ދައުލަތުގެ ބާރުވެރި މަގާމުތަކުގައި ތިއްބެވި ފަރާތްތައް ރައީސް ޔާމިން ދެއްވާ އިންޒާރުތަކަށް ބިރުފުޅު ގަންނަން ނުޖެހޭ: ޑރ. ޖަމީލް
20 ޖުލައި 2018 | ހުކުރު 18:00ރައީސް ޔާމިން އަށް އޮތީ މަދުވަގުތުކޮޅެއް ކަމަށްވެސް ޑރ. ޖަމީލް ވަނީ ވިދާޅުވެފައި
ކުރީގެ ނައިބު ރައީސް ޑރ. ޖަމީލް
ރައީސުލްޖުމްހޫރިއްޔާ އަބްދުﷲ ޔާމިން އަބްދުލްގައްޔޫމަށް އޮތީ މަދު ވަގުތުކޮޅެއް ކަމަށާއި ދައުލަތުގެ ބާރުވެރި މަގާމުގަތަކުގައި ތިއްބެވި ފަރާތްތައް ރައީސް ޔާމިން ދެއްވާ އިންޒާރުތަކަށް ބިރުފުޅުގަންނަން ނުޖެހޭ ކަމަށާއި އަދި ރައީސް ޔާމިނަށް ދިވެހި އިގްތިސާދު ހަލާކުކޮށްލުމަށް ފުރުސަތު ދީގެން ވެސް ނުވާނެ ކަމަށް ކުރީގެ ނާއިބު ރައީސް ޑރ. މުހައްމަދު ޖަމީލް އަހްމަދު ވިދާޅުވެއްޖެއެވެ.
ހުކުުރު ދުވަހު ޓްވިޓާ މެދުވެރިކުރައްވައި ޑރ. ޖަމީލް ވިދާޅުވީ ރައީސް ޔާމިން، ދިވެހިރާއްޖޭގެ ޝަރުއީ ދާއިރާ އާއި ގާނޫނު ހަދާ މަޖިލީހާއި އަންނަ ރިޔާސީ އިންތިޚާބަށް ނުފޫޒު ފޯރުވަމުން ގެންދާނަމަ ހަމަ ޔަގީނުން ވެސް ޔޫރަޕިއަން ޔޫނިއަން (އީޔޫ) އާއި އަދި އެހެނިހެން ފަރާތްތަކުން ރާއްޖެއަށް ހަރުކަށި ފިޔަވަޅުތައް އަޅާނެ ކަމަށެވެ. އަދި މިކަންކަން މިގޮތަށް އޮތަތީވެ، މިއީ އެންމެން ހޭލަންވީ ވަގުތު ކަމަށް ވެސް ޑރ. ޖަމީލް ވިދާޅުވިއެވެ.
އީޔޫ އިން ވަނީ ޖުލައި 16 ވަނަ ދުވަހު ރާއްޖެއަށް ދަތިކުރުމުގެ ފިޔަވަޅު އެޅުމާ ގުޅޭގޮތުން އޮނިގަނޑެއް ހާމަކޮށްފައެވެ. އެގޮތުން ދަތިކުރުމުގެ ފިޔަވަޅު އެޅުމުގެ އޮނިގަނޑުގައި ވަނީ ރާއްޖޭގައި އިންސާނީ ހައްގުތަކަށް އަރައިގަނެ، ގާނޫނުތަކާ ޚިލާފަށް އަދި ހަމަނުޖެހުން އުފައްދައި ބާރުގެ ބޭނުންކޮށްގެން ސިޔާސީ މިނިވަންކަމަށް ހުރަސް އަޅާ މުއައްސަސާތަކާއި އެ ކަންކަމުގައި ބައިވެރިވެ އެއްބާރުލުން ދޭ ފަރުދުންނަށް ފިޔަވަޅު އެޅުމުގެ ބާރު މެންބަރު ގައުމުތަކަށް ދީފަ އެވެ. އެގޮތުން، އީޔޫގެ މެންބަރު ގައުމުތަކަށް އެތެރެވުން މަނާކުރުމާއި އެ މީހުންގެ މުދަލާއި ފައިސާ ހިފެހެއްޓުމުގެ ބާރު ވެސް ވަނީ ދީފަ އެވެ.
ރާއްޖޭގައި މިނިވަން އިންސާފުވެރި އިންތިޚާބެއް ބާއްވަން ޖެހޭ ކަމަށާއި އަދި ސިޔާސީ ހައްޔަރީން ދޫކޮށްލުމަށް ގޮވާލައި، ބައިނަލްއަގްވާމީ މުޖުތަމައު އިން ދަނީ ތަކުރާރުކޮށް ދިވެހި ސަރުކާރަށް ގޮވާލަމުނެވެ. އެހެން ނަމަވެސް ދިވެހި ސަރުކާރުން ދެމުން ގެންދަނީ އެކަމަށް ބީރު ކަންފަތެކެވެ.
