އިސްލާހީ މަސައްކަތަކީ އިސްލާމީ ޝަރީއަތް އަބަދު ވެސް ގޮވާލާ މަސައްކަތެއް ކަމަށާއި، އެކަމަށް އިންކާރުކުރާ މީހުންނަކީ އަނިޔާވެރިން ކަމަށް ތުލުސްދޫ ދާއިރާގެ މެންބަރު މުހައްމަދު ވަހީދު އިބްރާހީމް ވިދާޅުވެއްޖެއެވެ.

ދިއްގަރު ދާއިރާގެ ރައްޔިތުންގެ މަޖިލީހުގެ މެމްބަރު ފާރިސް މައުމޫނު ޖަލުގައި އެއް އަހަރު ދުވަސް ވުމާއި ގުޅިގެން ގުޅިފައިވާ ސިޔާސީ ޕާޓީތަކުން އެމްޑީޕީ ހަރުގޭގައި ބުދަ ދުވަހުގެ ރޭ ބޭއްވި ޖަލްސާގައި ވާހަކަފުޅު ދައްކަވަމުން މެންބަރު ވަހީދު ވިދާޅުވީ އިސްލާމީ ޝަރީއަތުން ގޮވާލާފައި ވަނީ އިންސާފު ގާއިމްކޮށް، މަސްލަހަތު ދަމަހައްޓަން ކަމަށާއި، އަނިޔާވެރިކަން އިސްކުރަން ނޫން ކަމަށެވެ. އަނިޔާގެ ކުރިމަތީގައި ހައްގުބަސް ބުނަން ކެރުނު ކޮންމެ މީހަކީ އެއީ ﷲގެ ހަޟްރަތުގައި ލޮބުވެތިކަން ބޮޑު މީހެއް ކަމަށް ވެސް އޭނަ ވިދާޅުވިއެވެ.

ވަހީދު ވިދާޅުވީ ދިވެހި ރައްޔިތުންނަށް އަނިޔާއަކީ ކޮބައިކަމާއި، އަނިޔާވެރިކަން އިސްކުރަނީ ކޮން ބައެއްކަން ވަރަށް ސާފުކޮށް އެނގެން އެބަ އޮތް ކަމަށެވެ. މިހާލަތުގައި އަނިޔާވެރިކަން އިސްކުރާ ބަޔަކަށް ދިވެހިން ތާއީދު ނުކުރާނެ ކަމަށް ވަހީދު ވިދާޅުވިއެވެ.

"އަނިޔާވެރިކަމަކީ އެއީ އަޅުގަނޑުމެން ﷲ ނަންފުޅު ބޭނުންކޮށްފައި އޭގެފަހުން އަނިޔާވެރިކަން އިތުރުކުރަން ޖާގަދޭ ކަމެއް ނޫން. އަނިޔާވެރިކަން އިތުރުކޮށްފައި އިސްލާމްދީން އޮތް ޖާގައެއްނޫން. އެކަމެއް އިސްލާމީ ޝަރީއަތަކުން ހުއްދަކޮށްފައި ނުވޭ." ވަހީދު ވިދާޅުވިއެއެވެ.

މެންބަރު ވަހީދު ވިދާޅުވީ އަނިޔާވެރި ވެރިއަކާ ދެކޮޅަށް އިސްލާހަށް މަސައްކަތް ކުރުމުގެ ނަތީޖާއަކަށް ވެގެން ދިޔައީ އިއްތިހާދުގެ ހަތަރު ލީޑަރުން ޖަލުހައި ބަންދުވެ، އަނިޔާވެރިކަމުގައި ދުވަސްތައް ތަހައްމަލް ކުރަންޖެހުން ކަމަށެވެ. ވަހީދު ވިދާޅުވީ އަނިޔާވެރިކަން އިސްކުރާ ބަޔަކަށް ކާމިޔާބެއް ނެތް ކަމަށާއި، ކާމިޔާބަކީ އިންސާފަށް މަސައްކަތް ކުރާ ބައެއްގެ ހައްގެއްކަމަށެވެ.

އެގޮތުން އިސްލާހަށް ފެށި މަސައްކަތުގެ ފޮނި ނަތީޖާ ދާދި އަވަހަށް ފެންނާނެ ކަމަށް ވަހީދު ވިދާޅުވިއެވެ.