ކައިރި މުސްތަގް ބަލެއްގައި ރަޝިއާގެ ރައީސް ވްލެޑިމިއާ ޕުޓިންއާ ބައްދަލު ކުރުމަކީ އެކަށީގެންވާ ކަމެއް ކަމަށް އެމެރިކާގެ ރައީސް ޑޮނަލްޑް ޓުރަމްޕް ވިދާޅުވެއްޖެއެވެ.
ހުކުރު ދުވަހު ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ މި އަންނަ ހޫނު މޫސުމުގައި ރަޝިއާގެ ރައީސްއާ ބައްދަލުކުރުމަކީ ވެދާނެ ކަމެއް ކަމަށެވެ. މިހެން ޓުރަމްޕް ވިދާޅުވިއިރު ރަޝިއާ އިން މިކަހަލަ އެއްވެސް ކަމެއް ކުރަން އުޅޭ ކަމުގެ ސިގްނަލެއް ދީފައެއް ނުވެއެވެ.
ރަޝިއާގެ ނޫސްތަކުން ސަރުކާރުގެ މަސްދަރުތަކާ ހަވާލާދީ ބުނެފައި ވަނީ އެމެރިކާގެ ރައީސް އާއި ރަޝިއާގެ ރައީސް ޕޫޓިން ބައްދަލު ކުރުމުގެ އެޖެންޑާއެއް ގެންގުޅޭކަން އެނގިފައި ނުވާ ކަމަށާއި ޓްރަމްޕް އެ ދެއްކެވީ ބުރަދަން ހުރި ވާހަކައެއް ކަމާ މެދު ސުވާލު އުފެދޭ ކަމަށެވެ.
ޕޫޓިންއާ ބައްދަލު ކުރައްވާނެ ކަމަށް ޓްރަމްޕް ވިދާޅުވިތާ ގިނައިރުތަކެއް ނުވަނީސް ޓްރަމްޕް ވަނީ ރަޝިއާ އަށް ވަރަށް ބޮޑަށް ފާޑުވިދާޅުވެފައެވެ. އެ ގޮތުން ޓްރަމްޕް ވަނީ ޔޫކްރެއިންގެ އަތުން ގަދަކަމުން ރަޝިއާ އިން ފޭރިގެންފައިވާ ބިމުގެ ވާހަކަ ދައްކަވާފައެވެ.އެ ފާޑުކިޔުންތަކުގެ ތެރެއިން އެމެރިކާގެ ކުރީގެ ރައީސް ބަރަކް އޮބާމާއަށް އަމާޒު ވެސް ޓްރަމްޕް ވަނީ ފާޑުވިދާޅުވެފައެވެ. ޓްރަމް ވިދާޅުވީ ރަޝިއާއިން ބޭނުންވި ގޮތަށް ޔޫކްރެއިން އަތުން ބިން އަތުލައިގަނެވުނީ އޮބާމާގެ ސަބަބުން ކަމަށެވެ. އަދި ވިދާޅުވީ ރަޝިއާ އިން ވެސް އޮބާމާއަށް އިހްތިރާމް ނުކުރާ ކަމަށާއި އެބޭފުޅާއަކީ އިހްތިރާމެއް ނެތް ބޭފުޅެއް ކަމަށެވެ.
