ވިހި އަހަރު ފަހުން މާދުރީ އޭނާގެ ކުރީގެ ލަވައަކަށް ނަށައިފި
12 ޖުލައި 2018 | ބުރާސްފަތި 05:47މި ލަވައަށް މާދުރީ ނަށާފައި ވަނީ ރިއަލިޓީ ޝޯ "ޑާންސް ދީވާނޭ" ގައި
މާދުރީ ޑިކްސިޓް: ނެށުމުގައި ފާހަގަކޮށްލެވޭ ތަރިއެއް
ބޮލީވުޑްގެ "ޑާންސިން ކުއީން" ގެ ނަމުން މަޝްހޫރު ވެފައިވާ ބަތަލާ މާދުރީ ޑިކްސިޓް އޭނާގެ ކުރީގެ ލަވައަކަށް ނަށައިފިއެވެ.
މާދުރީ ނަށާފައި ވަނީ 1995 ވަނަ އަހަރު ރިލީޒްކުރި އޭނާގެ ފިލްމް "ރާޖާ" ގެ ލަވައެއް ކަމަށްވާ "އަކިޔަ މިލައުން" އަށެވެ. އޭނާ އެ ޑާންސްކޮށްފައި ވަނީ ރިއަލިޓީ ޝޯ " ޑާންސް ދީވާނޭ" ގައެވެ.
އެލަވައަށް މާދުރީ ނަށާފައިވާއިރު މީގެ 20 އަހަރު ކުރިން ނެށިގޮތާ އެއްވެސް ތާފަތު ކަމެއް ނެތްކަން ވަނީ ފާހަގަ ކުރެވިފައެވެ.
މި ޝޯގައި މާދުރީ ވަނީ މިހިނގާ ޖުލައި މަހުގެ 20 ގައި ރިލީޒްކުރާ ފިލްމް "ދަޅަކް" ގެ ދެ ތަރިން ކަމަށްވާ އިޝާން ކޭތަރް އާއި ޖާންވީ ކަޕޫރާ އެކު ވަގުތު ހޭދަކޮށްފައެވެ. އަދި މި ޝޯގެ ތެރެއިން އެންމެން އެކުގައި ނަގާފައިވާ ސެލްފީއެއް މާދުރީ ވަނީ އޭނާގެ އިންސްޓަގްރާމުގައި ޝެއަރ ކޮށްފައެވެ.
މާދުރީ އެންމެ ފަހުން ފިލްމަކުން ފެނިފައި ވަނީ އޭނާގެ ފުރަތަމަ މަރާތީ ފިލްމް "ބަކެޓް ލިސްޓް" އިންނެވެ.
ދެން އެންމެ އަވަހަށް މާދުރީ ފެނިގެންދާނީ އަންނަ އަހަރުގެ އޭޕްރީލް މަހުގެ 19 ގައި ރިލީޒް ކުރުމަށް ހަމަޖެހިފައިވާ "ކަލާންކް" އިންނެވެ. މިފިލްމްގައި މާދުރީއާ އެކު ފެނިގެންދާނީ އާލިއާ ބަޓް، ވަރުން ދަވަން، ސަންޖޭ ދަތު، އަދިތްޔާ ރޯއީ ކަޕޫރު، ސޯނާކްޝީ ސިންހާގެ އިތުރުން ކްރިތީ ސެނޯންއެވެ.
