އިންޑިއާގެ ނިއު ދިއްލީގައި ދިރިއުޅޭ 11 މީހުންގެ ބޮޑު އާއިލާއެއް އަމިއްލައަށް މަރުވެއްޖެއެވެ.
އާއިލާގެ 10 މީހުން ދަންޖެހިގެން މަރުވެފައިވާއިރު، އެކަކު މަރުވެފައި އޮތީ ބިންމަތީގައެވެ. އެއީ އުމުރުން 70 އަހަރުން މަތީގެ މީހެއް ކަމަށް ފުލުހުން ބުނެއެވެ. އެ އާއިލާގައި ހަތް އަންހެނުންނާއި ހަތަރު ފިރިހެނުން ތިބޭއިރު، އޭގެ ތެރޭގައި ކުޑަ ދެ ކުދިން ވެސް ހިމެނެއެވެ. އެ ކުދިންގެ އުމުރަކީ 15 އަހަރެވެ.
ރިޕޯޓްތައް ބުނާ ގޮތުން އެ މީހުން މަރުވެފައި ވަނީ އަމިއްލައަށެވެ. ސީލިންގްގައި ހަރުކޮށްފައިވާ ވާތަކުން ދަން ޖެހިފައިވާއިރު، އެމީހުން ތިބީ ކަނުބަނދެގެންނެވެ. އެކަން ކުރުމަށް އެމީހުންނަށް ހިތްވަރު ލިބުނީ އެމީހުންގެ އަގީދާގެ ސަބަބުން ކަމަށް ވެސް ރިޕޯޓްތައް ބުނެއެވެ. އޭގެ އިތުރުން މައްސަލަ ތަހްގީގުކުރާ ފުލުހުންނަށް ވެސް ބޮޑަށް ބުރަވެވެނީ ރިޕޯޓްތައް ބުނާ ގޮތަށެވެ. އެހެން ނަމަވެސް ފުލުހުން ވަނީ އެ ހަށިގަނޑުތަކުގެ އޮޓޯޕްސްސީ ހެދުމަށް ފޮނުވާލައި އެހެން ބައެއްގެ އަތެއް ވޭތޯ ބަލަން ފަށާފައެވެ.
ފުލުހުންނަށް މި މައްސަލަ ރިޕޯޓް ކުރީ އެ މަންޒަރު ދުށް އަވަށްޓެރިއެކެވެ. އޭނާ ހުރީ އޭގެ ފަހުން ޝޮކެއްގައި ކަމަށް ވެސް ފުލުހުން ބުނެއެވެ.
ފުލުހުން ބުނީ މިހާތަނަށް ކުރި ތަހްގީގުގައި އެއްވެސް ކަހަލަ އާދަޔާ ޚިލާފު ކަމެއް ނުފެންނަ ކަމަށެވެ. އެގޮތުން ގޭތެރޭގައި ހަމަނުޖެހުމެއް ހިންގާފައިވާކަން އެނގެން ނެތް ކަމަށާއި ތަނެއް ހަލާކުވެފައި ނުވަތަ ބަޔަކު އެމީހުން ލައްވާ ކުރި ކަމެއް ކަމުގެ ނިޝާނެއް ވެސް ފެންނަން ނެތް ކަމަށް ރިޕޯޓްކޮށްފައި ވެއެވެ. އެހެން ނަމަވެސް އެ އާއިލާ މީހުންނަށް ނިސްބަތްވާ އަތުލިޔުމެއް ފެނިފައިވާ ކަމަށާއި އޭގައިވާ މައުލޫމާތަށް ބަލާއިރު އެ މީހުން ދިޔައީ "އެއްފަހަރާ މަރުވާނެ ގޮތަކާ" މެދު ދިރާސާ ކުރަމުން ކަމަށް ވަރަށް ބޮޑަށް ގަބޫލު ކުރެވޭ ކަމަށް ފުލުހުން ބުނެފައި ވެއެވެ. އެހެން ނަމަވެސް މަރުވި ސަބަބެއް ނޭނގޭ ކަމަށް ވެސް ފުލުހުން ބުނެފައި ވެއެވެ.
