ކާރު ދުއްވަން އަންހެނުންނަށް ބާރު އެޅުމަށާއި، މަގުމަތީގެ ސަލާމަތާއި ރައްކާތެރިކަމަށް ހޭލުންތެރިކުރުމަށް ސަޢޫދީ އަންހެނުންނަށް ޚާއްސަ ޕްރޮގްރާމެއް އެޤައުމުގެ ސަރުކާރުން ހިންގަން ފަށައިފިއެވެ.
ސަޢޫދީ އަންހެނުން ކާރު ދުއްވުން މަނާކޮށްފައި އޮންނަ އޮތުން ނިމުމަކަށް ގެނެސް، މިމަހުގެ 24 ވަނަ ދުވަހުން ފެށިގެން އަންހެނުންނަށް ކާރު ދުއްވުން ހުއްދަވާނެއެވެ. އަދި އެކަމަށް ތައްޔާރުވުމުގެ ގޮތުން ބައެއް އަންހެނުންނަށް މިހާރު ވަނީ ލައިސަންސް ދީފައެވެ. އެގޮތުން ބޭރު ޤައުމުތަކުގައި ދުއްވުމުގެ ލައިސަންސް އޮންނަ 10 އަންހެނަކަށް މިހާރު ވަނީ ސަޢޫދީ ޑްރައިވިންގ ލައިސަންސް ދީފައެވެ.
"މާތް ﷲ އަށް ވަކީލުކޮށްގެން ދުއްވާ"، މި ޝިޢާރުގެ ދަށުން ކުރިއަށްގެންދާ ހޭލުންތެރިކުރުމުގެ ޕްރޮގްރާމްގެ ދަށުން ޚާއްސަ ހަރަކާތްތަކެއް ވެރިރަށް ރިޔާޒް، ދައްމާމް، ޖިއްދާ އަދި ތަބޫކުގައި އޮންނާނެކަމަށް ސަޢޫދީގެ އިންފޮމޭޝަން މިނިސްޓްރީ އިން ބުނެއެވެ. އެމިނިސްޓްރީ އިން ބުނީ މިއީ އަންހެނުންނަށް މަގުމަތީގެ ރައްކާތެރިކަމުގެ ފިޔަވަޅުތަކާއި، ޤަވާއިދުތައް ކިޔައިދީ އަހުލުވެރިކޮށް، ބިރު ކެނޑުވުމަށް ކުރިއަށްގެންދާ ހަރަކާތެއް ކަމަށެވެ. އަދި މިހަރަކާތްތަކުގެ ސަބަބުން ރައްކާތެރި ކަމަށް އިސްކަންދިނުމުގެ އާދަ އަށަގަންނާނެ ކަމަށާއި، އަދި ސީޓް ބެލްޓް އެޅުމުގެ މުހިއްމުކަން އަންހެނުންނަށް ބުނެދެވޭނެ ކަމަށް ސަޢޫދީ ސަރުކާރުން ބުނެއެވެ.
މިހަރަކާތުގެ ތެރެއިން ސިމިއުލޭޓަރ ޓްރެއިނިންގ އާއި އެކި މުބާރާތްތައް ކުރިއަށްދާނެއެވެ.
ސަޢޫދީ ޢަރަބިއްޔާގައި އަންހެނުންނަށް ކާރު ދުއްވުމުގެ ހުއްދަދޭން ނިންމެވީ އެޤައުމުގެ ވަލީޢަޙުދު މުހައްމަދު ބިން ސަލްމާން މިހާރު ކުރިއަށްގެންދަވާ އިސްލާހީ ބަދަލުތަކުގެ ޕްރޮގްރާމްގެ ތެރެއިން މިދިޔަ އަހަރުއެވެ. އަދި "އިސްލާމީ އުޞޫލުތަކުގެ ތެރެއިން" ސަޢޫދީ އަންހެނުންނަށް ކާރު ދުއްވުމުގެ ހުއްދަ ޝާހީ ޤަރާރަކުން މިދިޔަ އަހަރުގެ ސެޕްޓެމްބަރު މަހު ސަޢޫދީ ރަސްގެފާނު ސަލްމާން ބިން އަބްދުލްޢަޒީޒް ދެއްވިއެވެ. ސަޢޫދީއަކީ އަންހެނުން ކާރު ދުއްވުން މަނާކޮށްފައި އޮތް ހަމައެކަނި ޤައުމެވެ.
ކުރިއަށް އޮތް ހަފްތާތަކުގެ ތެރޭގައި ދެހާހެއްހާ ލައިސަންސް އަންހެނުންނަށް ދޫކުރާނެ ކަމަށް ބެލެވޭ ކަމަށް ސަޢޫދީ ޖެނެރަލް ޑިޕާޓްމަންޓް އޮފް ޓްރެފިކް އޮން ބުނެއެވެ.
