އެމްޑީޕީގެ އަހަރީ ދުވަހު ރައީސް ނަޝީދު ޕާޓީގެ ހުރިހާ މެމްބަރުންނާއި މުޚާޠަބްކުރައްވަނީ
ރައީސް ނަޝީދު ރާއްޖޭގެ ރައްޔިތުންނާއި މުޚާތަބްކޮށް ވާހަކަ ދައްކަވާނެ
އެމްޑީޕީއާއި އިދިކޮޅު ފަރާތްތަކުން މޭޑޭގައި ބޭއްވި ބޮޑު މުޒާހަރާގެ ތެރެއިން
އެމްޑީޕީ އުފެދުނުތާ 13 އަހަރު ފާހަގަ ކުރުމުގެ ގޮތުން އެ ޕާޓީން ރާވާފައިވާ ހަރަކާތްތަކުގެ ތަފްސީލު ޖޫން މަހުގެ 25 ވަނަ ދުވަހުގެ ރޭ ހަރުގޭގައި ބޭއްވި ހަފްލާގައި އާންމުންނާ ހިއްސާ ކޮށްފިއެވެ.
މި ހަފްލާގައި ވާހަކަ ދައްކަވަމުން އެމްޑީޕީގެ ނައިބު ރައީސް މުހައްމަދު ޝިފާޒް ވިދާޅުވީ އެމްޑީޕީގެ އަހަރީ ދުވަހުގެ އެޖެންޑާގެ އެންމެ ފުރަތަމަ ކަމަކަށް އޮތީ ޕާޓީގެ ރައީސް، ރައީސް މުހައްމަދު ނަޝީދު ރާއްޖޭގެ ރައްޔިތުންނާ މުޚާތަބުކޮށް އެރޭ 10:00 ގައި ވާހަކަ ދެއްކެވުން ކަމަށެވެ. އެއަށް ފަހު ދެން ފެށޭނީ އެމްޑީޕީގެ ކުލަގަދަ ހަރަކާތްތައް ކަމަށާއި އެ ރަސްމިއްޔާތު އޮންނާނީ މި ހަފްތާގެ ހުކުރު ދުވަހުގައި ކަމަށެވެ. އަދި މި ރަސްމިއްޔާތުގައި ރާއްޖޭގެ ހުރިހާ އަތޮޅުތަކެއްގެ ހަރަކާތްތައް ވެސް ދައްކާލުން އޮންނާނެ ކަމަށާއި މި ކަންތައް ކުރިއަށް ދާނީ އެމްޑީޕީ ހަރުގޭގެ ކުރިމަތީގައި ކަމަށް ޝިފާޒް ވިދާޅުވިއެވެ.
އެމްޑީޕީ އުފެދިގެން އައި ގޮތާއި ބެހޭ ގޮތުން ޝިފާޒް ވިދާޅުވީ އެމްޑީޕީގެ ރަޖިސްޓްރޭޝަން ސެޓްފިކެޓް 2005 އަހަރު އަތަށް އެރީ ރާއްޖޭގެ އެތައް ރައްޔިތުންނެއް އެކަމަށް އިންތިހާއަށް ބޭނުން ވެގެން އެ ރައްޔިތުން ކުރަން ފެށި މަސައްކަތް ކަތުން ކަމަށާއި، ޝައްކެއް ވެސް ނެތް ގޮތުގައި އެ މަސައްކަތަށް ކުރެއްވީ ރައީސް ނަޝީދު އިސްވެ ހުންނަވައިގެން ކަމަށެވެ. އެ ބުރަ މަސައްކަތުގެ އާޚިރު ނަތީޖާއަކަށް ވެގެން ދިޔައީ 2005ވަނަ އަހަރުގެ ޖޫން މަހުގެ 26 ވަނަ ދުވަހު އެމްޑީޕީ އުފެދުން ކަމަށެވެ.
ޝިފާޒު ވިދާޅުވީ ޕާޓި އުފެދި ޖޯޝާ ފޯރީގައި ސިޔާސީ ހަރަކާތް ހިންގަމުން އައިސް މިއަދާ ހަމައަށް އައިރު ތޭރަ އަހަރު ނިމިފައިވާ ކަމަށާއި އެހެން ގޮތަކަށް ބުނާނަމަ ޕާޓީ ފިރުކިގެން އައިދުވަސް ވަރު ނިމިއްޖެކަމަށެވެ. އެމްޑީޕީ މިހާރު މިވަނީ ހިނގައި ގަންނަން ފަށާފައި ކަމަށާއި ޒުވަނުންގެ ބަހުރުވައިން ނަމަ "ޓީނޭޖް" ހަޔާތް ފަށަގެންފައި ކަމަށް ޝިފާޒް ވިދާޅުވިއެވެ. އަދި މި ދުވަސްވަރަކީ އެމްޑީޕީ ހަލުވި ކަމާއެކު ކުރި އަރަން ޖެހޭނެ ދުވަސްތަކެއް ކަމަށް ޝިފާޒު ވަނީ ވިދާޅުވެފައެވެ.
ޝިފާޒު ވިދާޅުވީ އެމްޑީޕީއަށް 13 ނަންބަރު މުހިއްމު ވަނީ އަބްދުﷲ ޔާމީނަށް އެ ނަންބަރު މުހިއްމުވާތީ ނޫން ކަމަށާއި އެ ނަންބަރު މުހިއްމު ވަނީ މިއީ އެމްޑީޕީން ފުރާ ފުރިހަމަވީ އަހަރު ކަމަށް ވުމުން ކަމަށެވެ. އެހެން ކަމުން މިފަހަރު ބާރު ދުވެލީގައި ގޮސް ރައީސް ޔާމީން ބަލި ކުރާނެ ކަމުގެ ޔަގީން ކަން ޝިފާޒު ވަނީ ދެއްވާފައެވެ.
އެމްޑީޕީން ބޭއްވި މިހަފްލާގައި ވަނީ ސަޕޯޓަރުން އެމްޑީޕީއަށް 13 އަހަރު ފުރޭ ދުވަހު ލާން ޚާއްސަ ޓީޝާޓެއް ވެސް ތައާރަފް ކޮށްފައެވެ.
