ޔޫރަޕިއަން ޔޫނިއަން އިން ރާއްޖެއާ ދެކޮޅަށް ފިޔަވަޅު އަޅަން ނިންމީ ރާއްޖޭގެ ސަރުކާރަށް އެންގުމަށް ފަހު ކަމަށާއި އަދިވެސް ރާއްޖޭގެ ހާލަތު ބަދަލުނުވާ ކަމަށް ޔޫރަޕިއަން ޕާލިމެންޓުގެ މެމްބަރު ތޯމަސް ޒެޗޮވްސްކީ ވިދާޅުވެއްޖެއެވެ.

ޔޫރަޕިއަން ކައުންސިލް އިން ނިންމި ނިންމުމާ ގުޅޭ ގޮތުން ވާހަކަ ދައްކަވަމުން ތޯމަސް ވިދާޅުވީ އެއީ އިންސާނީ ހައްގުތަކާއި، ގާނޫނުތައް ނެގެހެއްޓުމަށާއި، ސިޔާސީ ހައްލެއް ހޯދުމަށް ހުރަސް އަޅާ ފަރުދުންނާއި، ބައެއް ފަރާތްތަކާ މެދު ފިޔަވަޅު އެޅުމަށް މަގުފަހި ކުރުމަށް ނިންމިގެން ދިޔަ ވަރަށް މުހިންމު ނިންމުމެއް ކަމަށެވެ. ހަމައެހެންމެ މި ނިންމުމުގެ ސަބަބުން މިނިވަން އިންސާފުވެރި އިންތިހާބެއް ބޭއްވުމަށް ހުރަސް އަޅަމުންދާ ފަރާތްތަކާ ދެކޮޅަށް ވެސް ފިޔަވަޅު އެޅުމަށް މަގުފަހި ވެގެންދާނެ ކަމަށް އޭނާ ވިދާޅުވިއެވެ.

ތޯމަސް ވިދާޅުވީ ޔޫރަޕިއަން ކައުންސިލުން މި ނިންމުން ނިންމާފައި ވަނީ ރާއްޖޭގެ ސަރުކާރުގެ އަމަލުތައް އިސްލާހު ކުރުމަށް ފުރުސަތު ދިނުމަށް ފަހު ކަމަށާއި، އެ އަމަލުތަކުގެ ސަބަބުން ނުކުމެދާނެ ނޭދެވޭ އަސަރުތައް ވެސް ސަރުކާރަށް ސާފުކޮށްދީފައި ވާނެ ކަމަށެވެ.

ހަމައެހެންމެ ޖޫން މަހުގެ 27 ވަނަ ދުވަހު ފޮރިން މިނިސްޓަރު ޑރ. މުހައްމަދު އާސިމް އިސްވެ ހުންނެވި ރާއްޖޭގެ ވަފްދަކާއި ޔޫރަޕިއަން ޔޫނިއަން އެކްސްޓަރނަލް އެކްޝަންގެ ބޭފުޅުން ބައްދަލުކުރެއްވުމަށް ފަހު ރާއްޖެއާ ދެކޮޅަށް ފިޔަވަޅު އަޅާނެކަން ދިވެހި ސަރުކާރަށް އަންގާފައިވާނެ ކަމަށް ތޯމަސް ވިދާޅުވިއެވެ. ހަމައެހެންމެ މިއީ މިއަހަރުގެ ފެބްރުއަރީ މަހުގެ 26 ވަނަ ދުވަހު އީޔޫގެ ކައުންސިލަށް ރާއްޖޭގެ މައްސަލައާ ގުޅިގެން ހުށެހެޅުނު ގަރާރާ ސީދާ ގުޅިގެން ނިންމުނު ނިންމުމެއް ކަމަށް އޭނާ ވިދާޅުވިއެވެ.

ހަމައެހެންމެ ރާއްޖޭގެ ހާލަތު ބަދަލުވެފައިވާ ކަމަށް އީޔޫއަށް ގަބޫލު ނުކުރެވޭ ކަމަށާއި އެހެންކަމުން އަމިއްލަ މަންފާއަށް މަސައްކަތްކުރުމުގެ ބަދަލުގައި ރާއްޖޭގެ ހާލަތު ރަނގަޅު ކުރުމަށް މަސައްކަތްކުރުމަށް ތޯމަސް ވަނީ ގޮވާލައްވާފައެވެ.

ރާއްޖޭގެ ސަރުކާރުގެ ބައެއް އިސްވެރިންނާ ދެކޮޅަށް ފިޔަވަޅު އެޅުމަށް ނިންމައި ޔޫރަޕިއަން ކައުންސިލުން ވަނީ ފްރޭމްވޯކެއް ވެސް އާއްމުކޮށްފައެވެ. މި ނިންމުމާ އެކު ރާއްޖޭގެ ހާލަތު ރަނގަޅު ނުވެއްޖެ ނަމަ އެކުލަވާލެވޭ ފްރޭމްވޯކްގެ ތެރެއިން، އެފަދަ ފަރާތްތައް ވިލާތުގެ ގައުމުތަކަށް ދަތުރުކުރުން މަނާކުރެވި ވިލާތުގެ ގައުމުތަކުގައި ހުރި އެފަރާތްތަކުގެ މުދާ ހިފެހެއްޓިގެންދާނެއެވެ. އަދި ވިލާތުން ބޭރުގެ އެހެން ގައުމުތަކަށް ވެސް އެގޮތަށް އަމަލުކުރުމަށް ބާރު އަޅާނެއެވެ.