ފްލެޓް ފޯމް ބަލައިގަތުން އީދު ބަންދަށް މެދުކަނޑާލަނީ
ދެން ފޯމް ބަލައިގަންނަން ފަށާނީ އީދު ދުވަހުން ފެށިގެން ތިން ދުވަސް ފަހުން
ފްލެޓް ފޯމް ބަލައި ގަންނަނީ
"ހިޔާ މަޝްރޫއު" ގެ ދަށުން އިމާރާތްކުރާ ފްލެޓްތަކަށް އެދި ހުށަހަޅާ ފޯމުތައް ބަލައިގަތުން ހުކުރު ދުވަހުން ފެށިގެން ތިން ދުވަހުގެ މުއްދަތަކަށް މެދުކަނޑާލަން ނިންމާފައިވާ ކަމަށް ހައުސިން މިނިސްޓްރީން ބުނެފިއެވެ.
ހައުސިން މިނިސްޓްރީގެ މީޑިއާ ކޯޑިނޭޓަރު އަހުމަދު ފަޒާލް ވިދާޅުވެފައި ވަނީ ފިތުރު އީދު ދުވަހުން ފެށިގެން ތިން ދުވަހުގެ މުއްދަތަށް ފްލެޓް ފޯމު ބަލައިގަތުން މެދު ކަނޑާލާނެ ކަމަށެވެ. ފަޒާލް ވިދާޅުވި ގޮތުގައި ހަ ރޯދަ ނިމެންދެން ފްލެޓް ފޯމު ބަލައިގަންނަން ހަމަޖެހިފައި ވަނީ ރޯދަ މަހު ވެސް ފޯމު ބަލައިގަތް ވަގުތުތަކުގައެވެ.
ފްލެޓަށް އެދި ހުށަހަޅާ ފަރާތްތަކުގެ ފޯމުތައް ރޯދަމަހު ބަލައިގަނެފައި ވަނީ ކޮންމެ ދުވަހެއްގެ ހެނދުނު 10:30 އިން މެންދުރު ފަހު 13:30 އަށް އަދި ރޭގަނޑު 21:00 އިން 23:00 އަށެވެ.
ޖޫން މަހުގެ ތިން ވަނަ ދުވަހުން ފެށިގެން އަންނަ ޖުލައި މަހުގެ 31 ގެ ނިޔަލަށް ހިޔާ މަޝްރޫއުގެ ފޯމުތައް ބަލަގަންނަން ހައުސިން މިނިސްޓްރީން ވަނީ ނިންމާފައެވެ. ދަރުބާރުގޭ ރަންނަބަނޑޭރީ މާލަމުގައި ފްލެޓް ފޯމުތައް ބަލައިގަތުން ކުރިއަށްދާއިރު ފޯމު ހުށަހެޅުމަށްޓަކައި ނަގަން ޖެހޭ ނަމްބަރު ދަރުބާރުގެއަށް ނުގޮސް، ކިއުބީ އެޕް މެދުވެރިކޮށް ނެގޭނެ އިންތިޒާމު ވަނީ ހަމަޖައްސާފައެވެ.
ހުޅުމާލޭ ދެވަނަ ފިޔަވަހީގައި އަޅާ 7000 ފްލެޓު ދޭން ނިންމާފައި ވަނީ ސިވިލް ސާވިސް މުވައްޒަފުންނަށް 1000 ފްލެޓާއި 18 އަހާރާއި 40 އަހަރާއި ދެމެދުގެ ކައިވެނިކޮށްގެން އުޅޭ މީހުންނަށް 1000 ފްލެޓާއި ދަފުތަރުގައި ނުހިމެނޭ މާލޭ ރަށްވެހިންނަށް 1000 ފްލެޓާއި ދަފުތަރުގައި ރަޖިސްޓްރީވެފައިވާ ފަރާތްތަކަށް 1044 ފްލެޓެވެ. އަދި ޑޮކްޓަރުންނާއި ނަރުހުންނަށް 475 ފްލެޓާއި ޓީޗަރުންނަށް 625 ފްލެޓާއި އެކަނިވެރި މައިންނާއި ބައިފައިންނަށް 500 ފްލެޓާއި ނުކުޅެދުންތެރިކަން ހުންނަ ފަރާތްތަކަށް 200 ފްލެޓެވެ. މީގެއިތުރުން ފުލުހުންނާއި ސިފައިންނަށް 600 ފްލެޓާއި ގުޅީފަޅުން ފައިސާ ދައްކާ ފްލެޓް ނުލިބުނު ފަރާތްތަކާއި ޓާޓާ ފްލެޓަށް ފައިސާ ނުދެއްކުނު ފަރާތްތަކަށް 300 ފްލެޓް އަދި މާފަންނު ހުޅަނގުގައި ނިކަމެތިކޮށް އުޅޭ ފަރާތްތަކަށް 256 ފްލެޓްކަމަށް ހައުސިން މިނިސްޓްރީން ބުނެއެވެ.
