ސައުދީ އަރަބިއްުޔާގެ މުނިފޫހިފިލުވުމާއި ބެހޭ އިދާރާ، ޖެނެރަލް އެންޓަރޓެއިންމަންޓް އޮތޯރިޓީގެ ވެރިޔާ، އަޙުމަދު ބިން އަޤީލް އަލް ޚާތިބް މަޤާމުން ވަކިކޮށްފިއެވެ.

ސައުދީގެ އެކި ސަރަޙައްދުތަކުގައި މުނިފޫހިފިލުވުމާއިގުޅޭ ހަރަކާތްތައް ހިންގާ ޖެނެރަލް އެންޓަރޓެއިންމަންޓް އޮތޯރިޓީގެ ވެރިޔާގެ މަޤާމަށް ޚާތިބް އައްޔަނުކޮށްފައިވަނީ 2016 ވަނަ އަހަރުއެވެ. ސައުދީ އަރަބިއްޔާގެ ރަސްގެފާނު، ސަލްމާން ބިން ޢަބްދުލް އަޒީޒް އަލް ސައުދުގެ އަމުރުފުޅަކުން ޚާތިބް މަޤާމުން ވަކިކުރި ނަމަވެސް، އޭނާ މަޤާމުން ވަކިކުރީ ކޮން ސަބަބަކާއި ހުރެކަމެއް ސައުދީގެ ކަމާއިބެހޭ ފަރާތްތަކުން ހާމަކޮށްފައެއް ނުވެއެވެ.

ނިމިގެން ދިޔަ 2017 ވަނަ އަހަރު ސައުދީގެ ޖެނެރަލް އެންޓަރޓެއިންމަންޓް އޮތޯރިޓީއިން ވަނީ މުނިފޫހިފިލުވުމުގެ 2200 ހަރަކާތް ހިންގާފައެވެ. އަދި އެ އިދާރާއިން ދަނީ މި އަހަރު ޖުމްލަ 50،000 އެފަދަ ހަރަކާތް ބޭއްވުމަށް މަސައްކަތް ކުރަމުންނެވެ.

ކުރިއަށް އޮތް 10 އަހަރުގެ ތެރޭގައި މުނިފޫހިފިލުވުމުގެ ދާއިރާއަށް 64 ބިލިއަން އެމެރިކާ ޑޮލަރު އިންވެސްޓް ކުރުމަށް ސައުދީ ސަރުކާރުން ވަނީ ނިންމާފައެވެ.