ސައުދީގެ ފުރަތަމަ ސިނަމާ މިމަހުގެ 18 ގައި ހުޅުވަނީ

އާންމުކޮށް ފިލްމު ދެއްކުން ގާތްގަނޑަކަށް30 އަހަރަށް ވުރެ ދިގު މުއްދަތަކަށް އޮތް އޮތުން ނިމުމަކަށް ގެނެސް ސައުދީ އަރަބިއްޔާގައި ސިނަމާއެއްހަދައި މިމަހުމަހުގެ 18 ގައި ހުޅުވަން ނިންމައިފިއެވެ.

މި ސިނަމާއަކީ ދުނިޔޭގެ އެންމެ ބޮޑު ސިނަމާ ޗެއިން ކަމުގައިވާ އޭއެމްސީއާ ގުޅިގެން ހުޅުވާ ސިނަމާއެކެވެ. އޭއެމްސީއާ ގުޅިގެން ކުރިއަށް އޮތް ފަސްއަހަރުގެ ތެރޭގައި 40 ސިނަމާ ހުޅުވާނެ ކަމަށްވެއެވެ. އެ 40 ސިނަމާ ހުޅުވާނީ ސައުދީގެ 15 ސްޓޭޓެއްގައެވެ.

ސައުދީއިން ސިނަމާތަކުގައި ފިލްމު ދެއްކުން މަނާކޮށްފައިވަނީ 1980އިގެ ތެރޭގައެވެ. އެހެން ނަމަވެސް އެކަން ނިމުމަކަށް ގެނެސްފައި ވަނީ ވަލީ އަހުދު މުހައްމަދު ބިން ސަލްމާންގެ ވިޝަން 2030 ގެ ދަށުން ސައުދީ އަރަބިއްޔާ އަށް ގެންނަމުންދާ ބަދަލު ތަކުގެ ދަށުންނެވެ.

މިއަހަރުގެ ޖެނުއަރީ މަހުގެ ތެރޭގައި ސައުދީގައި ވަނީ ވަގުތީ ސިނަމާއެއް ހަދައި ފިލްމެއް ވެސް ދައްކާލާފައެވެ.

ޓެންޓެއްގައި ހަދާފައިވާ ވަގުތީ ސިނަމާގައި އެޅުވި ފިލްމަކީ "ދި އިމޯޖީ މޫވީ"އެވެ.

ވިޝަން 2030 ދަށުން ސައުދީ އަރަބިއްޔާގައި އެތައް ސަތޭކަ ސިނަމާ ބިނާކުރަން ވަނީ ނިންމާ ފައެވެ. މިގޮތުން ހުޅުވޭ ފުރަތަމަ ސިނަމާ މި އަހަރުގެ މާޗު މަހުގެ ތެރޭގައި ހުޅުވޭނެ ކަމަށް ޚަބަރުތައް ބުނެއެވެ.

ރޮއިޓާސް އިން ބުނެފައިވާ ގޮތުގައި 2030 އާ ހަމައަށް ދެ ހާސް ސްކްރީން އާއެކު ތިން ސަތޭކަ ސިނަމާ ބިނާ ކުރަން ސައުދީ ސަރުކާރުން ވަނީ ނިންމާފައެވެ.

ސައުދީ ސަރުކާރުން އުއްމީދު ކުރަނީ ސިނަމާގެ ޚިދުމަތުގެ ތެރެއިން ސައުދީ އިގްތިސާދަށް 24 ބިލިއަން ޑޮލަރު ލިބޭނެ ކަމަށެވެ. އަދި ތިރީސް ހާސް ވަޒީފާ އުފެދިގެން ދާނެ ކަމަށެވެ.