ޓްރަމްޕް ކިމް ސަމިޓް: އެމެރިކާ ބޭނުން ވަނީ 2020 އަންނައިރު އުތުރު ކޮރެއާ އިން ހަތިޔާރު ނައްތާލަން
ހަތިޔާރު ނައްތާލާނެ ގޮތެއް އެއްބަސްވުމުގައި ނެތް
ސަމިޓްގެ ނަތީޖާއާ ބެހޭ ގޮތުން ސެކްރެޓަރީ ޕޮމްޕެއޯ ވާހަކަދެއްކެވީ ދެކުނު ކޮރެއާގައި | ރޮއިޓަރސް
އުތުރު ކޮރެއާއިން 2020 ވަަނަ އަހަރު ނިމޭއިރު މައިގަނޑު ގޮތެއްގައި ހަތިިޔާރުތައް ނައްތާލާފައިވާތަން ފެންނާނެ ކަމަށް އުއްމީދުކުރައްވާ ކަމަށް ސެކެރެޓަރީ އޮފް ސްޓޭޓް މައިކް ޕޮމްޕެއޯ ވިދާޅުވެއްޖެއެވެ.
އެމެނިކުފާނު މިހެން ވިދާޅުވެފައި ވަނީ އެމެރިކާގެ ރައީސް ޑޮނަލްޑް ޓްރަމްޕް އާއި އުތުރު ކޮރެއާގެ ލީޑަރު ކިމް ޖޮން އުން ސިންގަޕޫރުގައި ބައްދަލުކުރެއްވިތާ އެއް ދުވަހަށް ފަހުއެވެ.
ދެ ގައުމުން ވަނީ ކޮރެއަން ޕެނިންސިއުލާ އިން ނިއުކްލިއަރ ހަތިޔާރު އެއްކޮށް ނައްތާލުމަށް މަސައްކަތްކުރުމަށް ދެ ގައުމުން ވަނީ ކުރު އެއްބަސްވުމެއް އެކުލަވާލާފައެވެ. ނަމަވެސް އެއްބަސްވުމުގައި އެކަން ކުރާނެ އިރަކާއި އަދި އުތުރު ކޮރެއާ އިން ނިއުކްލިއަރ ހަތިޔާރު ދޫކޮށްލާނެ ގޮތެއްގެ ތަފްސީލް ނެތުމުން އެ އެއްބަސްވުމަށް ވަނީ ފާޑުކިޔުން އަމާޒުވެފައެވެ.
ސަމިޓްގެ ނަތީޖާއާ ބެހޭ ގޮތުން ދެކުނު ކޮރެއާގައި ވާހަކަދައްކަވަމުން ސެކްރެޓަރީ ޕޮމްޕެއޯ ވިދާޅުވީ އުތުރު ކޮރެއާއާ އެކު ކުރަންޖެހޭ މަސައްކަތްތައް އަދިވެސް އެބަހުރި ކަމަށެވެ.
ނަމަވެސް އޭނާ ވިދާޅުވީ "މައިގަނޑު ކަމަކީ ހަތިޔާރު ނައްތާލުން.....އަޅުގަނޑުމެން އުއްމީދުކުރަން ދެ އަހަރާއި ބައިގެ ތެރޭގައި އެކަން ހާސިލްވާނެ ކަމަށް"
އޭނާ ވިދާޅުވީ އުތުރު ކޮރެއާގެ ނިއުކްލިއަރ ޕްރޮގްރާމް ހުއްޓާލިކަން ކަށަވަރުވުމުގެ މުހިއްމުކަން އެ ގައުމަށް އެނގޭ މިންވަރާ މެދު އިތުބާރު އެބަ އޮތް ކަމަށެވެ.
ޕޮމްޕެއޯ މިހެން ވިދާޅުވެފައި ވަނީ އުތުރު ކޮރެއާ އަކީ މިހާރު ނިއުކްލިއަރ ބިރެއް ނޫން ކަމަށް ރައީސް ޓްރަމްޕް އިއުލާނުކުރެއްވިތާ ކުޑައިރުކޮޅެއްގެ ތެރޭގައެވެ.
އެ ވިދާޅުވާ ވާހަކަފުޅުގެ ސައްހަކަމާ މެދު ވަނީ ސުވާލު އުފެދިފައެވެ. އޭގެ ސަބަބަކީ މި އެއްބަސްވުމާ އެކު ވެސް އުތުރު ކޮރެއާއަށް އެގައުމުގެ ނިއުކްލިއަރ ވޯހެޑްތައް ބެހެއްޓި އަދި އެތަކެތި ނައްތާލުމަށް ވަކި ޚާއްސަ ގޮތަކަށް އަމަލުކުރުމަށް އެއްބަސްވެފައި ނެތުމެވެ.
އުތުރު ކޮރެއާ އިން ވަނީ ސަމިޓަކީ އެ ގައުމަށް ލިބުނު ބޮޑު ކާމިޔާބެއް ކަމަށް ސިފަ ކޮށްފައެވެ.
ސަމިޓް ނިމުމާ އެކު ދެ ގައުމުން ސޮއިކުރި އެެއްބަސްވުމުގައި ބުނެފައި ވަނީ އެމެރިކާ އިން އުތުރު ކޮރެއާއަށް "ރައްކާތެރިކަން ކަށަވަރުކޮށްދޭއިރު" ދެ ގައުމުން ވެސް އާ ގުޅުމަކަށް އެއްބާރުލުން ދޭނެ ކަމަށެވެ.
އޭގެ ބަދަލުގައި އުތުރު ކޮރެއާ އިން ވަނީ " ކޮރެއަން ޕެނިންސިއުލާއަކީ ނިއުކްލިއަރ ހަތިޔާރު އެކީ ނައްތާލެވިފައިވާ ސަރަހައްދަކަށް ހެދުމަށް އެއްބަސްވެފަ" އެވެ.
