ނުކުޅެދުންތެރިކަން ހުންނަ މީހުނަށް އިލެކްޝަނުގެ އޮފިޝަލުން ފާހަގަ ޖަހައިދިނުމަކީ ހައްގުތަކަށް އަރައިގަތުން: މާރިޔާ
17 ޖުލައި 2018 | އަންގާރަ 15:49މީގެ ކުރިން ނުކުޅެދުންތެރިކަން ހުންނަ މީހުންނަށް ބޭނުންވާ މީހަކާ އެކު ގޮސް ވޯޓުލެވޭ
އިންތިހާބެއްގައި ވޯޓު ކަރުދާސް ގުނުމަށް އިލެކްޝަންސް ކޮމިޝަނުގެ އޮފިޝަލުންތަކެއް ހަރަކާތްތެރިވަނީ
ޖިސްމާނީ ގޮތުން ނުކުޅެދުންތެރިކަން ހުންނަ މީހުންގެ ވޯޓު ކަރުދާހުގައި އިލެކްޝަންސް ކޮމިޝަނުގެ އޮފިޝަލުން ފާހަގަ ޖަހައިދޭ ގޮތަށް އެ ކޮމިޝަނުން ނިންމުމަކީ ނުކުޅެދުންތެރިކަން ހުންނަ މީހުންގެ ހައްގުތަކަށް އަރައިގަތުން ކަމަށް އެމްޑީޕީގެ ރިޔާސީ ކެންޑިޑޭޓް އިބްރާހިމް މުހައްމަދު ސޯލިހުގެ ތަރުޖަމާނު މާރިޔާ އަހްމަދު ދީދީ ވިދާޅުވެއްޖެ އެވެ.
ސޯލްޓް ކެފޭގައި އަންގާރަ ދުވަހުގެ މެންދުރު ފަހު ބޭއްވި ނޫސްވެރިންގެ ބައްދަލުވުމެއްގައި މާރިޔާ ވިދާޅުވީ ޖިސްމާނީ ނުކުޅެދުންތެރިކަން ހުންނަ މީހުންގެ ވޯޓު ކަރުދާސްކޮޅުގައި އިލެކްޝަންސް ކޮމިޝަނުގެ އޮފިޝަލުން ފާހަގަ ޖަހާ ގޮތަށް ނިންމުމަކީ އަނެއްކާ ވެސް އިންތިހާބާ މެދު ޝައްކާއި ވަހުމް އުފެދޭނެ ކަމެއް ކަމަށެވެ.
"އެމީހުންނަކީ ހާއްސަ އެހީއަށް ބޭނުންވާ ބަޔަކަށް ވިއަސް އެމީހުންނަކީ އެމީހަކު އަމިއްލައަށް އިހްތިޔާރު ނުކުރެވޭ ވަރުގެ ބައެއް ނޫން ކާކަށްތޯ ވޯޓުލާނީ. އެވަރު ނޭންގެންޏާ އެ ހައްގެއް ނޯންނާނެ ވޯޓުލާކަށް. ތިމަންނަ މި ކުރަނީ ކީއްކަން ނޭނގޭ އެއްވެސް މީހަކަށް ވޯޓު ލާން ފުރުސަތު ދިނުމަކީ ދުނިޔޭގެ އެއްވެސް ގައުމެއްގައި އޮންނަ ކަމެއް ނޫން. އެނޫން ބޭފުޅުންނަށް ވޯޓު ފާހަގަ ޖަހައިދޭނީ އިލެކްޝަންސް ކޮމިޝަނުގެ އޮފިޝަލެކޭ ބުނުމަކީ ތިބޭފުޅާއާއި އަޅުގަނޑަށް ވެސް އިލެކްޝަނުގެ އޮފިޝަލަކޭ ފާހަގަ ޖަހާދޭނީ ބުނުން ކަހަލަ ކަމެއް،" މާރިޔާ ވިދާޅުވި އެވެ.
ކުރިން އޮންނަ އުސޫލަކީ ޖިސްމާނީ ނުކުޅެދުންތެރިކަން ހުންނަ މީހުންނަށް ފާހަގަ ޖަހައިދެނީ އޭނާގެ އެހީތެރިއަކަށް ހަމަޖައްސާފައިވާ މީހާ އެވެ. އިލެކްޝަންސްގެ އޮފިޝަލުން، ނުކުޅެދުންތެރިކަން ހުންނަ މީހުންނަށް އެހީތެރިވެދިނުމުގެ ފުރުސަތު ދިނުމަށް މިދިޔަ ހަފްތާގައި ވަނީ އިންތިހާބުތަކާ ބެހޭ އާންމު ގާނޫނަށް އިސްލާހުވެސް ގެނެސްފަ އެވެ. އިންތިހާބުތަކާ ބެހޭ އާންމު ގާނޫނުގެ 45 ވަނަ މާއްދާގެ ށ. ގައި ކުރިން ބުނެފައިވާ ގޮތުން ޖިސްމާނީ ގޮތުން ނުކުޅެދުންތެރިކަން ހުންނަ މީހުން ވޯޓު ކަރުދާހުގައި ފާހަގަ ޖެހުމުގައި އިތުރު މީހަކަށް އެހީތެރިވެވިދާނެ އެވެ. ނަމަވެސް ކޮންމެ އެހީތެރިއަކަށް ވެސް އެހީތެރިވެދެވޭނީ ވޯޓު ލާން އަންނަ އެކަކަށް ކަމަށް ބުނެފައިވެ އެވެ. މިދިޔަ ހޯމަ ދުވަހު އެ މާއްދާ އަށް ވަނީ އިސްލާހު ގެނެސްފަ އެވެ.
ރަށްވެހިވެފައިވާ ރަށް ނޫން އެހެން ރަށެއްގައި އެހެން ތަނެއްގައި ވޯޓުލުމަށް ރަޖިސްޓްރީ ކުރުމަށް ހުޅުވާލާފައި ވާތީ މާރިޔާ ވިދާޅުވީ ރީ ރަޖިސްޓްރީ ފޯމް އިލެކްޝަނަށް ހުށައެޅުމަށް ގުޅިފައިވާ ޕާޓީތަކުން މަސައްކަތް ކޮށްދޭނެ ކަމަށެވެ. އެގޮތުން ގުޅިފައިވާ ޕާޓީތަކުގެ ޖަގަހަތަކާއި ޕާޓީ އޮފީހަށް ގޮސްގެން ވެސް ރީ ރަޖިސްޓްރޭޝަން ފޯމް ހުށައެޅޭނެ ކަމަށް އޭނާ ވިދާޅުވި އެވެ. މީގެ އިތުރުން މާރިޔާ ވަނީ މިއަހަރުގެ ރިޔާސީ އިންތިހާބުގައި ހަތް ރިސޯޓެއްގައި ވޯޓުފޮށި ބަހައްޓަން ހަމަ ޖައްސާފައި ވާތީ އެއީ ރިސޯޓްތަކުގައި މަސައްކަތްކުރާ މުވައްޒަފުންގެ އަދި ރިސޯޓްތަކުގެ ވެރިފަރާތްތަކުގެ ހައްގުތަކެއް ގެއްލިގެންދާނެ ކަމެއް ކަން ވެސް މި ބައްދަލުވުމުގައި ވެސް ފާހަގަ ކުރައްވާފަ އެވެ.
"ކުރިން ފަހަރު އެ ބޭފުޅުންގެ ވޯޓު ބޭނުން ވެގެން ރިސޯޓްތަކުގެ ހިއްސާ ރިސޯޓްތަކުގައި މަސައްކަތްކުރާ މީހުނަށް ދެއްވާނެ ކަމަށް ވިދާޅުވެ ވަޑައިގެން ބޭފުޅުން މިއަދު އެ ބޭފުޅުންގެ އެންމެ އަސާސީ ހައްގު، ވޯޓު ދިނުމުގެ ހައްގު ގެއްލުވާލައި އެ ގޮތަށް މަސައްކަތްޕުޅު ކުރައްވާތީ އަޅުގަނޑުމެން ކަންބޮޑުވޭ،" މާރިޔާ ވިދާޅުވި އެވެ.
އެކެއް ފެބްރުއަރީގެ އަމުރަކީ މުޅި ދުނިޔެއިން މަލާމާތްކުރި އަމުރެއް ކަމަށް ރައީސް އަބްދުﷲ ޔާމިން ވިދާޅުވެފައިވާ ވާހަކަފުޅަށް ވެސް މާރިޔާ ވަނީ ރައްދު ދެއްވާފަ އެވެ. މާރިޔާ ވިދާޅުވީ 12 މެމްބަރުންގެ ގޮނޑި ނުގެއްލޭ ކަމަށާއި ބައެއް ސިޔާސީ ފަރާތްތަކުގެ މައްޗަށް ޝަރީއަތްތައް ހިންގާފައި ވަނީ ރަނގަޅަށް ނޫން ކަމަށް ކަނޑައަޅައި ފެބްރުއަރީ އެއް ވަނަ ދުވަހު ނެރުނު އަމުރަށް މުޅި ދުނިޔެއިން މަރުހަބާ ކީ އަމުރެއް ކަމަށެވެ. އަދި އެކެއް ފެބްރުއަރީގެ އަމުރަށް ފާޑު ވިދާޅުވަމުން ގެންދަވާއިރު އުއްތަމަ ފަނޑިޔާރު ވެސް ހިމެނިވަޑައިގަންނަވާ ގޮތަށް މިހާރު ވެސް ތިއްބެވި ތިން ފަނޑިޔާރުންނަކީ އެ އަމުރު ނެރުނު ފަނޑިޔާރުންކަން ވެސް މާރިޔާ ފާހަގަ ކުރެއްވި އެވެ.
