އިޔޫ އިން ފިޔަވަޅު އެޅި މިޔަންމާ އޮފިޝަލުންގެ ތެރޭގައި ހިމެނޭ ޖެނެރަލަކު ވަޒީފާއިން ވަކިކޮށްފި
26 ޖޫން 2018 | އަންގާރަ 17:58ފިޔަވަޅު އެޅި އޮފިޝަލުންގެ އެސެޓް ފްރީޒް ކުރެވޭނެ
މިޔަންމާގެ ރޮހިންޖާ މުސްލިމުންގެ ތެރެއިން ހާލުގައި ޖެހިފައިވާ ބައެއް
މިޔަންމާގެ ރޮހިންޖާ މުސްލިމުންނާ މުސްލިމުންނާ ދެކޮޅަށް ގަތުލު އާއްމު ހިންގުމުގައި ބައިވެރިވި ހަތް އަސްކަރީ އޮފިޝަލަކަށް ދާދި ފަހުން ޔޫރަޕިއަން ޔޫނިއަން (އީޔޫ) އާއި ކެނެޑާ އިން ފިޔަވަޅުއަޅާފައިވާ އިރު، އޭގެ ތެރޭގައި ހިމެނޭ އިސް ޖެނެރަލަކު ވަޒީފާ އިން ވަކިކޮށްފިއެވެ.
މިޔަންމާގެ އަސްކަރިއްޔާ އިން ހޯމަ ދުވަހު ކުރި ފޭސްބުކް ޕޯސްޓެއްގައި ބުނީ މޭޖާ ޖެނެރަލް މައުންގް މައުންގް ސޯ ވަޒީފާ އިން ވަކިކޮށްފައިވާ ކަމަށާއި އޭނާ ވަޒީފާއިން ވަކިކުރީީ "ޕާފޯމަންސް ދަށްވުމުގެ" ސަބަބުންނެވެ. މޭޖާ ޖެނެރަލް މައުންގް މައުންގް ސޯއަކީ މިޔަންމާގެ ރަކައިން ސްޓޭޓުގެ ކުރީގެ ވެސްޓަން ކޮމާންޑުގެ ކުރީގެ އިސްވެރިޔާ ކަމަށެވެ.
މިޔަންމާގެ ރަކައިން ސްޓޭޓްގައި އެގައުމުގެ އަސްކަރިއްޔާ އިން ހިންގަމުންދާ އަނިޔާވެރި އޮޕަރޭޝަނުގެ ސަބަބުން މިދިޔަ އަހަރު އޯގަސްޓު މަހުން ފެށިގެން 700،000 އަށް ވުރެ ގިނަ މުސްލިމުން ވަނީ ގެދޮރުދޫކޮށް ދާން ޖެހިފައެވެ. މިޔަންމާގެ އަސްކަރިއްޔާ އިން ބުނެފައި ވަނީ އަސްކަރިއްޔާ އިން އެ އޮޕަރޭޝަން ހިންގާފައި ވަނީ ރަކައިން ސްޓޭޓުގެ ހަތިޔާރު އެޅި ގްރޫޕަކުން އަސްކަރިއްޔާއަށް ދިން ހަމަލާތަކަކާ ގުޅިގެން ކަމަށެވެ.
އީޔޫ އާއި ކެނެޑާ އިން އެޅި ދަތި ކުރުމުގެ ފިޔަވަޅުތަކުގެ ދަށުން ފިޔަވަޅު އެޅި މީހުންގެ އެސެޓް ފްރީޒްކުރުމާއި އެމީހުންނާ އެކު ވިޔަފާރިކުރުން ވަނީ މަނާކުރެވިފައެވެ.
މީގެ އިތުރުން ގައުމުން ބޭރުގައި އުޅޭ ކެނެޑާގެ ރައްޔިތުން ވެސް ދަތިކުރުމުގެ ފިޔވަޅުއެޅިފައިވާ ފަރާތްތަކާ އެކު ވިޔަފާރީގެ މުއާމަލާތް ހިންގުން ވަނީ މަނާކުރެވިފައެވެ. މީގެ އިތުރުން އެ މީހުންނަށް މާލީ ޚިދުމަތްތައް ދިނުން ވެސް ވަނީ މަނާކުރެވިފައެވެ.
