ވީހާވެސް އަވަހަކަށް ރީރެޖިސްޓްރީ ކުރެއްވުމަށް އިބޫ ގޮވާލައްވައިފި

މިއަހަރުގެ ސެޕްޓެމްބަރު މަހު ބާއްވާ ރިޔާސީ އިންތިޚާބުގައި ރަށްވެފައިވާ ރަށް ނޫން އެހެން ރަށެއްގައި ވޯޓު ލާނަމަ ވީހާވެސް އަވަހަކަށް ރީ ރެޖިސްޓްރީ ކުރެއްވުމަށް ގުޅިފައިވާ ސިޔާސީ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) ގޮވާލައްވައިފި އެވެ.

އަންގާރަ ދުވަހުގެ ރޭ އިބޫ ކުރައްވާފައިވާ ޓްވީޓްގައި ވަނީ ރަށްވެހިވެފައިވާ ރަށް ނޫން އެހެން ރަށެއްގައި 23 ސެޕްޓެމްބަރުގައި ވޯޓު ލާނަމަ ވީހާވެސް އަވަހަށް 11 އޮގަސްޓްގެ ކުރިން ރީރެޖިސްޓްރީ ކުރެއްވުމަށް އެދޭ ކަމަށެވެ.

ރަށް ވެހިފައިވާ ރަށް ނޫންތަނެއްގައި ވޯޓު ލުމަށް ބޭނުންވާ ފަރާތްތަކުން މިމަހުގެ 17 އިން އޮގަސްޓް މަހުގެ 11 އަށް ރީ-ރަޖިސްޓްރީވުމަށް އިލެކްޝަން ކޮމިޝަނުން ވަނީ އެދިފައެވެ.

މިފުރުސަތު ހުޅުވާލުމާ އެކު އިލެކްޝަން އެކޮމިޝަންގެ ވެބްސައިޓުން ވެސް ފޯމް ޑައުންލޯޑް ކުރެވޭނެ ކަމަށް އެކޮމިޝަނުން މައުލޫމާތުދެއެވެ.

ރީ-ރަޖިސްޓްރޭޝަނަށް އިލެކްޝަން ކޮމިޝަނުން ބުނީ ރަށްވެހިވެފައިވާ ރަށް ނޫން ރާއްޖޭގެ އެހެން ރަށަކަށް ވޯޓުލުމަށް ރަޖިސްޓަރީވުމަށް އެދޭ ފަރާތްތަކަށް ފޯމު ދޫކުރުމާއި ފޯމުތައް ބަލައިގަތުމަށް ހަމަޖެހިފައި ވަނީ ރާއްޖޭގެ ހުރިހާ ރަށެއްގެ ރަށު ކައުންސިލް އިދާރާތަކުންނާއި، އައްޑޫ ސިޓީ އަދި ފުވައްމުލަކު ސިޓީގެ އަވަށްތަކުގެ އޮފީސްތަކުންނާއި މާލޭ ސިޓީގައި ނަމަ އިންތިހާބީ މަރުކަޒު (ބައު ޖަމާލުއްދީން) އިން ކަމަށެވެ. ކޮމިޝަނުން ބުނީ ހުޅުމާލޭގެ ކޮމިއުނިޓީ ސެންޓަރުންނާއި، ވިލިނގިލި މޯބައިލް ސްޓޭޝަނުން ވެސް ފޯމު ދޫކުރުމާއި ފޯމު ބަލައިގަތުމަށް ހަމަޖެހިފައިވާ ކަމަށެވެ.

އަދި ރާއްޖެއިން ބޭރުގައި ބަހައްޓާ ވޯޓު ފޮށިތަކަށް ވޯޓުލުމަށް ރަޖިސްޓަރީވުމަށް އެދޭ ފަރާތްތަކަށް ފޯމު ދޫކުރުމާއި ފޯމުތައް ބަލައިގަތުމަށް ހަމަޖެހިފައިވަނީ ޓްރިވެންޑްރަމްގެ ކޮންސިއުލޭޓް އޮފީހުންނާއި ކޮލޮމްބޯގައި ހުންނަ ރާއްޖޭގެ އެމްބަސީންނެވެ.