ކަޕިލްގެ އާ ޝޯއެއް ފަށަނީ

މަޝްހޫރު ކޮމީޑިއަން ކަޕިލް ޝަރްމާގެ އާ ޝޯއެއް ސޮނީ ޓީވީން ފަށަން ނިންމައިފިއެވެ.

"ފެމިލީ ޓައިމް ވިތު ކަޕިލް ޝަރްމާ" ގެ ނަމުގައި ފަށާ ކޮމެޑީ މި ޝޯގެ ޕްރޮމޯ މިހާރު ވަނީ ދައްކަން ފަށާފައެވެ.

ޚަބަރުތައް ބުނާ ގޮތުގައި ކަޕިލްގެ އާ ހޮސްޓަކަށް ނަގާފައި ވަނީ ޓީވީ އެކްޓްރެސް ނެހާ ޕެންޑްސްއެވެ. ނެހާއަކީ ޑްރާމާ ސީރީޒް "މޭ އައި ކަމިން މެޑަމް" ގެ ސަންޖަނާގެ ރޯލު ކުޅުނު އެކްޓްރެސްއެވެ.

"ފެމިލީ ޓައިމް ވިތު ކަޕިލް ޝަރްމާ" ގައި ގެސްޓުންގެ ގޮތުގައި ބޮލީވުޑްގެ ފަރާތްތައް ވެސް ފެނިގެންދާނެ ކަމަށް ވެއެވެ. އޭގެ ތެރޭގައި ފިލްމީ ތަރި އަޖޭ ދޭވްގަން ހިމެނޭ ކަމަށް ޚަބަރުތައް ބުނެއެވެ.

ފެމިލީ ޓައިމް ވިތު ކަޕިލް ޝަރްމާ މިމަހުގެ ފަހު ހަފްތާގައި ފަށާއިރު ކަޕިލް މީގެ ކުރިން ފެނިގެންދިޔަ ޝޯ ކަމަށްވާ "ދަ ކަޕިލް ޝަރްމާ" ޝޯއަށް ވަނީ ބެލުންތެރިންގެ ބޮޑު ތަރުހީބެއް ލިބިފައެވެ. މިޝޯގައި ކަޕިލްއާ އެކު ކޮމޭޑިއަން ބާރްތީ ސިންގް ވަނީ ހޮސްޓްކޮށްފައެވެ.

ބާރްތީ ބުނެފައި ވަނީ އޭނާ ކަޕިލްގެ ާއޝޯއާ ގުޅެން ބޭނުންވާ ކަމަށާއި ކަޕިލް ބޭނުން ކަމުގައި ވާނަމަ އޭނާ ހުރީ ތައްޔާރަށް ކަމަށެވެ.

ބާރްތީ ބުނީ އޭނާ ހުރީ ކަޕިލް އެނބުރި އައުމުން ވަރަށް އުފަލުން ކަމަށާއި ކުރީގެ ޝޯ ހުއްޓާލުމުން އެންމެން ވެސް ތިބީ ވަރަށް ދެރަވެފައި ކަމަށެވެ. އަދި އާ ޝޯގައި އޭނާ ފެނިދާނެތޯ ސުވާލު ކުރަމުންދާ ކަމަށާއި އޭނާ އެޝޯއަށް ދާން ބުނެފި ކަމުގައި ވާނަމަ އޭނާ ދާނެ ކަމަށް ވަނީ ބުނެފައެވެ.

މީގެ ކުރިން ދެއްކި ކަޕިލްގެ ކޮމެޑީ ޝޯ "ދަ ކަޕިލް ޝަރުމާ ޝޯ" ހުއްޓާލަން ޖެހުނީ އޭނާއާ އެކު މުހިއްމު ބައެއް އަދާކުރި ސުނިލް ގްރޯވަރާ މައްސަލަ ޖެހި އެ ޝޯގެ ތަރިން ބައިބައިވުމުންނެވެ. އެ މައްސަލަ ފެންމަތިވީ އެ ޝޯގެ ތަރިން އޮސްޓްރޭލިއާ އަށް ކުރި ދަތުރަކަށް ފަހު އިންޑިއާއަށް ދިޔަ ފްލައިޓްގައި ކުރި ޒުވާބެއްގެ ސަބަނުންނެވެ.

"ދަ ކަޕިލް ޝަރުމާ ޝޯ" ގައި ބައިވެރިވި ހުރިހާ ތަރިން މި ފަހަރުގެ ޝޯގައި ބައިވެރިވާނެ ކަމަށް ޚަބަރުތައް ބުނި ނަމަވެސް ގްރޯވަރު އެ ޝޯގައި ބައިވެރިއެއް ނުވާނެއެވެ. ކަޕިލްއާ އެކު މަސައްކަތްނުކުރާނެ ކަމަށް މީގެ ކުރިން ގްރޯވަރު ބުނެފައި ވެއެވެ.

ކުރީގެ ޝޯއަށް ވުރެ ރަނގަޅަށް އެ ޝޯ ހެދުމުގެ މަސައްކަތް ކުރިއަށްދާ ކަމަށް ކަޕިލް ވަނީ މީގެ ކުރިން އިންޑިއާގެ ނޫސްތަކަށް ދީފައިވާ އިންޓަވިއުތަކުގައި ބުނެފައެވެ.