ހަނިމާދޫ އެއާރޕޯޓުގައި ބޮޑެތި ބޯޓުތައް ޖެއްސޭގޮތް ހަދައި ސަރަހައްދުގެ މައި އެއާރޕޯޓަށް ހަދާނަން: ރައީސް ޔާމީން
ހައްދުން މަތީގައި 3000 އެނދު ތަރައްގީ ވެގެންދާއިރު ހަނިމަދޫ އެއާރޕޯޓް ތަރައްގީ ކުރަން މަޖުބޫރު ވާނެ: ރައީސް ޔާމީން
ރައީސް ޔާމީނަށް ހދ. ހަނިމާދޫއިން މަރުހަބާ ދަންނަވަނީ
ހދ. ހަނިމާދޫ އެއާރޕޯޓްގައި ބޮޑެތި ފްލައިޓްތައް ޖެއްސޭގޮތް ހަދައި އެ ސަރަހައްދުގެ މައި އެއާރޕޯޓަށް ހައްދަވާނެ ކަމަށް ރައީސް އަބްދުﷲ ޔާމީން އަބްދުލްގައްޔޫމް ވައުދުވެވަޑައިގަންނަވައިފި އެވެ.
ހއ އާއި ހދ އަތޮޅުގެ ރަށްތަކަށް މިހާރު ރައީސް ޔާމީން ކުރައްވަމުން ގެންދަވާ ދަތުރުފުޅުގައި ހަނިމާދޫ ރައްޔިތުންނާ ބައްދަލު ކުރައްވާ ރައީސް ޔާމީން ވިދާޅުވީ ކުރިއަށް އޮތް ފަސް އަހަރުގެ ތެރޭގައި ފަތުރުވެރިކަމުގެ ދައިރާއިން އެ ސަރަހައްދުގައި 3000 އެނދު ތަރައްގީ ކުރުމަށް ނިންމާފައިވާއިރު، ހަނިމާދޫ އެއާރޕޯޓް ތަރައްގީ ކުރަން މަޖުބޫރުވެ ވަޑައިގަންނަވާ ކަމަށެވެ.
"މިސަރަހައްދުގެ ނާރެހެއްގެ ގޮތުގައި މިއޮތީ ހަނިމާދޫ އެއާރޕޯޓް. ހަނިމާދޫގެ އެއާރޕޯޓަކީ މިހާރު ބޮޑެތި މަތިންދާ ބޯޓުތައް ޖެއްސޭވަރުގެ އެއާރޕޯޓެއް ނޫން. އަދި އަމުދުން 3000 އެނދު ފަތުރުވެރިކަމުން މިސަރަހައްދުގައި އިތުރުވެގެންދާއިރު، މުއްސަނދިން ޕްރައިވެޓް ޖެޓުގައި އައިސް ދަތުރުކުރެވޭ ވަރުގެ އެއާރޕޯޓެއް ނޫން މިއީކީ. އެހެންވީމާ އިރާދަ ކުރެއްވިއްޔާ އަޅުގަނޑުމެންގެ މިއަންނަ 5 އަހަރުގައި އެންމެ ކުރީކޮޅު ހަނިމާދޫ އެއާރޕޯޓް ބޮޑުވެގެންދާނެ. އަދި މިޒަމާނުގެ ބައިނަލްއަގްވާމީ ވައިގެ އެއާރޕޯޓަކަށް ހަދަން އަޅުގަނޑުމެންނަށް މަޖުބޫރު އެބަވެ. އަޅުގަނޑުމެން އެކަން ކޮށްދޭނަން،" ރައީސް ޔާމީން ވިދާޅުވި އެވެ.
ކުރިއަށް އޮތް ދައުރުގައި ހދގައި ފަތުރުވެރިކަމުގެ ދާއިރާއިން 3000 އެނދު ތަރައްގީ ކުރައްވާނެ ކަމަށް ރައީސް ޔާމީން ވައުދުވެވަޑައިގެންނެވިއިރު، ހިނގަމުން މިދާ ދައުރުގައި، އައްޑޫ ސިޓީގައި ތަރައްގީ ކުރައްވާނެ ކަމަށް ވައުދުވެވަޑައިގެންނެވި 5000 އެނދުގެ ވައުދު މިހާތަނަށް ފުއްދިފައެއް ނުވެއެވެ.
މިއަހަރުގެ ރިޔާސީ އިންތިހާބު ބޯމަތިވެފައި ވަނިކޮށް، ފަތުވެރިކަމާ ގުޅޭ ބޮޑެތި ވައުދުތައް ރައީސް ޔާމީން އެކި ރަށްރަށް ވަޑައިގެން ވަމުން ގެންދަވާއިރު، މިހާރު ހިނގަމުންދާ ރިޔާސީ ދައުރުގައި ފަތުރުވެރިކަމުގެ ގިނަ ވައުދުތައް ފުއްދާފައި ނުވާކަމަށް ރައީސް ޔާމީންގެ ސަރުކާރުގެ ކުރީގެ ޔޫތު އެންޑް ސްޕޯޓްސް މިނިސްޓަރު މުހައްމަދު މަލީހު ޖަމާލު ވަނީ ވިދާޅުވެފަ އެވެ.
ޕީޕީއެމްގެ ފަތުރުވެރިކަމުގެ ދާއިރާގެ މެނިފެސްޓޯ ތަައްޔާރު ކުރުމުގައި 2013 ވަނަ އަހަރު އުޅުއްވި އަދި ރައީސް ޔާމީންގެ ސަރުކާރުގެ އިކޮނޮމިކް ކައުންސިލްގެ މެމްބަރެއްގެ ގޮތުގައި އުޅުއްވި މަލީހު ވިދާޅުވި ގޮތުގައި 2013 ވަނަ އަހަރުގެ މެނިފެސްޓޯގައިވާ ގޮތަށް ދެފުއްފެންނަގޮތަށް އަދި ރައްޔިތުންނަށް އެެންމެ ފައިދާވާ ގޮތަށް ރައީސް ޔާމީންގެ ސަރުކާރުން އެންމެ ރިސޯޓެއްވެސް މިދައުރުގައި ހުޅުވިފައި ނުވާ ކަމަށެވެ.
މަލީހު ވިދާޅުވީ ރިސޯޓްތަކުގެ މުވައްޒަފުންނަށް ހިއްސާ ދިނުމުގެ ވައުދު ވެސް މިސަރުކާރުގެ ފަސް އަހަރު ނިމޭއިރުވެސް ނުފުއްދުނު ކަމަށާއި ސަފާރީތަކާއި ޔޮޓުތަކުގެ ފަރުތުވެރިންނަށް ހާއްސަކޮށްގެން ރާއްޖޭގެ ކޮންމެ އަތޮޅެއްގައި ފަޅުރަށެއް ހާއްސަކުރުމަށް ނިންމިއިރު، އެ ވައުދުވެސް ނުފުއްދުނު ކަމަށެވެ.
ސަފާރީތަށް އަޅާނެ ބަނދަރެއް ނުވަތަ މެރީނާއެއް ހެދުމަށް ވެސް މެނިފެސްޓޯގައި ވާނެ ކަމަށާއި ނަމަވެސް އެވަދު ވެސް ފުއްދިފައި ނުވާކަމަށް މަލީހު ވިދާޅުވި އެވެ.
އިންޓަގްރޭޓަޑް ޓޫރިޒަމްގެ ދަށުން ރާއްޖޭގެ ބައެއް ސަރަހައްދުތަކުގައި ހޯޓާތަކާއި ގެސްޓް ހައުސްތައް ތަރައްގީ ކުރުމަށް ވައުދުވި އިރު އެވައުދުވެސް މިއަދާ ހަމައަށް ފުއްދިފައި ނުވާކަމަށް މަލީހު ވިދާޅުވި އެވެ.
މަލީހު ވިދާޅުވީ ލ. އަތޮޅު ބަރެސްދޫގައި އިންޓަގްރޭޓަޑް ޓޫރިޒަމްގެ ދަށުން ހޮޓާތަކާއި ގެސްޓް ހައުސްތައް ތަރައްގީ ކުރުމުގެ މަސައްކަތް މި ސަރުކަރުން ކުރިނަމަވެސް އެވެސް އެންމެފަހުންވީ ބިލާހަކަށް ކަމަށާއި އައްޑޫ ސިޓީގައި ތަރައްގީ ކުރަން ބުނި 5000 އެނދުގެ ވައުދުވެސް ރައީސް ޔާމީންގެ ސަރުކާރަށް ފުއްދިފައި ނުވާކަމަށްވެސް މަލީހު ވިދާޅުވި އެވެ.
