މީޑިއާނެޓާއި ދިރާގު ޓީވީން ވޯލްޑްކަޕް ދެއްކޭނެ: ބްރޯޑްކޮމް
އޮޅުން އެރީ ޕީއެސްއެމުން ދެއްކި ވާހަކަތަކާ ގުޅިގެން
ބްރޯޑްކޮމްގައި މިއަދު ބޭއްވި ޕްރެސް ކޮންފަރެންސްގެ ތެރެއިން
އަންނަ ބުރާސްފަތި ދުވަހު ފަށާ ވޯލްޑް ކަޕް، މީޑިއާނެޓާއި ދިރާގުޓީވީން ދެއްކޭނެ ކަމަށާއި ވޯލްޑްކަޕުގެ މެޗުތައް ރާއްޖޭގައި ރީބްރޯޑްކާސްޓް ކުރެވޭނެ ކަމަށް މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) އިން ބުނެފިއެވެ.
ޕީއެސްއެމާއި މީޑިއާނެޓާއި ދިރާގާ މަޝްވަރާ ކުރުމަށް ފަހު، އެ ކުންފުނިތަކުގެ އިސް ބޭފުޅުންނާ އެކު ބްރޯޑްކާސްޓިން ކޮމިޝަންގައި ބޭއްވި ޕްރެސް ކޮންފަރެންސެއްގައި ވާހަކަ ދައްކަވަމުން، އެ ކޮމިޝަންގެ ރައީސް މުހައްމަދު ޝަހީބު ވިދާޅުވީ ރީ-ބްރޯޑްކާސްޓަރުން ކޮންޓެއްޓެއް ދައްކަން ޖެހޭނީ ރީ-ބްރޯޑްކާސްޓް ކުރާ ޗެނަލަކާ އެކު އޮންނަ ނޮން-އެކްސްކްލޫސިވް އެގްރިމެންޓެއްގެ ދަށުން ކަމަށެވެ.
ޝަހީބު ވިދާޅުވި ގޮތުގައި ޗެނަލްތަކުން ފޮނުވާ ކޮންޓެންޓު ދެއްކުމުގެ ހުއްދަ ރީބްރޯޑްކާސްޓަރުން ހޯދާފައިވާ ނަމަ، އެ ޗެނަލަކުން ފޮނުވާ ވޯލްޑް ކަޕުގެ މެޗުތައް ރާއްޖޭގައި ދެއްކުމަށް ހުރަހެއް ނެތެވެ. އަދި ވިދާޅުވީ މީޑިއާނެޓާއި ދިރާގު ޓީވީ އާއި ޕީއެސްއެމަށް ވެސް ވޯލްޑްކަޕުގެ މެޗުތައް ދެއްކޭނެ ކަމަށެވެ.
ރާއްޖޭގެ ރީބްރޯޑްކާސްޓަރުންނަށް ވޯލްޑްކަޕުގެ މެޗުތައް ނުދެއްކިދާނެ ކަމުގެ ބިރު އޮތް ކަމަށް އާންމުނަށް ގަބޫލު ކުރެވުނީ ޕީއެސްއެމުން ނެރުނު ބަޔާނަކާ ގުޅިގެންނެވެ. އެ ވާހަކަތައް ތަފްސީލުކޮށްދެއްވަމުން ނާޝިދު ވިދާޅުވީ ރާއްޖޭގެ ރީބްރޯޑްކާސްޓަރުންނަށް ވޯލްޑްކަޕް ނުދެއްކޭނެ ކަމަށް ބުނެ، ޕީއެސްއެމުން ނޫސް ބަޔާނެއް ނެރެފައިވާ ކަމަށާއި ރާއްޖޭގައި ވޯލްޑްކަޕް ދެއްކުމުގެ ރައިޓްސް އޮތް ހަމައެކަނި ފަރާތަކީ އެ ކުންފުނި ކަމަށް ޕީއެސްއެމުން ބުނެފައިވާ ކަމަށެވެ.
ނާޝިދު ވިދާޅުވީ ސޮނީގެ ޗެނަލްތައް މެދުވެރިކޮށް، ވޯލްޑްކަޕުގެ މެޗުތައް ދެއްކުމުގެ ހުއްދަ މީޑިއާނެޓާއި ދިރާގާއި ޕީއެސްއެމުން ހޯދާފައިވާ ކަމަށެވެ. ޕީއެސްއެމުން ވަނީ ވޯލްޑްކަޕް މެޗުތައް ދެއްކުމުގެ ކްލީން ފީޑު ވެސް ހޯދާފައެވެ.
"ތަފާތު އިވެންޓުތަކުގައި ވިދާޅުވެފައި އެބަހުރި އެކި ފެންވަރުގެ ބޭފުޅުން ތިމަންނަމެންގެ އިންޓަލެކްޗުއަލް ޕްރޮޕަޓީ ރައިޓެކޭ މީ. އެހެން ނަހައްދަވާށޭ ކޭބަލް އޮޕަރޭޓަރުން ވެސް އަޅުގަނޑުމެންގެ [ޕީއެސްއެމުން] އަތުން ނަގައިގެންނޭ އެކަން ކުރަންވާނީ،" ނާޝިދު ވިދާޅުވިއެވެ.
ނާޝިދު ދެއްކެވި ވާހަކަފުޅަށް ރައްދު ދެއްވައި ޕީއެސްއެމްގެ ޑިރެކްޓާ ކޮމާސް އެންޑް މާކެޓިން އިބްރާހިމް ނަސްރީން ވިދާޅުވީ ހުއްދަ ނަގައިގެން ރީބްރޯޑްކާސްޓްކުރާ ފަރާތްތަކަށް، ވޯލްޑްކަޕުގެ މެޗުތައް ނުދެއްކޭނެ ކަމަށް ބުނެފައި ނުވާނެ ކަމަށާއި އެ ބަޔާނުގައި ބުނެފައި ވާނީ ގަވާއިދާ ހުދޫދުގެ ތެރޭގައި ބްރޯޑްކާސްޓް ކުރުމަށް އެދޭ ވާހަކަ ކަމަށެވެ.
"ގަވާއިދާއި ހުދޫގެ ތެރެއިން ރީބްރޯޑްކާސްޓް ކުރައްވާށޭ. ބަޔާނުގައި ބުނެފައެއް ނޯންނާނެ ހުއްދަ ނަގައިގެން ކުރައްވާ ބޭފުޅުންގެ ވާހަކައެއް... އަޅުގަނޑުމެންގެ ހައްގަށް ވެސް ގެއްލުން ނުލިބޭ ގޮތަށް އެކަން ކުރައްވާށޭ،" ނަސްރީން ވިދާޅުވިއެވެ.
ދިރާގުގެ ބިޒްނަސް ޑިވެލޮޕްމަންޓުގެ ޑިރެކްޓަރު އަހުމަދު މައިމޫން ވިދާޅުވީ ޕީއެސްއެމްގެ ދެ ޗެނަލް ކަމަށްވާ، ޓީވީއެމާއި ޔެސްޓީވީން ދައްކާ ވޯލްޑްކަޕް ކަވަރޭޖުގައި ޕާޓްނަރެއްގެ ގޮތުގައި ދިރާގު ބައިވެރިވެފައިވާ ކަމަށާއި އޭގެ އިތުރުން ދިރާގުޓީވީ މެދުވެރިކޮށް، ސޮނީ ޓެން އިން ފޮނުވާ ވޯލްޑްކަޕް މެޗުތައް ވެސް ފެންނާނެ ކަމަށެވެ. އަދި އެގޮތަށް ރީބްރޯޑްކާސްޓްކުރުމުގެ ހުއްދަ ދިރާގުން ހޯދާފައިވާ ކަމަށް މައުމޫން ވިދާޅުވިއެވެ.
"އޭގެ އިތުރުން ދެން އަޅުގަނޑުމެންގެ އަތުގައި މިހުރީ 'ސޮނީ ޓެން' ޗެނަލްތަކުގެ ރައިޓްސް އަޅުގަނޑުމެން ނަގާފައިވާތީ، އެ ޗެނަލްތައް ފެނިގެންދާނެ. އެހެންވީމަ އަޅުގަނޑުމެންގެ ކަސްޓަމަރުންނަށް ނުފެންނަ ސިޓުއޭޝަނެއް ނާންނާނެ،" މައިމޫން ވިދާޅުވިއެވެ.
އެ ޕްރެސް ކޮންފަރެންސްގައި އިތުރަށް ވާހަކަ ދައްކަވަމުން ނާޝިދު ވިދާޅުވީ ވޯލްޑްކަޕުގެ މެޗުތައް ދެއްކުމަށް ރާއްޖޭގެ ބްރޯޑްކާސްޓަރުންނާއި ރީބްރޯޑްކާސްޓަރުން ވަރަށް ބޮޑު ހޭދައެއްކޮށްފައިވާ ކަމަށާއި ހުރިހާ މީޑިއަމެއްގައި ބަލާލުމުގެ ފުރުސަތު ލިބޭނެ ކަމަށެވެ.
"ރާއްޖޭގައި މި ދެއްކޭ ވޯލްޑްކަޕުގެ މެޗުތައް ހުރިހާ މީޑިއަމެއްގައި ރައްޔިތުންނަށް ބަލާލުމުގެ ފުރުސަތު، ލިބިގެން ހިނގައްޖެކަން. އަޅުގަނޑުމެން ބްރޯޑްކާސްޓަރުންނާއި ރީބްރޯޑްކާސްޓަރުން މިކަމަށް ވަރަށް ބޮޑު ހޭދައެއްކޮށްފިން،" ނާޝިދު ވިދާޅުވިއެވެ.
