދަ ރަސްމިޔާތެއްގައި ފާހަގަކޮށްފި
ޕީ.އެލް.ކިޑްސް ޕްރައިމެރީން ބޭއްވި ފުރަތަމަ މުބާރާތުގައި އިނާމް ލިބުނު ކުއްޖެއެއް
ދީނީ ލޯބި ދަރިވަރުންގެ ހިތުގައި އަށަގެންނެވުމަށް އުފެއްދި ޕީ.އެލް.ކިޑްސް ޕްރައިމެރީން ބޭއްވި ފުރަތަމަ ޤުރުއާނާއި، މަދަހަ މުބާރާތުގެ ނަތީޖާ ކުލަގަދަ ރަސްމިޔާތެއްގައި ފާޅުކޮށްފިއެވެ.
ރޯދަ މަހު ބޭއްވި ދެ މުބާރާތުގެ ވަނަވަނައަށް ދިޔަ ކުދިންނަށް ވަނީ އަންގާރަ ދުވަހުގެ ހަވީރު އަރަބިއްޔާ ސުކޫލުގައި އިނާމާއި ތަށި ހަވާލުކޮށްފައެވެ. އަދި ބައިވެރިވި ކޮންމެ ކުއްޖަކަށް ވެސް ވަނީ ހަނދާނީ ލިޔުން ދީފައެވެ. މި މުބާރާތް ކުރިޔަށް ގެންގޮސްފައި ވަނީ ބޭބީ ނާސަރީއިން ފެށިގެން ޔޫކޭޖީ އުމުރު ފުރާގެ ކުދިންގެ ދެމެދުގައެވެ.
މަދަހަ މުބާރާތާއި ގުރުއާން މުބާރާތުން ވަނަވަނައަށް ހޮވައިފައި ވަނީ އެ އުމުރު ފުރައެއްގެ ކުދިންގެ ތެރެއިންއެވެ. އަދި ގުރުއާން މުބާރާތުގައި ވަނީ ބަލައިގެން ކިޔުމުގެ ބަޔާއި، ނުބަލާ ކިޔުމުގެ ބައިގެ އުމުރު ފުރާ ވެސް ވަކި ކޮށްފައެވެ.
މި ހަފްލާ ޝަރަފުވެރިކޮށްދެއްވީ އަލް މަދަރުސަތުލް އަރަބިއްޔަތުލް އިސްލާމިއްޔާގެ މުދީރު އަލް އުސްތާޒް މުހައްމަދު ޝުޖާއު އަބްދުއްރަހީމެވެ. ޝުޖާއު ވިދާޅުވީ ގުރުއާނަކީ ގިޔާމަތް ދުވަހުން ޝަފާއަތްތެރިވާނެ ފޮތެއް ކަމަށާއި ގުރުއާން ގިނަގިނައިން ކިޔަވައި ވަރަށް ރަނގަޅަށް ދަސް ކުރަން ޖެހޭ ކަމަށެވެ. އަދި ގުރުއާން ކިޔަވަން ދަސް ކޮށްދިނުމަކީ ދިގުދެމިގެންވާ ސަވާބު ލިބޭނެ ކަމެއް ކަމަށް ވެސް ޝުޖާއު ވިދާޅުވިއެވެ. ގުރުއާން ހިތުދަސް ކުރުމަށް ބާރު އަޅަން ޖެހޭ ކަމަށާއި އެކަމުގެ ސަބަބުން ހިތް އަލިވާނެ ކަމަށް ވެސް އޭނާ ވަނީ ވިދާޅުވެފައެވެ.
މި ދެ މުބާރާތް ކުރިއަށް އޮތް އަހަރުތަކުގައި ސިލްސިލާކޮށް ބާއްވާނެ ކަމަށް ދަނީ މަޝްވަރާ ކުރެވެމުންނެވެ. އަދި މިއަހަރު ބޭއްވުނު ގުރުއާން މުބާރާތާއި، މަދަހަ މުބާރާތުގައި އާންމުންނަށް ބައިވެރި ނުވެވުނު ކަމުގައި ވިނަމަވެސް ކުރިއަށް ހުރި އަހަރުތަކުގައި އެ ފަރާތްތަކަށް ވެސް ބައިވެރިވެވޭނެ އިންތިޒާމް ހަމަޖައްސާނެކަމަށް ޕީ.އެލް.ކިޑްސް ޕްރައިމެރީން ވަނީ ބުނެފައެވެ.
ޕީ.އެލް.ކިޑްސް ޕްރައިމެރީގެ މަގްސަދަކީ ކުދިންގެ މެދުގައި އިސްލާމް ދީނަށް ލޯބި ޖައްސައި ކީރިތި ގުރުއާނަށް ޚާއްސަ ލޯތްބެއް ކުދިންގެ ހިތްތަކުގައި އަށަ ގެންނެވުމަށް ކަމަށް އެ ސްކޫލުން ވަނީ ބުނެފައެވެ. އަދި އެ ސްކޫލަކީ ކުދިންނަށް ވަރަށް އަމާން ތަނެއް ކަމަށާއި ސަލާމަތީ ގޮތުން ބެލިނަމަވެސް އެތަނުގައި ވީޑިއޯއިން މޮނިޓަރ ކުރެވޭނެ ނިޒާމް ހުރިކަމަށް ވެސް ވަނީ ވިދާޅުވެފައެވެ.
