ރާއްޖެއަށް ބޭނުންވާ ހަނޑުލާއި ހަކުރާއި ފުށުގެ އަދަދު ކަނޑައަޅަންޖެހޭނީ  އެހެން ބަޔަކު ނޫން ކަމަށާއި އެކަންކަން ކުރަންޖެހޭނީ ދިވެހިން ކަމަށް އިކޮނޮމިކް މިނިސްޓަރ މުހައްމަދު ސައީދު ވިދާޅުވެއްޖެއެވެ.

އޮޑިޓަރ ޖެނެރަލް އޮފީހުން ކުރިއަށްގެންދާ މޯލްޑިވްސް އެކައުންޓެންޓްސް ފޯރަމް 2018 ފެށުމުގެ ރަސްމިއްޔާތުގައި ވާހަކަދައްކަވަމުން ސައީދު ވިދާޅުވީ، މިނިވަންކަމަކީ ހަމައެކަނި ދިދައެއް ހުރެގެން ވިހުރުމެއް ނޫން ކަމަށާއި ދިވެހިންނަކީ ދިވެހި ގައުމަށް ކުރިއަށް އޮތް މުސްތަގްބަލުގައި ބޭނުންވާނެ ކާބޯތަކެތީގެ މިންވަރު ދެނެގަނެ އަދަދުތައް ކަނޑައެޅުމުގެ ގާބިލްކަން ލިބިގެންވާ ގައުމެއް ކަމަށެވެ. އަދި ފުރިހަމަ މިނިވަންކަން ލިބޭނީ އޭރުން ކަމަށް މިނިސްޓަރ ވިދާޅުވިއެވެ.

"ދިވެހި ޓެލެންޓް ކުރި ހޯދާނެ. އޭގެ ތެރޭގައި އެކައުންޓެންޓުން ހިމެނޭ. އޭގެ ތެރޭގައި ފައިނޭންޝިއަލް ޕްރޮފެޝަންގައި އުޅުއްވާ ބޭފުޅުން ހިމެނޭނެ. މިއަދު މިދައްކަނީ އެކައުންޓެންޓުންގެ ޕްރޮފެޝަންއަކީ ނުވަތަ މިދާއިރާއަށް ނުކުންނަ ޒުވާނުންނަކީ އަޅުގަނޑުމެންގެ އަމިއްލަ މިނިވަންކަމުގައި މިކަން ކުރެވިދާނެ ބައެއްތޯ. ނުވަތަ އިހްތިރާމު ހޯދިދާނެތޯ. އެވަރުގެ ޓްރަސްޓެއް އަޅުގަނޑުމެންނަށް ބިލްޑް ކުރެވިދާނެ. މިއީ އެއްވެސް ޝައްކެއް ނެތް ކުރެވިދާނެ ކަންކަން،" ސައީދު ވިދާޅުވިއެވެ.

މިނިސްޓަރ ސައީދު ވިދާޅުވީ، ރިޕޯޓްތަކުން ހާމަކޮށްފައިވާ ގޮތުގައި ދިވެހިރާއްޖެ ހުރަސްކޮށް ކޮންމެ ދުވަހަކު 40 މިލިއަން ފީފާ ތެޔޮ ޓްރާންސްޕޯޓް ކުރެވޭ ކަމަށާއި މިކަންކަމުގެ ތެރެއިން ވެސް ދިވެހި އިގްތިސާދަށް ފައިދާ  ކުރާނެ ކަންކަން ކުރެވޭނެ ކަމަށެވެ.

"މިވިޔަފާރިން ކެޕިޓަލައިޒް ކުރުމަށް ސަރުކާރުން ކުރެވޭނެ ކަންތައްތައް ބެލިދާނެ. އިންސްފްރާންސްޓްރަކްޗަރ ވަރުގަދަކުރާނީތޯ، މިނިވަން ވިޔަފާރީގެ ތެރެއިން ކަންކަންކުރާނީތޯ ސްޓޯރޭޖް ކެޕޭސިޓީ ވަރުގަދަ ކުރާނީތޯ. މިއީ ހޯދިދާނެ ކަންކަން،" މިނިސްޓަރ ވިދާޅުވިއެވެ.

މިފަދަ ކަންކަމަކީ އެކައުންޓެންޓުންނާއި ފައިނޭންޝިއަލް ދާއިރާގައި މަސައްކަތްކުރާ ފަރާތްތަކުން ތިލަކުރަންޖެހޭ ކަންކަން ކަމަށާއި ގައުމެއް ތަރައްގީ ކުރެވޭނީ ކްރިޓިކްސް އާއި ބިނާ ކުރުވަނިވި ހިޔާލުގެ ތެރެއިން ކަމަށެވެ.

މިނިސްޓަރ ވިދާޅުވީ، ދިވެހިންނަށް ދުނިޔޭގެ އެންމެ ވަރުގަދަ ޓުއަރިސްޓް ޕްރޮޑަކްޓް އުފެއްދިފައިވާ ކަމަށާއި ކުރިއަށް އޮތްތަނުގައި ތަފާތު އެކި ދާއިރާއިން ގާބިލް ޒުވާނުން އުފެއްދުމުގެ މަސައްކަތް މިހާރު ކުރެވެމުންދާ ކަމަށެވެ. ކުރިއަށް އޮތްތަނުގައި މިފަދަ ކަންކަން ހާސިލް ކުރެވޭނެ ކަމަށް އޭނާ ވިދާޅުވިއެވެ.

މި ރަސްމިއްޔާތުގައި ވާހަކަ ދައްކަވަމުން އޮޑިޓަރ ޖެނެރަލް ހަސަން ޒިޔަތު ވިދާޅުވީ އެކައުންޓިންގ ދާއިރާ ހަރުދަނާ ކުރުމަށް ކުރިއަށް އޮތްތަނުގައި ގިނަ މުހިއްމު މަސައްކަތްތަކެއް ކުރެވޭނެ ކަމަށާއި މިފަދަ ފޯރަމެއްގެ ތެރެއިން ވެސް ދާއިރާ ހަރުދަނާކުރުމަށް ގިނަ ކަންތައްތަކެއް ފަހިވެގެންދާނެ ކަމަށެވެ.

މޯލްޑިވްސް އެކައުންޓެންޓްސް ފޯރަމް 2018 ކުރިއަށްދަނީ ޖުލައި 02 އިން ޖުލައި 05 ވަނަ ދުވަހުގެ ނިޔަލަށެވެ. މިއީ މިގޮތަށް ބާއްވާ ދެވަނަ ފޯރަމެވެ.