12 މެމްބަރުންގެ ގޮނޑި ނުގެއްލޭ ކަމަށް ކުރި ހުކުމް ބާތިލް ކުރަން ހުށައެޅި މައްސަލަ ކެންސަލް ކޮށްފި
19 ޖުލައި 2018 | ބުރާސްފަތި 12:25މައްސަލަ ކެންސަލްކުރި ވަކި ސަބަބެއް ނުބުނޭ
ގޮނޑި ގެއްލިފައިވާ ކަމަށް އިލެކްޝަނުން ކަނޑައަޅާފައިވާ މެމްބަރުންނާ އިދިކޮޅު މެމްބަރުން ސުޕްރީމް ކޯޓުކައިރި
ރައްޔިތުންގެ މަޖިލީހުގެ 12 މެމްބަރެއްގެ ގޮނޑި ނުގެއްލޭ ކަމަށް ސުޕްރީމް ކޯޓުން އެކެއް ފެބްރުއަރީގައި ކޮށްފައިވާ ހުކުމް ބާތިލް ކުރަން ބަންޑާރަ ނާއިބުގެ އޮފީހުން ހުށަހަޅާފައިވާ މައްސަލައިގައި ހުކުމް ކުރުން ބުރާސްފަތި ދުވަހަށް ތާވަލު ކުރުމަށް ފަހު ކެންސަލް ކޮށްފި އެވެ.
މި މައްސަލައިގައި އަޑުއެހުންތައް ނިމިފައި ވަނިކޮށް ސުޕްރީމް ކޯޓަށް އިތުރު ފަނޑިޔާރުން އައްޔަންކޮށް ބެންޗަށް ބަދަލު އައިސްފައި ވާތީ އިތުރު އަޑުއެހުމެއް މި މަހުގެ ފަސް ވަނަ ދުވަހު ބޭއްވި އެވެ. އަދި މައްސަލަ ބައްލަވާ ފަނޑިޔާރުންގެ މަޖިލީހުގައި އިންނެވި އުއްތަމަ ފަނޑިޔާރު ޑރ.އަޙްމަދު ޢަބްދުﷲ ދީދީ އެދުވަހު ވިދާޅުވީ ދެން އޮންނާނީ މައްސަލަ ނިންމުން ކަމަށެވެ. ނަމަވެސް އޭގެ ފަހުން (މިއަދު) ބުރާސްފަތި ދުވަހުގެ މެންދުރު ފަހު 13.30 ގައި ބާއްވަން ތާވަލު ކުރި އަޑުއެހުން ފަހު ވަގުތުގައި ކެންސަލް ކުރި ސަބަބެއް ކޯޓުން ނުބުނެ އެވެ.
އެކެއް ފެބްރުއަރީގައި ސުޕްރީމް ކޯޓުން މިހާރު ބާތިލް ނުކޮށް އޮތީ 12 މެމްބަރުންނަށް ރައްޔިތުންގެ މަޖިލީހަށް ވަދެވޭނެ ކަމަށް ކަނޑައަޅާފައިވާ ބަޔާއި ކޯޓުތަކަށް އިސް ފަނޑިޔާރުންނާއި ފަނޑިޔާރުން އައްޔަން ކުރުމުގައި ސުޕްރީމް ކޯޓުގެ ހުއްދަ ހޯދަން ޖެހޭ ގޮތަށް އެކެއް ފެބްރުއަރީގައި ނެރުނު އަމުރުގައި ކަނޑައަޅާފައިވާ ބައެވެ. އެހެން ކަމުން އެ ދެބައި ވެސް ބާތިލް ކޮށްދޭން މި މައްސަލައިގެ ތެރޭގައި އެދިފައިވެ އެވެ.
އެކެއް ފެބްރުއަރީގައިވާ އެހެން ބައިތައް އެ އަމުރު ނެރުއްވި ތިން ފަނޑިޔާރުން ފަހުން ވަނީ ބަދަލު ކުރައްވާފަ އެވެ. މެމްބަރަކު އިންތިހާބުވި ޕާޓީން ވަކިވެއްޖެ ނަމަ ނުވަތަ ވަކިކޮށްފި ނަމަ މެމްބަރުކަމުގެ ގޮނޑި ގެއްލޭ ގޮތަށް މިދިޔަ އަހަރުގެ ޖުލައި މަހު ސުޕްރީމް ކޯޓުން ނެރުނު ހުކުމާއި ގުޅިގެން ރައްޔިތުންގެ މަޖިލީހުން ހަދަންޖެހޭ ފްލޯ ކްރޮސިންގއާ ބެހޭ ގާނޫނު ހެދިފައި ނުވާތީ ސުޕްރީމް ކޯޓުން ކުރި ހުކުމް ބާތިލް ކަމަށާއި އަދި އެ ހުކުމުގެ ދަށުން 12 މެމްބަރެއްގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ނިންމި ނަމަވެސް، އެ ހުކުމުގެ ދަށުން އެއްވެސް މެމްބަރެއްގެ ގޮނޑި ނުގެއްލޭ ކަމަށް 1 ފެބްރުއަރީގައި ނެރެފައިވާ އަމުރުގައި ކަނޑައަޅާފައިވާ ނުކުތާ ބާތިލް ކޮށްދޭން ދައުލަތުން ހުށަހެޅި މި މައްސަލައިގައި ކޯޓަށް ވަޑައިގަންނަ ވަނީ ބަންޑާރަ ނައިބު އޮފީހުގެ ވަކީލާ މާޝާ ލުތުފީ އެވެ. މިދިޔަ އަހަރުގެ ޖުލައި މަހު ކުރި ހުކުމުގެ ދަށުން އެއްވެސް މެމްބަރެއްގެ ގޮނޑި ނުގެއްލޭ ކަމަށް 1 ފެބްރުއަރީގައި ނެރުނު އަމުރުގައި ކަނޑައެޅި ނަމަވެސް، މިދިޔަ މާޗް މަހު މަޖިލީހުން ފާސްކުރި އެންޓި ޑިފެކްޝަންގެ ގާނޫނު ސައްހަ ކަމަށް ސުޕްރީމް ކޯޓުން ހުކުމް ކޮށްފައިވާ ކަމަށް ބަންޑާރަ ނާއިބުގެ އޮފީހުގެ ވަކީލާ މާޝާ ވަނީ ވިދާޅުވެފަ އެވެ. އަދި އެހުކުމުގައި މިދިޔަ އަހަރުގެ ޖުލައި މަހު ސުޕްރީމް ކޯޓުން ކުރި ހުކުމުގައި ހުރި ކަން ކަމަށް ރިއާޔަތް ކޮށްފައިވާ ކަމަށް އޭނާ ވަނީ ވިދާޅުވެފަ އެވެ. އެހެންކަމުން، މިދިޔަ އަހަރުގެ ޖުލައި މަހު ކުރި ހުކުމަކީ ރަނގަޅު ހުކުމެއް ކަމަށް ބަލަން ޖެހޭ ކަމަށް ދައުލަތުން މި މައްސަލައިގައި ވަނީ ބުނެފަ އެވެ. އަދި އެކެއް ފެބްރުއަރީގެ އަމުރުގައި އެ ހުކުމް ބާތިލް ކަމަށް ކަނޑައެޅީ އެ ހުކުމުގައި ގާނޫނީ މައްސަލަތަކެއް ހުރެގެން ނޫން ކަން އެންޓި ޑިފެކްޝަން ގާނޫނުގެ ސައްހަކަން ކަށަވަރުކުރުމަށް ސުޕްރީމް ކޯޓަށް ހުށަހެޅި މައްސަލާގައި ސުޕްރީމް ކޯޓުގެ ނިންމުމުން އެނގޭ ކަމަށް ވަކީލާ ވަނީ ފާހަގަ ކުރައްވާފަ އެވެ.
ބަންޑާރަ ނައިބުގެ އޮފީހުން މިއަހަރުގެ ފެބްރުއަރީ މަހު އެ މައްސަލަ ސުޕްރީމް ކޯޓަށް ހުށަހެޅުމާ އެކު، އެ މެމްބަރުން މަޖިލީހުގެ ޖަލްސާތަކަށް ވަޑައިގަތުން ހުއްޓުވުމަށް ވަގުތީ އަމުރެއް ވަނީ ނެރެފައެވެ. އެ އަމުރަށް ފަސް މަސް ވެގެންދާއިރު، ސުޕްރީމް ކޯޓުން މިހާތަނަށް ބާއްވާފައި ވަނީ ދެ އަޑުއެހުމެކެވެ.
ސަރުކާރު ހިންގާ ޕާޓީން ވަކިވެވަޑައިގެންނެވި އެ 12 މެމްބަރުން، ގުޅިފައިވާ އިދިކޮޅު ޕާޓީތަކާ އެކު މަސައްކަތް ކުރައްވަން ފެއްޓެވުމާ އެކު، އެ މެމްބަރުން މަޖިލީހުގެ ޖަލްސާތަކުގައި ބައިވެރި ކުރުން ހުއްޓުވާފައިވާތާ އަހަރަށް ވުރެ ގިނަ ދުވަސް ވަނީ ވެފައެވެ. ސުޕްރީމް ކޯޓުން އެކެއް ފެބްރުއަރީގައި ނެރުނު އަމުރުގައި ބުނެފައި ވަނީ ރައްޔިތުންގެ ސީދާ ވޯޓަކުން އިންތިހާބު ކޮށްފައިވާ މެމްބަރުންތަކެއް އިލެކްޝަންސް ކޮމިޝަނުން ވަކިކޮށް، އެކަން އިއުލާންކޮށްފައިވާ ކަމަށާއި އެހެންވުމުން މަޖިލީހުގެ އެ 12 މެމްބަރުން ވަކިވެފައިވާ ކަމަށް ސުޕްރީމް ކޯޓުން ކަނޑައަޅާފައި ނުވާތީ، އެ ފަރާތްތަކަށް މަޖިލީހުގެ މެމްބަރު ކަމުގެ މަސްއޫލިއްޔަތު އަދާކުރުމުގެ ހައްގު ލިބިގެންވާ ކަމަށެވެ.
ސުޕްރީމް ކޯޓުގެ އަމުރުގައި އެހެން ބުނެފައިވާ ބައިތައް ބާތިލު ކުރުމަށް ބަންޑާރަ ނާއިބުގެ އޮފީހުން ހުށަހެޅި މައްސަލާގައި ގޮތެއް ނިންމައި، ހުކުމް ކުރުމަށް ތާވަލުކޮށްފައި ވަނީ ބުރާސްފަތި ދުވަހުގެ މެންދުރުފަހު 1:30 އަށެވެ. ބާރަ މެމްބަރުންގެ ގޮނޑީގެ މައްސަލަ ބައްލަ ވަނީ އުއްތަމަފަނޑިޔާރު ޑރ. އަހުމަދު އަބްދުﷲ ދީދީ ހިމެނިވަޑައިގަންނަވާ ގޮތަށް ސުޕްރީމް ކޯޓުގެ ފަސް ފަނޑިޔާރުންގެ ފުލް ބެންޗުންނެވެ. ބާރަ މެމްބަރުންގެ ގޮނޑިއާ ގުޅޭ އިތުރު މައްސަލަތަކެއް ވެސް ސުޕްރީމް ކޯޓަށް ވަނީ ހުށަހަޅާފައެވެ. އެއީ 12 މެމްބަރުން ވަކިވަކިން ސުޕްރީމް ކޯޓަށް ހުށަހަޅާފައިވާ މައްސަލަތަކެވެ. ނަމަވެސް އެ މައްސަލަތަކުގެ އަޑުއެހުންތައް ކުރިއަށް ގެންގޮސްފައެއް ނުވެއެވެ.
