މިނިވަން އިންސާފުވެރި އިންތިހާބެއް ބޭއްވުމަށާއި ސިޔާސީ ހައްޔަރީން މިނިވަން ކުރުމަށް ގޮވާލައި ގުޅިފައިވާ ސިޔާސީ ޕާޓީތަކުން ކުރިޔަށް ގެންދަން ނިންމި ހިނގާލުން ހުއްޓުވައި މަޑުއްވަރީ ދާއިރާގެ މެމްބަރު މުހައްމަދު އަމީތު ހައްޔަރުކޮށްފިއެވެ.
ދިވެހި ސަރުކާރުން އަމަލުކުރަމުންދާ ގޮތުން މިނިވަން އިންސާފުވެރި އިންތިހާބެއް ބޭއްވޭނެ ފުރުސަތެއް ނެތް ކަމަށާއި މިހާރު އޮތް އިލެކްޝަންސް ކޮމިޝަން ބަދަލުކުރަންޖެހޭ ކަމަށް އިދިކޮޅު ޕާޓީތަކުން ބުނަމުން ދާއިރު، މިނިވަން އިންސާފުވެރި އިންތިހާބެއް ހޯދައި، ސިޔާސީ ހައްޔަރީން ދޫކޮށްލުމަށް ގޮވާލައި ހިނގާލުން ފެށީ އެމްޑީޕީގެ އޮފީސް ދޮރުމަތިންނެވެ. ނަމަވެސް ފުލުހުން ވަނީ އެމްޑީޕީ އޮފީސް ކުރިމަތިން ހިނގާލުން ފަށުމާ އެކު ހުއްޓުވައި، އެއްވުމުގެ ބައިވެރިން ސޯސަން މަގަށް ނުކުތުމަށް ވެސް ހުރަސް އަޅާފައެވެ. އެސްއޯ ފުލުހުން ވަނީ ދެފަރާތުން ވެސް މަގު ބަންދުކޮށް އެއްވުމުގެ ބައިވެރިން ކުރިޔަށް ދިޔުމަށް ހުރަސް އަޅާފައެވެ. 
އެމްޑީޕީގެ ދޮރުމަތީގައި ހުންނަވަނިކޮށް އަމީތު ހައްޔަރު ކުރި ސަބަބެއް ނޭނގެއެވެ. އަމީތު ހައްޔަރުކުރުމާއި ގުޅިގެން ގުޅިފައިވާ ސިޔާސީ ޕާޓީތަކަށް ނިސްބަތް ވަޑައިގަންނަވާ ރައްޔިތުންގެ މަޖިލީހުގެ މެމްބަރުންނާއި ޕާޓީތަކުގެ ލީޑަރޝިޕްގެ އިސްބޭފުޅުން ވަނީ ކަންބޮޑުވުންފާޅުކޮށްފައެވެ.
މި އެއްވުމުގައި ރައްޔިތުން މަޖިލީހުގެ މެމްބަރުންނާއި ގުޅިފައިވާ ސިޔާސީ ޕާޓީތަކުގެ އިސް ބޭފުޅުން ބައިވެރިވެވަޑައިގެންނެވިއެވެ. ގިނަ ދުވަސްތަކަކަށް ފަހު އެމްޑީޕީން ހިނގާލުމެއް މި ބޭއްވީ ދިވެހި ސަރުކާރުގެ ވެރިންނާއި ސަރުކާރާ ވިޔަފާރިވެރިންނާމެދު ދަތިކުރުމުގެ ފިޔަވަޅު އެޅުމުގެ މައްސަލަ މާދަމާއަށް އެޖެންޑާކޮށްފައި ވަނިކޮށެވެ. އަމީތު ހައްޔަރުކުރިއަސް، އިތުރު މީހަކު ހައްޔަރެއް ނުކުރެ އެވެ.