ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސާލިހު (އިބޫ)ގެ ރަނިންގ މޭޓުގެ މަގާމަށް ކުރިމަތިލައްވާފައިވަނީ ހަތަރު ބޭފުޅުން ކަމަށާއި އެ ބޭފުޅުންގެ ޝަރުތު ހަމަވާ ކަމަށް ޖުމްހޫރީ ޕާޓީން ބުނެފިއެވެ.
ގުޅިފައިވާ ޕާޓީތަކުގެ ރަނިންގ މޭޓުގެ މަގާމަށް ކުރިމަތިލައްވާފައި ވަނީ ޖޭޕީގެޑެޕިއުޓީ ލީޑަރުޑރ. ހުސައިން ރަޝީދު ހަސަން ރައީސް އޮފީހުގެ ކުރީގެ މިނިސްޓަރު އަބްދުﷲ އަމީނާއި ކާށިދޫ ދާއިރާގެ މެމްބަރު ފައިސަލް ނަސީމާއި ކެންދޫ ދާއިރާގެ މެމްބަރު އަލީ ހުސައިންނެވެ.
ރަނިން މޭޓަކު ހޮވުމަށް މިރޭ ބާއްވާ ޖޭޕީގެ ކައުންސިލްގައި ނަގާ ވޯޓަށް ކެންޑިޑޭޓުންގެ ނަން ތަރުތީބުކޮށްފައިވަނީ ތިރީގައި މިވާ ގޮތަށެވެ.
1. ޑރ. ހުސައިން ރަޝީދު ހަސަން
2. އަބްދުﷲ އަމީން
3. އަލީ ހުސައިން
4. ފައިސަލް ނަސީމް
JP council gai negey vote gai candidate number 3 libillevi @AleeVoice adhi 4 libillevi @FaisalNasym pic.twitter.com/OacdJjyKCK
— raajje.mv (@raajjemv) July 13, 2018
ރަނިން މޭޓްގެ މަގާމަށް ޝައުގުވެރިކަން ފާޅުކުރެއްވި އެ ޕާޓީގެ ނާއިބު ރައީސް އަބްދުﷲ މައުސޫމް އެ މަގާމަށް ކުރިމަތިލައްވާފައެއް ނުވެއެވެ. މައުސޫމް ވިދާޅުވީ ކުރިމަތިނުލެއްވީ ޕާޓީ ހިންގެވުމުގައި މުހިންމު ދައުރެއް އަދާކުރެއްވުމަށްޓަކައި ކަމަށެވެ. މީގެ އިތުރުން ކުރިން މި މަގާމަށް އެކަށީގެންވާ ކަމަށް ޖޭޕީގެ ބައެއް ބޭފުޅުން ލަފާދެއްވި ޕާޓީގެ ބާނީ ގާސިމް އިބްރާހީމްގެ ހަގު އަނބިކަނބަލުން އަދި ކައުންސިލް މެންބަރު އާއިޝަތު ނަހުލާ ވެސް ވެސް ވަނީ ޝައުގުވެރިކަން ނެތް ކަމަށް ވިދާޅުވެފައެވެ.
ހުކުރު ދުވަހު މ. ކުނޫޒްގައި ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ސެކެރެޓަރީ ޖެނެރަލް އަހްމަދު ސަމީރު ވިދާޅުވީ ހުރިހާ ބޭފުޅުންގެ ޝަރުތު ހަމަވާ ކަމަށް ކަނޑައަޅާފައިވާ ކަމަށާއި ސިއްރު ވޯޓުލުން ހުކުރު ދުވަހުގެ ރޭ 21:00 ގައި ކުރިއަށް ދާނެ ކަމަށެވެ. އަދި އެ ޕާޓީގެ ކައުންސިލް ބައްދަލުވުމެއް 20:30 ގައި މިރޭ ކުރިއަށްދާނެ ކަމަށް ވެސް ސަމީރު ވިދާޅުވިއެވެ.
ގުޅިފައިވާ ޕާޓީތަކުގެ ރިޔާސީ ކެންޑިޑޭޓް އިބްރާހިމް މުހައްމަދު ސާލިހު (އިބޫ)ގެ ރަނިންގ މޭޓުގެ މަގާމަށް ބޭފުޅަކު ހޮވުމަށްޓަކައި ޖުމްހޫރީ ޕާޓީގެ ކައުންސިލް މެމްބަރުންގެ މެދުގައި ނަގާ ތާރީހީ ސިއްރު ވޯޓުގައި ކައުންސިލްގެ 41 މެމްބަރަކު ވޯޓު ދޭނެ ކަމަށް އެ ޕާޓީން ވަނީ ބުނެފައެވެ. ނަމަވެސް ކުރީގެ ލީޑަރު ގާސިމަށް ވޯޓުގައި ބައިވެރިވަޑައެއް ނުގެންނެވޭނެއެވެ.
މީގެ އިތުރުން ރައީސް ނަޝީދު ބުރާސްފަތި ދުވަހު ކުރެއްވި ޓްވީޓެއްގައި ވިދާޅުވީ ރިޔާސީ އިންތިހާބުގައި ޖޭޕީގެ ފަރާތުން ކަނޑައަޅާ ރިނިންގ މޭޓަކު ނިންމުމަށް ޖޭޕީގެ ކައުންސިލްގައި ނަގާ ވޯޓު، ކޮންމެ ބޭފުޅަކު ކާމިޔާބު ކުރެއްވި ކަމުގައިވީ ނަމަވެސް އެ ނަތީޖާ އެމަނިކުފާނު އަމިއްލަ ގޮތުން އަދި އެމްޑީޕީން ވެސް ބަލައިގަންނާނެ ކަމަށެވެ. އަދި އެމަނިކުފާނު ވަނީ މި ޓުވީޓުގައި ހުރިހާ ކެންޑިޑޭޓުންނަށް މަރުހަބާ ދަންނަވާފައެވެ.
