އެމްޑީޕީގެ ވެރިކަމެއްގައި ޖުޑިޝަލް ސާވީސް ކޮމިޝަން (ޖޭއެސްސީ)ގެ ދައުރުގެ މުއްދަތަކީ ތިން އަހަރަށް ބަދަލު ކުރާނެ ކަމަށް އެ ޕާޓީން ހާމަކޮށްފި އެވެ. 

ގާނޫނު އަސާސި މިހާރު އޮތް ގޮތުން ޖޭއެސްސީގެ މުއްދަތަކީ ފަސް އަހަރު ނަމަވެސް، އެ ޕާޓީގެ 2018 ވަނަ އަހަރުގެ މެނިފެސްޓޯގައި ބުނެފައި ވަނީ ޖޭއެސްސީގެ ދައުރު ކުޑަކުރުމަށްޓަކައި ގާނޫނު އަސާސީ ބަދަލުކުރާނެ ކަމަށެވެ. ގާނޫނު އަސާސީ ބަދަލުކުރުމަށްޓަކައި، މަޖިލީހުގެ 85 މެމްބަރުންގެ ތިން ބައިކުޅަ ދެބައި ވޯޓް ބޭނުންވެ އެވެ. 

އއ. އުކުޅަހުގައި ކުރިއަށްދާ އެމްޑީޕީގެ ތިން ވަނަ ކޮންގްރެސްގައި ހުށަހެޅި މެނިފެސްޓޯއާ ގުޅޭ ވީޑިއޯ ޕްރެޒެންޓޭޝަނުގައި އެ ޕާޓީގެ ލީގަލް ޑިރެކްޓަރު ހިސާން ހުސެއިން ވިދާޅުވީ ރައްޔިތުންގެ އިތުބާރު ހުރި ތަނަކަށް ފަނޑިޔާރުގެ ހެދުމަށްޓަކައި ޖުޑީޝަލް ސާވީސް ކޮމިޝަނަށް ބަދަލުތަކެއް ގެންނާނެ އެވެ. އެގޮތުން ޖުޑީޝަލް ސާވީސް ކޮމިޝަނުގެ މެމްބަރުންގެ ގޮތުގައި ފަނޑިޔާރުންނާއި މަގާމުގެ ހައިސިއްޔަތުން ވަޑައިގަންނަވާ ބޭފުޅުންގެ ބަދަލުގައި ތައުލީމީ ދިވެހި ރައްޔިތުން އައްޔަން ކުރާނެ ކަމަށް އޭނާ ވިދާޅުވި އެވެ.

ގާނޫނު އަސާސީގައިވާ ގޮތުން ޖޭއެސްސީ މިހާރު އެކުލެވިގެންވަނީ ރައްޔިތުންގެ މަޖިލީހުގެ ރައީސާއި، ސުޕްރިމް ކޯޓްގައި ހިމެނިވަޑައިގަންނަވާ ފަނޑިޔާރުންގެ ތެރެއިން، އުއްތަމަފަނޑިޔާރު ފިޔަވައި އެކޯޓުން އިންތިޚާބުކުރައްވާ ފަނޑިޔާރަކާއި، ހައިކޯޓްގައި ހިމެނިވަޑައިގަންނަވާ ފަނޑިޔާރުންގެ ތެރެއިން، އެކޯޓުން އިންތިޚާބުކުރައްވާ ފަނޑިޔާރަކާއި، ދަށު ކޯޓްތަކުގެ ފަނޑިޔާރުންގެ ތެރެއިން، އެކޯޓްތަކުން އިންތިޚާބު ކުރައްވާ ފަނޑިޔާރަކާއި، ރައްޔިތުންގެ މަޖިލީހުގެ މެންބަރުންގެ ތެރެއިން އެ މަޖިލީހުން ކަނޑައަޅުއްވާ މެންބަރަކާއި، ޢާންމުންގެ ތެރެއިން، ރައްޔިތުންގެ މަޖިލީހުން ކަނޑައަޅުއްވާ ބޭފުޅަކާއި، ސިވިލް ސާރވިސް ކޮމިޝަންގެ ރައީސާއި، ރައީސުލްޖުމްހުރިއްޔާ އައްޔަނު ކުރައްވާ ބޭފުޅަކާއި ދަޢުލަތުގެ ބަންޑާރަނައިބުގެ އިތުރުން ދިވެހިރާއްޖޭގައި ޤާނޫނީ ވަކީލުކަން ކުރެއްވުމުގެ ހުއްދަލިބިވަޑައިގެންފައިވާ ވަކީލުންގެ ތެރެއިން، އެބޭފުޅުން އިންތިޚާބުކުރައްވާ ވަކީލެއްގެ މައްޗަށްށެވެ  

ސުޕްރިމް ކޯޓްގައި ހިމެނިވަޑައިގަންނަވާ ފަނޑިޔާރުންގެ ތެރެއިން، އުއްތަމަފަނޑިޔާރު ފިޔަވައި އެކޯޓުން އިންތިޚާބުކުރައްވާ ފަނޑިޔާރާއި ހައިކޯޓްގައި ހިމެނިވަޑައިގަންނަވާ ފަނޑިޔާރުންގެ ތެރެއިން، އެކޯޓުން އިންތިޚާބުކުރައްވާ ފަނޑިޔާރާއި ދަށުކޯޓްތަކުގެ ފަނޑިޔާރުންގެ ތެރެއިން، އިންނަވާ ފަނޑިޔާރާއި ރައްޔިތުންގެ މަޖިލީހުގެ މެންބަރުންގެ ތެރެއިން އެމަޖިލީހުން ކަނޑައަޅުއްވާ މެންބަރާއި ޢާންމުންގެ ތެރެއިން، ކަނޑައަޅުއްވާފައިވާ މެމްބަރާއި ރައީސުލްޖުމްހުރިއްޔާ ޢައްޔަނު ކުރައްވާއިގެން އިންނަވާ ބޭފުޅާ އާއި ދިވެހިރާއްޖޭގައި ޤާނޫނީ ވަކީލުންގެ ތެރެއިން އިންނަވާ ވަކީލުގެ ދައުރަކީ ފަސް އަހަރުގެ މުއްދަތެވެ. އަދި ރައްޔިތުންގެ މަޖިލީހުގެ ރައީސާއި ސިވިލް ސާވީސް ކޮމިޝަނުގެ ރައީސާއި ބަންޑާރަ ނައިބަށް އެ ކޮމިޝަނުގައި ހުރެވޭނީ އެ މަގާމުގައި ދެމި ހުންނެވި މުއްދަތަކަށް ކަމަށް ބުނެފައިވެ އެވެ. ޖޭއެސްސީއަށް އެހެން ބަދަލުތަކެއް ގެންނަ ނަމަ ގާނޫނު އަސީއަށް ބަދަލު ގެންނާން ޖެހެ އެވެ. 

ރައީސް މުހައްމަދު ނަޝީދުގެ ގާނޫނީ ވަކީލް ހިސާން ވިދާޅުވެފައި ވަނީ އެއްވެސް ހަމައެއް ލަމައެއް ނެތި، އަދި ބޭއިންސާފުން ކޮށްފައި ހުރި ކަންކަމަކީ ކޮބައިތޯ "ޖަޒީރާ ވެރިކަމެއްގައި" ހޯދާނެ ކަމަށެވެ. އަދި ވިދާޅުވީ ހަމައެއް ލަމައެއް ނެތި، ބޭ އިންސާފުން ކޮށްފައި ހުރި ކަންކަން ކަމަކީ  ދިވެހި މުޖުތަމައު ބަލައި ނުގަންނާނެ ކަންކަން ކަށަވަރުކޮށް އިންސާފު ހޯދާ ދިނުމަށް އަވަސް ފިޔަވަޅުތަކެއް އަޅާނެ ކަމަށެވެ.

"އެ ފިޔަވަޅުތަކުގެ ތެރޭގައި އެކަންތައްތަކުގެ ހަގީގަތް ހޯދައި ހާމަކޮށް، ބަދަލު ލިބިދޭން ޖެހޭ ފަރާތްތަކަށް ބަދަލު ހޯދައިދީ، މުދާ ހިފަހައްޓަން ޖެހޭ ހާލަތްތަކުގައި މުދާ ހިފަހައްޓައި، އަދި ޖިނާއީ ދައުވާ ކުރަން ޖެހޭ ތަނެއްގައި ޖިނާއީ ދައުވާ ކުރާނެ،" ހިސާން ވިދާޅުވި އެވެ.  

އެމްޑީޕީގެ ވިސްނުމުގައި ފަނޑިޔާރުގެ އޮންނަން ޖެހޭނެ ކަމަށް ގަބޫލުކުރާ ގޮތް ހާމަކޮށް ހިސާން ވިދާޅުވީ ފަނޑިޔާރުގެއިން ނިކުންނަ ހުކުމްތަކަކީ ރައްޔިތުން ބަލައިގަންނަ އެއްޗަކަށް ވާން ޖެހޭ ކަމަށެވެ. އަދި ރާއްޖެއިން ބޭރުގެ ފަނޑިޔާރުން ރާއްޖޭގެ ކޯޓުތަކުގައި މަަސައްކަތް ކުރެވެން ޖެހޭނެ ކަމަށް އެމްޑީޕީން ދެކޭ ކަމަށްވެސް ހިސާން ވިދާޅުވި އެވެ. 

"ފަންނީ ތަޖުރިބާކާރުންގެ ގޮތުގައި ޓީޗަރުންނާއި ޑޮކްޓަރުންނާއި އިންޖީނިއަރުން މަސައްކަތްކުރާހެން ތަޖުރިބާކާރު ރާއްޖެއިން ބޭރުގެ ފަނޑިޔާރުން ރާއްޖޭގެ ފަނޑިޔާރުގޭގައި ހަރަކާތްތެރިވުމަކީ ރައްޔިތުންގެ ކޮންމެހެން ބޭނުން ކަމެއް،" ހިސާން ވިދާޅުވި އެވެ.