މައިކަލް ޖެކްސަންގެ ހަޔާތާ ގުޅޭ ޝޯއެއް ބާއްވަނީ
މި ޝޯ އޮންނާނެ ތިއޭޓަރެއް އަދި ނުބުނެ
މައިކަލް ޖެކްސަން އެކްޓް ކޮށްފައިވާ ލަވައެއްގެ މަންޒަރެއް
ޕޮޕް ލަވައިގެ ރަސްގެފާނު މައިކަލް ޖެކްސަންގެ ހަޔާތާ ގުޅޭ ޝޯއެއް 2020 ވަނަ އަހަރު ބޭއްވުމަށް ނިންމައިފިއެވެ.
މިހާތަނަށް އަދި ވަކި ނަމެއް ދީފައި ނުވާ މި ޝޯ ލިޔަނީ ނޫސްވެރިކަމުގައި ދުނިޔޭގައި ދެވޭ އެންމެ ޝަރަފުވެރި އެވޯޑް ކަމަށްވާ ޕުލިޓްޒަރ އެވޯޑް ހޯދާފައިވާ ލިން ނޮޓޭޖްއެވެ.
މައިކަލް ޖެކްސަން އެސްޓޭޓާއި ކޮލަމްބިއާ ލައިވްއިން އިން މި ޝޯ އޮންނާނެ ކަމަށް އިއުލާނުކޮށްފައިވާ އިރު ޝޯ އޮންނާނެ ތިއޭޓަރެއް ނުބުނެއެވެ. މި ޝޯގައި ޖެކްސަންގެ މަޝްހޫރު ލަވަތައް ކަމަށްވާ ތްރިލަރ، ބީޓްއިޓް، އަދި ސްމޫތު ކްރިމިނަލް ފަދަ ލަވަތައް ހުށަހަޅާނެއެވެ.
ކްރިސްޓޮފަރ ވީލްޑަން ޑައިރެކްޓްކޮށް ކޮރިއޮގްރާފް ހަދާ މި ޝޯގައި ޖެކްސަންގެ ވީޑިއޯ ލަވަތަކުގައި ދައްކުވައިދީފައިވާ ހަނދާނުން ނުފޮހެވޭ ނެށުންތައް ހުންނާނެ ކަމަށް ބެލެވެއެވެ.
ވީލްޑަންއަކީ 2015 ވަނަ އަހަރު ޓޯނީ އެވޯޑްގައި ބެސްޓް ކޮރިއޮގްރަފީ އެވޯޑް ލިބިފައިވާ ފަރާތެކެވެ. މިޝޯއަކީ އޭނަ މަރުވިތާ 11 އަހަރަށް ފަހު ފުރަތަމަ ފަހަރަށް ބާއްވާ ޝޯއެވެ.
