ހއ. ހޯރަފުށީ ކައިރީގައި އޮންނަ މާފިނޮޅުގައި ތަރައްގީކުރާ އެއާޕޯޓު އެޅުމަށް ބިން ހިއްކުމުގެ މަސައްކަތް ފަށައިފިއެވެ.
އެމްޓީސީސީއާ ހަވާލުކޮށްގެން ކުރިއަށް ގެންދާ މިމަޝްރޫއުގެ ބިން ހިއްކުމުގެ މަސައްކަތް ކުރަނީ އެކުންފުނީގެ ކޮންނަ ބޯޓު މަހާ ޖައްރާފުންނެވެ.
1.2 ކިލޯމީޓަރުގެ ރަންވޭ އަކާއެކު ތަރައްގީކުރާ އެއާޕޯޓު އެޅުމަށް 16 ހެކްޓަރު ހިއްކާނެއެވެ.
އެމްޓީސީސީ އިން ބުނީ ބިން ހިއްކުމުގެ މަސައްކަތް ހަ މަސްތެރޭ ނިންމާނެ ކަމަށާއި، މަސައްކަތް ކުރުމަށް މަހާޖައްރާފުގެ އިތުރުން ކަޓާ އޮޕްޝަން ޑްރެޖަރުވެސް އެ މަސައްކަތުގައި ބޭނުންކުރާނެ ކަމަށެވެ.މިމަސައްކަތް އެމްޓީސީސީއާ ހަވާލުކޮށްފައިވަނީ 64 މިލިއަން ރުފިޔާ އަށެވެ.
ހޯރަފުށި އެއަޕޯޓްގެ ބިން ހިއްކުމުގެ މަސައްކަތް ފަށާފައިވާއިރު، އެމްޓީސީސީން އަންނަނީ ހދ. ކުޅުދުއްފުއްޓާއި ށ. ފުނަދޫ އެއާޕޯޓް މަސައްކަތް ވެސް ކުރަމުންނެވެ. އަންނަ މަހު އިތުރު އެއާޕޯޓުގެ މަސައްކަތްތައް ފަށާނެ ކަމަށް ވެސް އެކުންފުނިން މައުލޫމާތުދެއެވެ.
