ތައިލެންޑްގެ ހޮހޮޅައިގައި ތާށިވީ ކުދިން ދިރިތިއްބާ ފެނިއްޖެ

ތައިލެންޑްގެ ހޮހަޅައެއްގެ ތެރޭގައި ތާށިވި ބާރަ ފިރެހެންކުދިންނާއި އެކުދިންގެ ފުޓްބޯޅަ ކޯޗް ނުވަ ދުވަހަށް ފަހު ހޮހަޅައިގެ ތެރެއިން ދިރިތިއްބާ ފެނިއްޖެއެވެ.

ޗިއާންގް ރާއިގެ ތަމް ލައުންގް ހޮހަޅައިގައި ތާށިވި އެކުދިން ހޯދާފައި ވަނީ، ފެންބޮޑުވެފައިވާ އެ ހޮހޮޅައިގެ ތެރޭގައި ހިކިފަސްތަނެއްގައި ތިއްބައި އިނގިރޭސިވިލާތުގެ ދެ ޑައިވަރުންނެވެ.

މިހާރު އޮތް ގޮންޖެހުމަކީ ފެންބޮޑުވެ ކިސަޑު ހެދިފައިވާ ހޮހޮޅައިގެ ތެރެއިން އެކުދިން ސަލާމަތުން ނެރުމުގެ މަސައްކަތެވެ.

ކުދިންގެ އާއިލަތަކުން ތިބީ ހޮހޮޅައިގެ ދޮރުމަތީގައި

އެކުދިން ފެނުނު ޚަބަރާ އެކު އާއިލާތކުން ތިބީ އުފަލުން ފޮޅިފައެވެ. ހޮހޮޅައިގައިތިބ ބާރަ ފިރެހެންކުދިންނަކީ މޫ ޕާ ނުވަތަ ވައިލްޑް ބޯރ ފުޓްބޯޅަ ޓީމުގެ މެމްބަރުންނެވެ.

އެނގިފައިވާ ގޮތުގައި އެކުދިންގެ އެސިސްޓެންޓް ކޯޗް، އުމުރުން 25 އަހަރުގެ އެއްކަޕޮލް ޖަންތަވޮންގ، އެކުދިން ގޮވައިންގެން ދޭތެރެ ދޭތެރެއިން ދަތުރުގޮސް އުޅެއެވެ. މީގެ ދެ އަހަރެއްހާ ދުވަސް ކުރިން ވެސް މި ހޮހޮޅައަށް ކޯޗު ދަތުރުދިޔައެވެ. މި ފަހަރު އެ ކުދިން ހޮހަޅައިގައި ތާށިވީ ދަތުރު ގޮސް އުޅެނިކޮށް ފެންބޮޑުވެ ކިސަޑު ފޭބުމާ ގުޅިގެން ނުކުންނަން އޮތް މަގު ބަންދުވުމެވެ.

މީހުން ސަލާމަތްކުރުމަށް ހިންގާ ބޮޑު އޮޕަރޭޝަނުގައި މިހާރު ވެސް 1،000 އަށް ވުރެ ގިނަ މީހުން މަސައްކަތްކުރަމުންދާއިރު އޭގެ ތެރޭގައި ޗައިނާ އާއި، މިޔަންމާ އާއި، ލާއޯސް އާއި، އޮސްޓްރޭލިއާ އާއި، އެމެރިކާގެ އިތުރުން އިނގިރޭސިވިލާތުގެ ޓީމެއް ހިމެނެއެވެ.